Bulan

Tumatan Wikipidia basa Banjar, insiklupidia bibas
Loncat ke navigasi Loncat ke pencarian
Bulan bawarna habang wan jingga, tajanak matan Bumi pas garaha, wayah Bumi baandak di antara Bulan wan Matahari

Bulan adalah satelit alami Bumi sabubutingannya[lower-alpha 1][1] wan adalah satilit pangganalnya kalima dalam Tata Surya. Bulan jua adalah satelit alami pangganalnya di Tata Surya maumpat ukuran planet nang di urbitnya,[lower-alpha 2] lawan diamitir 27%, kakajalan 60%, wan massa181 (1.23%) matan Bumi. Di antara satilit alami lainnya, Bulan adalah satilit pangajalnya kadua imbah Io, satilit Yupiter.

Bulan baandak di rotasi sinkron lawan Bumi, nang rancak maampaiakan higa nang sama di Bumi, lawan higa parak ditandai ulih mare pulkanik kadap nang tadapat di antara dataran tinggi karak nang tarang wan kawah tubrukan nang manungkung. Bulan adalah banda langit nang panarangnya imbah Matahari. Saupama Bulan kaya liwar putih wan tarang, pamukaan Bulan sabujurnya kadap, lawan tingkat katarangan nang sadikit labih tinggi matan aspal incir. Matan jaman kunu, andaknya nang manungkung di langit wan pasanya nang taatur sudah mampangaruhi banyak budaya, tamasuk basa, pananggalan, sani, wan mitulugi. Pangaruh grapitasi Bulan maulah tajadinya pasang surut di lautan wan pamanjangan waktu wayah hari di Bumi. Intang orbit Bulan matan Bumi wayah ngini adalah kikira talu puluh kali matan diamitir Bumi, nang maulah ukuran Bulan nang cungul di langit parak sama ganal lawan ukuran Matahari, jadi mamungkinakan Bulan gasan manukupi Matahari wan maulah tajadinya garaha matahari hibak. Intang linear Bulan matan Bumi wayah ngini banaik lawan laju 3.82±0.07 cm satahun, saupama laju ngini kada kunstan.[2]

Bulan dikikiraakan tabantuk kikira 4,5 miliar tahun nang lalu, kada lawas imbah pabantukan Bumi. Saupama tadapat sajumlah hipotesis manganai asal-muasal Bulan, hiputisis nang paling ditarima wayah ngini manjalasakan bahua Bulan tabantuk matan rarapaian nang takulayak imbah sabuah banda langit saukuran Mars baranjahan lawan Bumi.

Bulan adalah sabubutingannya banda langit salain Bumi nang sudah didarati ulih manusia. Parugram Luna Uni Soviet adalah wahana panambaian nang sampai ka Bulan lawan kapal tarabang ruang angkasa nirawak wayah tahun 1959; parugram Apollo NASA Amirika Sarikat adalah misi luar angkasa baawak sabubutingannya nang sudah sampai ka Bulan sampai wayah ngini, dimulai lawan palungsuran misi baawak Apollo 8 nang maurbit Bulan wayah tahun 1968, wan diumpati ulih anam misi pandaratan baawak antara tahun 1969 wan 1972, nang pamulaan adalah Apollo 11. Misi ngini bulik ka Bumi mambawa 380 kg batuan Bulan, nang dipakai gasan mangambangakan pamahaman giulugi manganai asal-muasal, pambantukan satruktur dalam, wan sajarah giulugi Bulan.

Imbah misi Apollo 17 wayah 1972, Bulan wastu disinggahi ulih kapal tarabang ruang angkasa nirawak. Misi-misi ngitu rancaknya adalah misi urbit; matan tahun 2004, Japang, Tiongkok, India, Amirika Sarikat, wan Badan Luar Angkasa Irupa sudah malungsurakan wahana pangurbit Bulan, nang umpat basumbangsih tahadap panamuan is banyu di kawah kutup Bulan. Imbah Apollo, dua nagara jua sudah mangirimakan misi rover ka Bulan, misi Lunokhod Soviet pahabisan pas tahun 1973, wan misi basambungan Chang'e 3 RRC, nang malungsurakan rover Yutu wayah tanggal 14 Disimbir 2013.

Misi baawak ka Bulan wayah masa hadapan sudah dirancanaakan ulih banyak nagara, baik nang didanai ulih pamarintah atawa swasta. Di bawah Pajanjian Luar Angkasa, Bulan tatap bibas dijalajahi ulih sabarataan nagara gasan tujuan damai.

Asal usul ngaran[babak | babak asal mulanya]

Dalam basa Inggris, ngaran gasan satelit alami Bumi adalah moon.[3][4] Kata banda moon babibit matan kata moone (kikira tahun 1380), nang jua bakambang matan kata mone (1135), babibit matan kata basa Inggris Kuno mōna (sabalum 725). Sama halnya lawan sabaratan kata kulaan dalam basa Jermanik lainnya, kata ngini babibit matan basa Proto-Jermanik *mǣnōn.[5]

Sambatan lain gasan Bulan dalam basa Inggris mudirin adalah lunar, asalnya matan basa Latin Luna. Sambatan lainnya nang kada tapi awam adalah selenic, matan bahasa Yunani Kuno Selene (Σελήνη), nang imbahnya jadi dasar pangaranan selenografi.[6]

Referensi[babak | babak asal mulanya]


Kasalahan pangutipan: Ditemukan tag <ref> untuk kelompok bernama "lower-alpha", tapi tidak ditemukan tag <references group="lower-alpha"/> yang berkaitan

  1. ^ Kasalahan pangutipan: Tag <ref> tidak sah; tidak ditemukan teks untuk ref bernama Morais2002
  2. ^ http://lasp.colorado.edu/life/GEOL5835/Moon_presentation_19Sept.pdf
  3. ^ "Naming Astronomical Objects: Spelling of Names". International Astronomical Union. Diakses tanggal 29 March 2010. 
  4. ^ "Gazetteer of Planetary Nomenclature: Planetary Nomenclature FAQ". USGS Astrogeology Research Program. Diakses tanggal 29 March 2010. 
  5. ^ Barnhart, Robert K. (1995). The Barnhart Concise Dictionary of Etymology. USA: Harper Collins. hlm. 487. ISBN 978-0-06-270084-1. 
  6. ^ "Oxford English Dictionary: lunar, a. and n". Oxford English Dictionary: Second Edition 1989. Oxford University Press. Diakses tanggal 23 March 2010.