Sastra Banjar

Sastra Banjar umumnya kawa dimangarti sabagai sastra babasa Banjar nang dihasilakan urang-urang Banjar atawa lawan latar balakang bakabudayaan Banjar.

Pangertian

Manurut Tajuddin Noor Ganie (2006:4) saban cerdik pandai di kalangan etnis Banjar di Tanah Banjar (Kalimantan Selatan) masih saling adu argumentasi menganai definisi sastra Banjar nang paling rasuk. Dalam tulisannya di rubrik Opini SKH Radar Banjarmasin Minggu (Pintu Masuk ka Rumah Sastra Banjar), Tajuddin Noor Ganie mancatat setidak-tidaknya ada 5 definisi sastra Banjar nang layak dipartimbangakan hagan dipikirakan wan imbahnya disapakati basama ulih saban pihak hagan ditatapakan sabagai definisi sastra Banjar nang dirasmiakan.

Pangertian partama

Saban janis karya sastra nang bakisah manganai peri kahidupan etnis Banjar di Tanah Banjar (Kalsel) nang dilisanakan atawa ditulisakan dalam basa Banjar ulih sastrawan nang baasal matan kalangan etnis Banjar nang ranak, badiam, atawa suah bagana di Tanah Banjar.

Ciri-ciri wan Implikasinya

Manurut definisi di atas Sastra Banjar marujuk lawan 3 ciri, yakni:

1. bakisah tantang kahidupan saban hari etnis Banjar di Tanah Banjar (fokus wan lokus manyangkut aspik sosio kultural basipat esklusip)
2. dilisanakan atawa dituliskan dalam bahasa Banjar (fokus wan lokus manyangkut aspek basanya basifat eksklusif)
3. sastrawan nang malisanakan atawa manulisakannya lain sastrawan anonim tapi sastrawan nang dipinandui asal usulnya, yakni baasal matan kalangan etnis Banjar nang ranak, badiam, atawa suah bagana di Tanah Banjar (fokus wan lokus manyangkut paktur etnisitas sastrawannya basipat ekslusip)

Implikasi akibat adanya ciri ka 3 pada definsi sastra Banjar di atas adalah kada tatampungnya karya sastra babasa Banjar nang bersipat anonim karana faktor etnisitas nang melekat pada diri sastrawan anonim kada kawa dipastiakan lawan jelas. Akibatnya, semua karya sastra babasa Banjar nang anonim nang kaya andi-andi, bacaan (mantra Banjar), bapandung (monolog Banjar), cerita rakyat (mitologi, legenda, hikayat, kisah, dongeng), japin carita (teater), lamut (prosa liris berbahasa Banjar), madihin (puisi Banjar), mamanda (teater), pantun Banjar, syair Banjar, wan surat tarasul (surat cinta berbahasa Banjar) kada kawa dimasukaakan ka dalam kalumpuk sastra Banjar.

Pangertian kaduwa

Saban macam karya sastra nang bakisah tantang kahidupan etnis Banjar di mana haja jua di saban dunia (kada harus di Tanah Banjar) nang dilisanakan atawa ditulisakan dalam basa Banjar ulih sastrawan nang baasal matan kalangan etnis Banjar di mana haja buhannya badiam di saban dunia (kada harus ranak, badiam, atawa suah bagana di Tanah Banjar).

Ciri-ciri wan Implikasinya

Menurut definisi di atas sastra Banjar marujuk lawan 3 ciri, yakni:

1. bakisah tentang peri kahidupan etnis Banjar di mana haja di saban dunia (fokus wan lokus manyangkut aspek sosio kulturalnya kada dibatasi)
2. dilisanakan atawa ditulisakan dalam basa Banjar (fokus wan lokus manyangkut aspek basanya basipat eksklusif)
3. sastrawan nang malisanakan atawa menulisakannya kada dibatasi lawan sastrawan Banjar nang ranak, badiam, atawa suah bagana di Kalsel haja, saban sastrawan katurunan Banjar di mana haja buhannya bagana tamasuk dalam lingkup definisi ini (fokus dan lokus menyangkut faktor etnisitas sastrawannya bersifat terbuka), pangecualian hanya dilakukan lawan sastrawan anonim

Implikasi akibat adanya pangacualian tarhadap sastrawan anonim pada ciri nang ka 3 di atas, maka saban genre/macam sastra Banjar nang tartulak pada definisi partama jua masih tartulak pada dapinisi nang ngini

Pangartian katiga

Saban macam karya sastra nang bakisah tentang peri kahidupan etnis Banjar di mana haja jua di saban dunia (kada harus di Tanah Banjar) nang dilisanakan atawa ditulisakan dalam basa Banjar ulih siapa haja (kada harus ulih sastrawan nang balatar balakang etnis Banjar).

Ciri-ciri wan Implikasinya

Manurut definisi di atas sastra Banjar marujuk lawa 3 ciri, yakni

1. bakisah tentang peri kahidupan etnis Banjar di mana haja jua di saban dunia (fokus wan lokus manyangkut aspek sosio kulturalnya kada dibatasi)
2. dilisankan atawa dituliskan dalam basa Banjar (fokus wan lokus manyangkut aspek basanya basipat eksklusif)
3. sastrawan nang malisanakan atawa manuliskannya bulih siapa haja, tamasuk ulih sastrawan anonim sekali pun (fokus dan lokus menyangkut faktor etnisitas sastrawannya basifat terbuka, kadada pengecualian sama sekali).

Implikasi akibat kadadanya pambatasan dalam hal fokus wan lokus manyangkut paktor etnisitas sastrawannya (anonim, kada anonim, Banjar, wan lain Banjar sama haja), maka saban genre/macam sastra Banjar nang tartulak dalam definisi satu wan duwa di atas lawan utumastis taumpat tatampung dalam definisi tiga nginih.

Pangartian kaampat

Saban macam karya sastra nang bakisah tentang apa haja (kada harus tentang peri kahidupan etnis Banjar di mana haja jua di saban dunia) nang dilisanakan atawa ditulisakan dalam basa Banjar ulih siapa haja (kada harus ulih sastrawan balatar balakang etnis Banjar).

Ciri-ciri wan Implikasinya

Menurut definisi di atas sastra Banjar marujuk ka sabuting ciri haja, yakni dilisanakan atawa ditulisakan dalam basa Banjar. Saban karya sastra nang dilisanakan atawa ditulisakan dalam basa Banjar, tanpa mamandang apa pun nang dikisahakan di dalamnya tatap diakui sabagai sastra Banjar (fokus wan lokus manyangkut aspek sosio kulturalnya kada dibatasi), wan siapa haja nang manulisakannya (anonim, kada anonim, urang Banjar, atawa lain urang Banjar) tatap di akui sabagai sastra Banjar (fokus wan lokus manyangkut faktor etnisitas sastrawannya basipat tabuka).

Implikasi akibat kadadanya pambatasan dalam hal fokus wan lokus manyangkut aspek sosio kultural wan faktor etnisitas sastrawannya, maka sastra Banjar manjadi wilayah kreatip nang tabuka hagan siapa haja, nang kawa malisanakan wan manulisakan karya sastra nang babasa Banjar.

Pangartian kalima

Saban macam karya sasra nang bakisah tentang peri kahidupan etnis Banjar di mana haja jua di saban dunia nang dilisanakan atawa ditulisakan dalam basa Banjar apa haja (kada harus dalam basa Banjar) ulih siapa haja (kada harus ulih sastrawan nang balatar balakang etnis Banjar)

Ciri-ciri wan Implikasinya

Manurut definisi di atas sastra Banjar hanya marujuk lawan sabuting ciri, yakni bakisah tentang peri kahidupan etnis Banjar di mana haja jua di saban dunia.

Implikasi akibat kadadanya pambatasan dalam hal fokus lokus manyangkut aspek bahasa wan paktor etnisitas sastrawannya, maka sastra Banjar manjadi wilayah kreatip nang tabuka hagan siapa haja (kada harus basuku bangsa Banjar) nang kawa malisanakan atawa manuliskan karya sastra dalam basa nang inya kuasai (kada harus dalam basa Banjar) nang bakisah tentang peri kahidupan etnis Banjar di mana haja jua di saban dunia.

Penggolongan

Sastra Banjar kawa dibagi jadi duwa macam, nanitu sastra Banjar lawas wan sastra Banjar hanyar. Sastra Banjar hanya baisi ciri-ciri nang disasuaiakan lawan parkambangan sastra Indonesia.

Sastra lama

Babarapa cuntuh macam sastra Banjar lawas adalah:

• Andi-andi: sajanis kisah Panji langgam Banjar.

Daftar Pustaka

• Tajuddin Noor Ganie. 2006. Pintu Masuk ke Rumah Sastra Banjar. Banjarmasin: Rumah Pustaka Folklor Banjar. Cetakan I.'