Masak bom
Masak bom adalah masakan khas Banjar nang diulah matan daging ayam. Masakan ngini dingarani masak bom maraga cara maulahnya mamakai harang panas nang dimasukakan ka dalam panci pamasakan, imbahtu ditukup sampai mangaluarakan api wan suara laduman nang nyaring.[1] Masak bom balain lawan masak habang, ihwal ngini kawa ditiring matan warna masak bom nang tacuklat pada masak habang. Masak bom kada kaya masakan Banjar lain nang kawa ditamuni di warung makan khas Banjar nang biasanya maraga masak bom diulah rahatan acara-acara tatantu haja nang kaya bakawinan.[2]
Bahan
[babak | babak asal-mulanya]Bahan nang diulah gasan masak bom adalah daging ayam, kacang tanah nang hudah disanga wan lanikakan, bawang merah, bawang putih, lombok karing, cangkih, kayu manis, kecap manis, gula habang, asam kamal, jahe, acan, banyu, minyak lamak, gula wan uyah.[3]
Cara maulah
[babak | babak asal-mulanya]Ayam diracak sasuai kahandak imbahtu dibarasihakan pakai banyu, imbah ngitu bawang habang, bawang putih, jahe, lombok karing, wan acan dilanikakan sampai halus. Bumbu nang lanik tadi lalu diguring di minyak lamak. Masukakan kayu manis wan cangkih, haru sampai bumbu tadi masak wan harum.[3] Racakan ayam nang sudah dibarasihi tadi imbah ngitu dimasukakan ka dalam sambal tadi baimbai lawan banyu asam kamal, kecap manis wan gula habang. Imbah ayam hudah masak, masukakan harang nang hudah panas banar kadalam pamasakan ayam lalu tukup, ganaakan salawas 10 manit, haru masam bom tadi imbah ngitu kaluarakan harangnya.[4]
Jujuhutan
[babak | babak asal-mulanya]- ^ Novitri, Tia Lalita (12 Februari 2024). "Tahulah Pian, Masak Bom di Kalsel Beraroma Bakaran". Radar Banjarmasain. Diakses tanggal 24 Agustus 2024.
- ^ "Mengenal Ayam Masak Bom, Kuliner Unik Asal Kota Banjarmasin". Pos Sindo (dalam bahasa Indonesia). 2023-04-30. Diakses tanggal 2024-08-24.
- ^ a b Penulis (2023-09-13). "Resep Ayam Masak Bom Khas Banjarmasin". Kaltim Faktual (dalam bahasa Indonesia). Diakses tanggal 2024-08-24.
- ^ "Kuliner Kalsel : Manis, Gurih dan khasnya Beraroma Bakar dari Arang, Begini Resep Ayam Masak Bom". Banjarmasinpost.co.id (dalam bahasa Indonesia). Diakses tanggal 2024-08-28.