Kalinci Paskah

Kartu pus bagambar Kalinci Paskah tahun 1915

Kalinci Paskah adalah mahluk piktip nang digambarakan jadi saikung kalinci antrumurpis. Maumpat laginda, kalinci Paskah mambawa bakul nang hibak baisi hintalu, gula batu, wan mainan nang bawarna-warni ka rumah kakanakan wayah malam Paskah. Kalinci Paskah ngitu cagar maandak bakul ngitu di sabuah tampat atawa manabunakannya di dalam rumah kakanakan ngitu supaya kaisukannya mancarinya. Kalinci Paskah baisi kamahiripan-kamahiripan lawan Sintarklas nang mambawa hadiah gasan kakanakan nang kada wangal wayah malam Natal. Sumbar laginda ngitu bamacam-macam, tagal kalinci ngitu sudah dipatuh matan 1600; babarapa sumbar manyambatakan laginda ngitu baasal matan mitus kasuburan, samantara nang lain mahubungakannya lawan watak kalinci di dalam ikunugarapi Kristen.

Asal-muasal

Asal-muasal Kalinci Paskah jadi simbul Paskah kawa dilacak matan kawasan Alsace wan barat daya Jerman, tampat kalinci ngitu disambat gasan pamulaannya wayah tahun 1600-an. Kalinci Paskah nang batawas makanan panambaian diulah di Jerman pas pamulaan 1800-an wan diulah matan bahan wadai wan gula.

Imbah ngitu Kalinci Paskah dipatuhakan ka Amirika ulih bubuhan imigran Jerman nang mandarat di Pennsylvania Jerman wayah tahun 1700-an. Kadatangan Osterhase — atawa terwelu Paskah dalam basa Jerman — wayah malam Paskah adalah salah sabuting "kahimungan kakanakan nang pangganalnya", parak sama lawan kadatangan Christkindl — Sinterklas nang dipatuh ulih urang-urang Austria wan Bavaria — pas malam Natal.

Maumpat taradisi, kakanakan maulah sarang kalinci nang bawarna-warni di buncu tatabun di rumah bubuhannya. Amun kakanakan ngitu kada wangal, Osterhase cagar bahintalu bawarna-warni di sarang ngitu. Wayah taradisi ngitu mulai manyabar, sarang ngitu diparuduksi jadi bakul Paskah, wan maandak sarang di buncu tatabum baubah jadi taradisi manabunakan bakul/hintalu Paskah .