Harimau Jawa
Harimau jawa (Panthera tigris sondaica) adalah janis hiwan asli Pulau Jawa, Indunisia nang digalah sampai partangahan tahun 1970-an.[1] [2] Harimau jawa digalah sampai inya ahirnya habis, habitat alaminya dijadiakan lahan bahuma, wan diulah macam-macam inprastruktur.[3] Harimau jawa jadi sabuting matan talu janis harimau nang hidup di Kapulauan Sunda.[4]
Tatambaian, harimau jawa baisi subspesies harimau saurang, imbah Daptar Habang IUCN pas tahun 2008 maumumakan amun harimau jawa sudah kadada nang hidup lagi.[2] Pas tahun 2017, taksunumi harimau jawa dibaiki wan dimasukakan ka dalam subspesies P.t. sondaica kaya harimau sumatera wan harimau bali.[1]
Hasil analisis DNA mitokondria matan 23 cuntuh harimau nang asalnya matan kuliksi museum mambuktiakan amun harimau sudah mandiami Kapulauan Sunda pas wayah glasial ahir atawa pas 110.000-12.000 tahun nang lalu.[5]
Ciri-ciri wan Habitat
[babak | babak asal-mulanya]Ngaran ilmiah gasan harimau jawa adalah Felis tigris sondaicus sasuai lawan nang diusulakan Coenraad Jacob Temminck pas tahun 1844.[6]
Pas tahun 1929, saikung ahli taksunumi Inggris, Reginald Innes Pocock, mamasukakan janis harimau ngini ka dalam genus Panthera, nang ngaran ilmiahnya adalah Panthera tigris.[7][8]
Pas tahun 2017, Cat Classification Task Force matan Cat Specialist Group[9] mambaiki taksunumi kucing ngini, imbah ngitu wahini mamutusakan amun pupulasi harimau nang masih hidup wan nang sudah kadada lagi di Indunisia jadi spesies P. t. sondaica.[1]
Harimau jawa baisi ukuruan awak nang tahalus amun dibandingakan lawan subspesies lain di daratan Asia, tagal harimau jawa taganal dibandingakan lawan harimau bali, imbah ngitu tamirip lawan harimau sumatera.[10] Harimau jawa biasanya baisi luring-luring panjang wan tipis, luringnya tabanyak amun dibandingakan lawan harimau sumatera. Hidungnya panjang wan mitak, bidang uksipitalnya liwar halus, wan tulang tangkuraknya tapanjang. Amun diitihi matan wujud tangkurak nang kada sama ngini, harimau jawa imbah ngitu diusulakan gasan dimasukakaan ka spesies saurangan, nang dingarani taksunumi Panthera sondaica.[4]
Harimau jawa laki baisi panjang awak rata-rata 248 cm wan barat antara 100-141 kg. Amun harimau bini, ukurannya tahalus dibandingakan lawan harimau laki, nang baratnya antara 75-115 kg.[10]
Ukuran awak harimau jawa nang tahalus dihubungakan lawan Kaidah Bergmann (Bergmann's rule) wan ukuran spesies hiwan makanan harimau nang ada di Pulau Jawa, nang mana ukurannya tahalus dibandingakan lawan minjangan wan spesies sapi di daratan Asia lainnya. Tagal, diamitir talapak harimau jawa taganal amun dibandingakan lawan harimau benggala di Bangladesh, India, wan Nepal.[11]
Ujar habar, harimau jawa kawa mamatahakan batis kuda atawa hadangan lawan karukutnya.[12]
Harimau jawa bahari banyak hidup di sapalihan wilayah Pulau Jawa, tagal imbah ngitu baundur ka dairah gunung wan hutan gahung pas tahun 1940. Pas sakitaran tahun 1970, sabubutingnya harimau nang tasisa katahuan hidup di wilayah Meru Betiri, gunung nang tatinggi di subalah tanggara Jawa. Wilayah nang liring lawan dairah nang miring ngini balum banyak bapanduduk. Dairah nang luasnya 500 km2 disahakan jadi wadah suaka margasatwa pas tahun 1972. Harimau jawa nang pahabisan dilapurakan suwah talihat di dairah Meru Betiri pas tahun 1976.[3]
Harimau jawa biasanya mamakan minjangan jawa (Rusa timorensis), banteng (Bos javanicus), wan babi hutan (Sus scrofa). Harimau jawa jarang mamakan hiwan unggas banyu wan reptil. Kadada nang tahu barapa lawas harimau jawa batianan atawa umur pastinya di alam liar atawa di panangkaran. Sabalum pacahnya Perang Dunia II, sapalihan harimau jawa diingu di sapalihan kabun binatang di Indunisia, pas perang pacah, kabun binatang tutupan. Imbah habis perang, harimau ngini jadi tanyaman ditangkap.[11]
Kapunahan
[babak | babak asal-mulanya]
Turai bagalah harimau jawa rami diadaakan pas tahun 1830-an. Pas sakitaran tahun 1850, panduduk nang badiam di dairah kampung baanggapan amun harimau ngitu jadi sumbar wabah. Bagalah harimau magin babanyak pas awal abad ka-20 pas panduduk di Pulau Jawa bajumlah labih 28 juta ikung wan pruduksi banih kada cukup gasan mancukupi kaparluan panduduk nang batambah tarus. Sulang 15 tahun, 150% labih lahan sudah dibuka gasan dijadiakan lahan bahuma. Pas tahun 1938, hutan alam nang ada di pulau ngini ada 23%. Pas Tahun 1975, ada 8% hutan haja nang tasisa, wan pupulasi manusia batambah jadi 85 juta ikung urang. Di wilayah nang sudah banyak didiami manusia ngini, harimau jawa jadi makin habis maraga ditambahi lagi lawan adanya sapalihan kaadaan wan paristiwa nang diantaranya adalah;[3]
- Harimau wan hiwan makanannya diracun di mana haja. Jadinya, habitat harimau magin bahalus.
- Hutan alam magin bakurang imbah habis Perang Dunia II, maraga banyaknya lahan nang dibuka gasan dijadiakan parkabunan jati (Tectona grandis), kupi, wan gatah (Hevea brasiliensis), padahal habitat ngitu kada rasuk gasan satwa liar.
- Minjangan jawa nang jadi spesies makanan harimau tapanting banyak mati maraga panyakit di sapalihan suaka margasatwa wan hutan pas tahun 1960-an.
- Pas ada kajadian kakacauan sipil tahun 1965, bubuhan basanjata banyak nang bukah ka ampah hutan lindung, imbah ngitu mambunuh harimau-harimau nang tasisa.
Pas tahun 1960, pupulasi harimau di Taman Nasiunal Ujung Kulon amun dihitung-hitung bajumlah 10-12 ikung.[13] Pas partangahan tahun 1960-an, harimau masih tasisa di tiga kawasan kunsirpasi nang diulah pas tahun 1920-an sampai 1930-an ; Cagar Alam Leuweng Sancang, Ujung Kulon, wan Taman Nasiunal Baluran. Imbah habis kakacauan sipil, kadada sabuting harimau nang kawa ditamui di sana. Pas tahun 1971, saikung harimau bini nang sudah tuha ditimbak di sabuting parkabunan parak Gunung Betiri di subalah tanggara Jawa. Imbah ngitu, kawasan ngini ditambahi statusnya jadi suaka margasatwa pas tahun 1972, wan diulah adanya pasukan panjaga, ditambahi jua lawan ampat pruyik gasan maurus habitat. Suaka margasatwa ngini liwar rusak maraga adanya dua parkabunan ganal di danawan sungai utama, nang jadi habitat parasuknya gasan harimau wan hiwan makanannya. Pas tahun 1976, ada didapatakan talapak batis di subalah timur suaka margasatwa nang manandaakan adanya talu sampai lima harimau. Sapalihan banteng ada jua talihat masih kawa batahan hidup di parak parkabunan, tagal talapak minjangan jawa kadada tatamu di dairah ngini.[14]
Imbah tahun 1979, sudah tabukti amun kadada lagi harimau nang banampak di Taman Nasiunal Meru Betiri. Pas tahun 1980, suaka margasatwa ngini disaranakan gasan diganali wan maampihi barataan gawian manusia nang kawa marusak ikusistim nang sudah rusak. Badan Kunsirpasi Alam Indunisia manjalanakan papadah ngitu pas tahun 1982, bubuhannya maumumakan amun suaka margasatwa Meru Betiri jadi taman nasiunal. Tagal, usaha-usaha ngini sudah talambat gasan maamanakan harimau di wilayah ngini.[3] Pas tahun 1987, sabuting kalumpuk mahasiswa Institut Pertanian Bogor nang bajumlah 30 ikung baikspidisi ka Meru Betiri. Bubuhannya bacacari harimau di sakitaran kawasan ngitu lawan cara maulah kalumpuk halus balima ikung wan bubuhannya badapat talapak batis wan tahi harimau.[15]
Di subalah barat Jawa ada Cagar Alam Halimun, nang wahini bagabung ka Taman Nasiunal Gunung Halimun Salak. Pas tahun 1984, saikung harimau tabunuh di kawasan ngini, wan talapak batis harimau nang tadapat pas tahun 1989 baukuran saganal talapak harimau. Tagal, sabuting ikspidisi nang digawi anam ikung ahli biulugi pas tahun 1990 kadada mahasilakan bukti nang kuat wan akurat pasal adanya harimau.[15] Sabuting panalitian tambahan rancananya diadaakan di Taman Nasiunal Meru Betiri pas bulan Siptimbir-Nupimbir tahun 1992 nang didangani WWF Indunisia. Tatambaian, pas panalitian ngini kudakan jabakan (camera traps) dipakai gasan manaliti. Matan bulan Marit 1993 sampai Marit 1994, kudakan dipasang di 19 lukasi, tagal kadada lalu nang mahasilakan gambar harimau.[16] Salawas wayah ngini, kadada lalu badapat talapak batis nang kawa manandai adanya harimau. Imbah lapuran nang pahabisan matan panalitian ngini diumumakan, harimau jawa sudah dipastiakan kadada lagi.[17]
Ada macam-macam spikulasi wan tanda-tanda kamungkinan adanya harimau di Taman Nasiunal Meru Betiri nang maulah Kapala Panjaga Taman Nasiunal, Indra Arinal, bainisiatip gasan bausaha mancari harimau lagi. Sambil didangani Sumatran Tiger Project, ada 12 ikung angguta pagawai taman nasiunal nang dilatih pas bulan Uktubir tahun 1999 gasan mamasang kudakan jabakan wan maulah kar hasil maitihi harimau. Canadian Tiger Foundation jua mambari bantuan kudakan inprahabang.[18] Tagal, biar sudah bagawi satahunan, bubuhannya tatap kada kawa mangudak sabuting harimau haja, bubuhannya malah mangudak sapalihan hiwan makanan harimau wan bubuhan nang bagalah liar.[19]
Jujuhutan
[babak | babak asal-mulanya]- ^ a b c Kitchener, A. C.; Breitenmoser-Würsten, C.; Eizirik, E.; Gentry, A.; Werdelin, L.; Wilting, A.; Yamaguchi, N.; Abramov, A. V.; Christiansen, P.; Driscoll, C.; Duckworth, J. W.; Johnson, W.; Luo, S.-J.; Meijaard, E.; O'Donoghue, P.; Sanderson, J.; Seymour, K.; Bruford, M.; Groves, C.; Hoffmann, M.; Nowell, K.; Timmons, Z.; Tobe, S (2017). "A revised taxonomy of the Felidae: The final report of the Cat Classification Task Force of the IUCN Cat Specialist Group" (PDF). Cat News. Special Issue 11: 66–68.
- ^ a b Jackson, P. & Nowell, K (2008). "Panthera tigris ssp. sondaica". IUCN Red List. Diakses tanggal 20 Marit 2023.
- ^ a b c d Seidensticker, J; et al. (In Tilson, R. L.; Seal, U. S. (eds.)) (1987). "Bearing witness: observations on the extinction of Panthera tigris balica and Panthera tigris sondaica". Tigers of the world: the biology, biopolitics, management, and conservation of an endangered species. New Jersey: Noyes Publications. hlm. 1–8. ISBN 9780815511335.
- ^ a b Mazák, J. H. & Groves, C. P (1 September 2006). "A taxonomic revision of the tigers (Panthera tigris) of Southeast Asia". Mammalian Biology. 71 (5): 268–287.
- ^ Xue, H.R.; Yamaguchi, N.; Driscoll, C.A.; Han, Y.; Bar-Gal, G.K.; Zhuang, Y.; Mazak, J.H.; Macdonald, D.W.; O’Brien, S.J. & Luo, S.J (2015 May-Jun). "Genetic Ancestry of the Extinct Javan and Bali Tigers". Journal of Heredity. 106 (3): 247–257.
- ^ Temminck, C. J; et al. (Von Siebold, F.; Schlegel, H; de Haan, W.; Kiichi Nakazawa; Shigeho Tanaka; Nagamichi Kuroda; Yaichirō Okada) ([1842]-1850 [REPRINT Tokyo, after 1945]). "Aperçu général et spécifique sur les mammifères qui habitent le Japon et les iles qui en dépendent". Fauna Japonica sive Descriptio animalium, quae in itinere per Japoniam, jussu et auspiciis superiorum, qui summum in India Batava imperium tenent, suscepto, annis 1825 - 1830 collegit, notis, observationibus et adumbrationibus illustravit Ph. Fr. de Siebold. Mammalia. Lugduni Batavorum: Arnz et Socius. hlm. 1–59.
- ^ Pocock, R. I (1929). "Tigers". The journal of the Bombay Natural History Society. 33: 505––541.
- ^ Pocock, R. I (1939). "Panthera tigris". The Fauna of British India, Including Ceylon and Burma. Mammalia: Volume 1. London: T. Taylor and Francis, Ltd. hlm. 197–210.
- ^ "Tiger - Javan tiger (P. t. sondaica)". Cat Specialist Group. Diakses tanggal 20 Marit 2023.
- ^ a b Mazák, V (8 May 1981). "Panthera tigris". Mammalian Species (152): 1–8.
- ^ a b Seidensticker, John (1986). edited by Miller, S. D. and Everett, D. D. "Large carnivores and the consequences of habitat insularization: ecology and conservation of tigers in Indonesia and Bangladesh". Cats of the World: Biology, Conservation, and Management. Washington, DC: National Wildlife Federation: 1–41.
- ^ Partington, Charles Frederick (1835). "CAT - Felis or Feline, THE CAT TRIBE". The British Cyclopædia of Natural History: Combining a Scientific Classification of Animals, Plants, and Minerals, Volume 1. Orr & Smith. hlm. 718–746.
- ^ Hoogerwerf, A. (1970). "Part IV. The Javan Tiger". Udjung Kulon: The Land of the Last Javan Rhinoceros. Leiden, Netherlands: E. J Brill. hlm. 241–272.
- ^ Seidensticker, J and Suyono (1980). The Javan Tiger and the Meru-Betiri Reserve: A Plan for Management : a World Wildlife Fund Report Published with the Financial Assistance of the Netherlands Van Tiehoven Foundation. Gland, Switzerland: International Union for Conservation of Nature and Natural Resources. hlm. 72–86.
- ^ a b Istiadi, Y.; Panekenan, N.; Novendri, Y.; Mathys, A.; Mathys, Y. & Priatna, D (1991). "Untersuchung über die Carnivoren des Gunung Halimun Naturschutzgebietes". Mitteilungen der Zoologischen Gesellschaft für Arten-und Populationsschutz. 7 (2): 3–5.
- ^ Rafiastanto, A (1994). Project ID 0084-02 (Report). "Camera trapping survey of Javan tiger and other wild animals in Meru Betiri National Park". WWF Indonesia Programme.
- ^ Jackson, P. & Kemf, E (1994). "Wanted alive! Tigers in the wild". WWF species status report (Report). Gland: WWF.
- ^ Tilson, R (1999). "Sumatran Tiger Project Report No. 17 & 18: July - December 1999 grant number 1998-0093-059". (Report). Jakarta: Indonesian Sumatran Tiger Steering Committee: 11–12. Diarsipkan dari versi asli tanggal 2011-07-16. Diakses tanggal 2023-03-20.
- ^ Breining, G. (2002). What's Our Zoo Got to Do With It? Archived 2023-03-20 at the Wayback Machine. Minnesota Conservation Volunteer