Harimau Bali

Tumatan Wikipidia Banjar, kindai pangatahuan
?Harimau bali
Harimau bali pas tampil di sirkus Ringling Bros, dikudak sabalum tahun 1915
Harimau bali pas tampil di sirkus Ringling Bros, dikudak sabalum tahun 1915
Satatus palastarian

Punah  (1938) (IUCN 3.1)
Klasifikasi ilmiah
Karajaan: Animalia
Filum: Chordata
Kelas: Mamalia
Ordo: Carnivora
Famili: Felidae
Genus: Panthera
Spesies: P. tigris
Upaspesies: P. t. sondaica
Nama trinomial
Panthera tigris sondaica
(Temminck, 1844)
Peta wilayah
Peta wilayah
Sinonim

sebelumnya P. t. balica (Schwarz, 1912)

Harimau bali adalah pupulasi Panthera tigris sondaica nang ada di Pulau Bali, Indunisia[1] nang sudah kadada lagi bamula tahun 1950-an.[2]

Harimau ngini sabalumnya baisi subspesies harimau saurang nang ngaran ilmiahnya adalah Panthera tigris balica. Harimau ngini sudah diumumakan kadada hidup lagi di Daptar Habang IUCN pas tahun 2008.[2] Pas tahun 2017, taksunumi harimau bali sudah dibaiki wan dimasukakan ka subspesies Panthera tigris sondaica, sama lawan harimau sumatera nang sampai wahini masih hidup.[1]

Hasil analisis DNA mitokondria matan 23 cuntuh harimau matan kuliksi museum mambuktiakan amun harimau suwah hidup bakulumpuk di Kapulauan Sunda pas wayah glasial ahir 11.000-12.000 tahun nang lalu.[3]

Di Bali, harimau pahabisan taditiksi pas ahir tahun 1930-an. Sapalihan harimau mungkin masih kawa batahan hidup sampai tahun 1940-an atawa mungkin sampai tahun 1950-an. Pupulasi harimau ngini tatarusan digalahani sampai ahirnya habis wan habitat alaminya jadi gasan kapantingan manusia.[4]

Sambatan gasan harimau di basa Bali adalah samong.[5]

Ciri-ciri wan Habitat[babak | babak asal-mulanya]

Kulit harimau bali

Pas tahun 1912, ahli zoologi Jerman, Ernst Schwarz, manggambarakan amun kulit wan tangkurak harimau bini nang sudah tuha, nang jadi kuliksi Museum Senckenberg asalnya matan Bali. Sidin mangarani harimau ngini lawan ngaran ilmiah Felis tigris balica. Ujar sidin, harimau ngini balain lawan harimau jawa maraga warna bulunya tatarang wan tangkuraknya tahalus. Langkuk zigomatik-nya jua takipit.[6] Pas tahun 1969, kaunikan harimau bali bamula ditakunakan, pasalnya, analisis murpulugi sapalihan tangkurak harimau matan Bali manunjukakan bamacam-macam ukuran nang mirip lawan tangkurak harimau jawa. Warna wan pula luring-luring di kulit kada talalu balainan.[7] Parbandingan sekuens DNA nang masih hidup manunjukakan kamiripan ginitik nang parak lawan harimau-harimau nang ada di Kapulauan Sunda. Harimau-harimau ngini maulah monophyletic group nang balainan wan mirip kaya harimau lain nang ada di daratan Asia.[3]

Pas tahun 2017, Cat Classification Task Force matan Cat Specialist Group mambaiki taksunumi kucing, imbah ngitu maumumakan amun pupulasi harimau bali wan harimau jawa nang sudah kadada hidup lagi, wan pupulasi harimau sumatera masuk ka spesies P. t. sondaica.[1]

Harimau bali digambarakan jadi harimau pahalusnya di Kapulauan Sunda.[6] Pas abad ka-20, kikira tinggal pitu kulit wan tangkurak harimau bali nang disimpani di museum. Ciri utama tangkurak-tangkurak ngini adalah bidang uksipitalnya nang halus wan mirip lawan wujud tangkurak harimau jawa.[8] Kulit harimau laki nang diukur matan kapala sampai ka hujung buntut baukuran 220-230 cm, amun kulit harimau bini baukuran 190-210 cm. Barat awak harimau laki kikira antara 90-100 kg wan nang bini 65-80 kg.[9]

Sapalihan spesimen zoologi harimau bali nang tacatat, asalnya matan Bali subalah barat, nang di sana ngitu banyak ada hutan bakau, bukit pasir, wan tutumbuhan sabana. Amun ditangguhi, hiwan nang jadi makanan utama harimau bali adalah minjangan jawa (Rusa timorensis).[10]

Kapunahan[babak | babak asal-mulanya]

Pas ahir abad ka-19, parkabunan sawit wan pahumaan bairigasi banyak diulah di tawiringan gunung baapi subalah utara Bali nang banyak pulkanik wan jalur aluvial disakitaran pulau. Bagalah harimau bamula imbah Walanda manguasai wilayah Bali.[10] Pas wayah panjajahan Walanda, bagalah harimau digawi bubuhan ulahragawan Irupa nang datang matan Pulau Jawa, bubuhannya ngini bagaya kaya Victoria rumantis tagal babahaya banar, sakaligus langkap mambawa sanapang hanyar gasan bagalah. Cara bagalah harimau nang dikatujui banar adalah lawan cara manjabak harimau ngitu lawan parangkap batis nang diulah matan baja, wujudnya ganal wan barat. Jabakan ngini disambunyiakan di bawah umpan, biasanya umpannya ngitu kambing atawa minjangan, imbah ngitu harimau ditimbak matan ampah nang parak. Urang nang maulah sanapang nang asalnya matan Surabaya, E. Munaut, maakui amun kada sampai batahun-tahun sidin kawa mambunuh labih 20 harimau.[11] Pas tahun 1941, suaka margasatwa tatambaian nang wahini bangaran Taman Nasiunal Bali Barat didiriakan di Bali subalah barat. Tagal, sayang banar pambangunan ngini sudah talambat gasan manyalamatakan harimau bali, maraga harimaunya sudah kadada nang hidup lagi. Harimau ngini kamungkinan habis pas ahir Perang Dunia II. Sapalihan harimau kikira masih kawa batahan hidup sampai tahun 1950-an, tagal kadada sabuting spesimen nang kawa dijadiakan kuliksi museum habis parang ngitu.[10]

Sapalihan tangkurak harimau, kulit, wan tulang ada nang diawitakan di museum. British Museum di London adalah sabuting museum nang baisi kuliksi pambanyaknya, museum ngini baisi dua kulit wan talu tangkurak; ada jua Museum Senckenberg di Frankfurt, Museum Nasiunal Sajarah Alam Stuttgart, Museum Naturalis di Leiden, wan Museum Zoologi di Bogor, Indunisia nang baisi sisa-sisa harimau bali pahabisan nang masih tacatat. Pas tahun 1997, ada dapat sabuting tangkurak nang jadi kuliksi lawas matan Museum Sajarah Alam Hungaria. Tangkurak ngini sudah ditaliti lawan kailmuan nang ilmiah wan didukumintasikan sababaiknya.[12]

Harimau bali pahabisan nang kawa dikudak adalah saikung harimau nang ditimbak mati pas tahun 1925 di Sumberkima, Bali Barat. Pas tahun 27 Siptimbir 1937, harimau bali diumumakan sudah kadada nang hidup lagi maraga kahilangan habitat nang pas ngitu dijadiakan lahan pahumaan, rumah-rumah panduduk, wan adanya bagalah harimau.[13]

Jujuhutan[babak | babak asal-mulanya]

  1. ^ a b c Kitchener, A. C.; Breitenmoser-Würsten, C.; Eizirik, E.; Gentry, A.; Werdelin, L.; Wilting, A.; Yamaguchi, N.; Abramov, A. V.; Christiansen, P.; Driscoll, C.; Duckworth, J. W.; Johnson, W.; Luo, S.-J.; Meijaard, E.; O’Donoghue, P.; Sanderson, J.; Seymour, K.; Bruford, M.; Groves, C.; Hoffmann, M.; Nowell, K.; Timmons, Z. & Tobe, S. (2017). "A revised taxonomy of the Felidae: The final report of the Cat Classification Task Force of the IUCN Cat Specialist Group" (PDF). Cat News (Special Issue 11): 66–68. 
  2. ^ a b Goodrich, J.; Lynam, A.; Miquelle, D.; Wibisono, H.; Kawanishi, K.; Pattanavibool, A.; Htun, S.; Tempa, T.; Karki, J.; Jhala, Y.; Karanth, U. (20 April 2014). "Panthera tigris". IUCN Red List of Threatened Species. Diakses tanggal 20 Marit 2023. 
  3. ^ a b Xue, H.R.; Yamaguchi, N.; Driscoll, C.A.; Han, Y.; Bar-Gal, G.K.; Zhuang, Y.; Mazak, J.H.; Macdonald, D.W.; O’Brien, S.J.; Luo, S.J. (2015 May-Jun). "Genetic Ancestry of the Extinct Javan and Bali Tigers". Journal of Heredity. 106 (3): 247–257. 
  4. ^ Seidensticker, J (1987). "Bearing witness: observations on the extinction of Panthera tigris balica and Panthera tigris sondaica". Tigers of the world: the biology, biopolitics, management, and conservation of an endangered species. In Tilson, R. L.; Seal, U. S. (eds.). New Jersey: Noyes Publications. hlm. 1–8. ISBN 9780815511335. 
  5. ^ Crawfurd, J. (1820). History of the Indian Archipelago: Containing an Account of the Manners, Arts, Languages, Religions, Institutions, and Commerce of Its Inhabitants, Volume 2. Edinburg: A. Constable and Company. hlm. 144. 
  6. ^ a b Schwarz, Ernst (1912). "XLIII.—Notes on Malay tigers, with description of a new form from Bali". Annals and Magazine of Natural History. 8. 10: 324–326. 
  7. ^ Hemmer, H. (1969). "Zur Stellung des Tigers (Panthera tigris) der Insel Bali". Zeitschrift für Säugetierkunde. 34: 216–223.
  8. ^ Mazak, V., Groves, C. P. and Van Bree, P. (1978). "On a Skin and Skull of the Bali Tiger, and a list of preserved specimens of Panthera tigris balica (Schwarz, 1912)" (PDF). Zeitschrift für Säugetierkunde – International Journal of Mammalian Biology 43: 108–113. 
  9. ^ Mazák, V. (8 May 1981). "Panthera tigris". Mammalian Species. 152: 1–8. 
  10. ^ a b c Seidensticker, J. (1986). "Large carnivores and the consequences of habitat insularization: ecology and conservation of tigers in Indonesia and Bangladesh". Cats of the World: biology, conservation, and management. In S. D. Miller; D. D. Everett (eds.). Washington DC: National Wildlife Federation. hlm. 1–41. ISBN 0912186798. 
  11. ^ Vojnich, G. (1913). A Kelet-Indiai Szigetcsoporton [in the East Indian Archipelago]. Budapest: Singer és Wolfner. hlm. 264
  12. ^ Buzas, B. and Farkas, B. (1997). "An additional skull of the Bali tiger, Panthera tigris balica (Schwarz) in the Hungarian Natural History Museum". Miscellanea Zoologica Hungarica. 11: 101–105. 
  13. ^ Kusumo, Rizky (09 July 2021). "Mengenang Samong, Harimau Bali yang Telah Punah". Good News From Indonesia. Diakses tanggal 20 Marit 2023.