Capil ka isi

Katumbar

Tumatan Wikipidia Banjar, kindai pangatahuan
Parawakan Katumbar

Katumbar adalah ngaran rarampahan nang babutir halus nang rancak ditamui di masakan Indunisia. Katumbar atawa Coriandrum sativum L marupakan rampah nang dikikirakan panuhanya wan lawas sudah dipakai lawan manusia gasan bamasak.[1]

Lamun di basa Inggris, Katumbar disambat coriander nang matan basa Yunani 'koris' nang artinya kararangga bau, marga baunya nang kuat banar apalagi lamunnya dicacah halus. Lamunnya di masakan Asia, katumbar baguna gasan tanaman tatamba maraga rasanya nang kuat babakas, padas saikit bakambuh manis duwa rancak dipakai gasan baulah gulai atawa karih.[1]

Urang Jawa Tengah biasa manyambatnya duwa tumbar, tagal ada juwa nang manyambat Katuncar (Sunda), Katombhar (Madura), Hatumbar (Batak Toba) Katumba (Minangkabau), Katumbare (Makassar duwa Bugis) lawan Penyelang (Kerinci) atawa Cilantro (Amerika Latin).[2]

Sajarah[babak | babak asal-mulanya]

Katumbar dikikirakan lawan buhan pakar baasal matan dairah timur parak Near East[3], tagal ada jua nang mamadahakan baasal matan Eropa Selatan di parak laut Kaspia.[4] Imbah ngitu maucir ka Asia Tenggara liwat India nang jadi katumbar buahnya bulat hintalu, liwat Cina nang buahnya tahalus lagi lawan liwat Mediterania wan Eropa nang buahnya bulat juwa taganal ukurannya.[3]

Tagal, kata "Katumbar" baasal matan kothimbir dalam basa Indo-Arya nang diucap ulih bubuhan dairah barat daya India. Lalu Katumbar jadi rarampahan paiyanya dalam risip masakan warisan matan Arab duwa India. Panambayannnya, Katumbar ditamuakan di sakitaran Israil kikira tahun 6000 SM, tagal di Indunisia, Katumbar tamuat dalam kitab sansikirta rahatan 5000 SM nang dibawa ulih bubuhan India.[2]

Di Indunisia, Katumbar kada ditanam baistilah di padang luas, tagal babaya di tanam di tungkaran atawa di wadah biasa. Tagal, ada juwa dairah di Indunusia nang bakabun Katumbar, nangkaya di Boyolali, Salatiga, Temanggung, Sumatera Barat lawan dairah dataran tinggi lainnya. Katumbar nang sudah panin, biasanya dijual di pasar gasan rarampahan.[3] Tagal bigi Katumbar di Indunisia masih balum bagus maraga biaya batanam nang ganal pada hasil nang didapat, jadinya urang labih katuju maimpur matan India duwa Bulgaria.[5]

Parawakan[babak | babak asal-mulanya]

Daun Katumbar atawa daun sop

Katumbar baisi akar tunggang, bulat, bacikang wan bakalir putih. Batangnya bakayu linyak, bacuring lawan baluang nang cikangnya tadi bakalir hijau. Tangkingnya handap haja, kikira 5-10 cm. Daunnya sakali banyak, manyirip, manyalundang nang higanya bakalir hijau-hijau putih.[6]

Buahnya bulat wan bakalir hijau rahatan masih anum, lamun sudah masak baubah ka kalir kuning kacuklatan. Buahnya ngini dijamur sampai karing wan dijual. Buahnya nang kada dibarisihi kulimbitnya cagaran nangkaya sahang bantukannya.[6]

Katumbar kawa hidup di kabun di dataran randah duwa pagunungan, wan tingginya bisa sampai 1,3 m.[3]

Kagunaan[babak | babak asal-mulanya]

Daun Katumbar juwa dipakai urang Thailan gasan masakan buhannya, nang mana targantung sakahandak nang baulah masakan gasan kakuatan baunya. Pabila handak sakira ada batambah bau harum, daunnya diculup haja rahatan api dikurupi, lamunnya handak nang babau banar, daunnya ditambah ka masakan.[2]

Salaya pada jadi rarampahan, Katumbar diparcaya juwa baisian khasiat dalam hal kasihatan. Katumbar bamanpaat gasan paluruh banyu kamih, maampihi garing, manguatakan lambung, paparutan, mahancurakan cacing, manambah salira makan, tatamba gasan sakit hampadal duwa paru-paru.[6]

Jujuhutan[babak | babak asal-mulanya]

  1. ^ a b Kirana, Feby (2018-11-24). "Manfaat Ketumbar dalam Masakan dan Sejarahnya". fimela.com (dalam bahasa Indonesia). Diakses tanggal 2023-03-23. 
  2. ^ a b c Sriyono (2020-02-21). "Ketumbar dalam Bumbu Indonesia". Koran-Jakarta.com (dalam bahasa Indonesia). Diakses tanggal 2023-03-23. 
  3. ^ a b c d Hadipoentyanti, Endang; Wahyuni, Sri (2004). "Pengelompokan Kultivar Ketumbar Berdasar Sifat Morfologi" (PDF). Buletin Plasma Nutfah. 10: 32–36. 
  4. ^ "Badan Pom" (PDF). [permanent dead link]
  5. ^ Hijriah, Nurul; Filianty, Fitry; Nurhasanah, Siti (2022). "Potensi Minyak Atsiri Daun Ketumbar (Coriandrum sativum L.) sebagai Pendukung Pangan Fungsional: Kajian Literatur". Jurnal Teknotan. 16. 
  6. ^ a b c Megumi, Sarah (2020-04-14). "Ketumbar, Rempah Penyedap Masakan dan Pengobatan". Greeners.Co (dalam bahasa Indonesia). Diakses tanggal 2023-03-24.