Akomodasi

Akomodasi baisi dua artinya yaitu gasan maampah ka suatu kaadaaan wan gasan maampah ka suatu prusis. Akomodasi nang maampah ka suatu kaadaan baarti ada suatu kasaimbangan adlam pamandiran antara urang ka saikung urang atawa kalumpuk-kalumpuk manusia dalam kaitannya lawan nurma-nurma susial wan nilai-nilai susial nang ada di dalam masarakat. Lamunnya akomodasi sawagai nang maampah ka suatu prusis, baarti ihtiar-ihtiar manusia gasan mandinginakan suatu piduhal, nang sadarhananya diaartiakan sawagai ihtiar untuk kastabilan.^[1]

Gillin wan Gillin maartiakan akomodasi sawagai bantuk aartian nang dipakai ulih bubuhan ahli kaji masarakat gasan manampaiakan prusis dalam raraitan-raraitan susial nang sama artinya dalam pangartian adaptasi nang dipakai ulih bubuhan-bubuhan kaji hayat gasan maampah ka suatu prusis di mana mahluk hidup manyasuaiakan dirinya lawan andakan sakulilingnya. Malalui pamaknaan akomodasi ngini, akomodasi diampahakan ka pangartian nang sadarhananya suatu prusis di mana ada saikung urang atawa kalumpuk nang pamulannya bakalahian, tagal malakukan panyasuaian sakira bakalahian tadi jadi diatasi. Akomodasi jua sabujurnya marupakan cara sakira manuntungakan bakalahian tagal kada manyupanakan pihak musuh sahingga musuh kada kahilangan kapribadiannya.^[1]

Kada salawasan akomodasi sagawai prusis pacangan bakulihan sahibaknya. Walaupun ada danul nang stabil, tagal kamungkinan ada banih-banih bakalahian nang magun balum dituntungakan, banih-banih ngini (nang kaya sasangkaan) nang wayah di hadap pacangan maulah adanya bakalahian hanyar. Maraga ngitu, akomodasi gasan pihak-pihak tartantu mauntungakan, tagal pacangan manikin pihak nang lain, maraga adanya kambuh tangan kakuasaan-kakuasaan tartantu dalam masarakat.^[1]

Tujuan

Tujuan akomodasi balain sasuai situasi nang dihadap. Di bawah ngini marupakan babarapa tujuan akomodasi:

Gasan mangurangi bakalahian antara saikung urang ka urang lain atawa jua kalumpuk-kalumpuk urang maraga akibat beda pamahaman. Akomodasi di sini batujuan sakira mangulihakan sintesa antara kadua pandapat ngitu, sakira mangulihakan pula nang hanyar.
Malindat maladumnya bakalahian gasan pahadangan wayah.
Gasan mamungkinakan tarjadi bacaram antara kalumpuk-kalumpuk susial nang hidupnya tapisah sawagai akibat paktur susial psikulugis wan kabudayaan, nang kaya nang ditamui di masarakat mamakai sistim kasta.
Maihtiarakan palaburan antara kalumpuk-kalumpuk susial nang tapisah, nang kaya liwat bakawinan kambuhan atawaa asimilasi dalam makna nang ludang.^[1]

Bentuk-bentuk Akomodasi

Akomodasi sawagai sabuting prusis baisi babarapa bentuk, yaitu sawagai barikut:

Coercion

Coercion marupakan salah sabuting bantuk akomodasi nang prusisnya digawi maraga adanya paksaan. Coercion bantuk akomodasi nang mana salah sabuting pihak baandak dalam kaadaan nang lamah lamun dibandingakan pihak lawan. Palaksanaan ngini kawa digawi sacara fisik (sacara langsung) atawa psikologis (sacara kada langsung). Sawagai cuntuh parbudakan marupakan coercion di mana pamandiran susialnya sasuai lawan panguasaan si ambit ka budaknya. Budak dianggap kada baisi hak apa haja. Di nagara-nagara totaliter, coercion jua dijalanakan, haratan sabuting kalumpuk nang sadikit baandak di dalam masarakat wan mamingkuti kakuasaan. Hal ngini kada bamakna coercion kada pacangan mandapatakan kulihan nang baik gasan masarakat.^[1]

Compromise

Compromise marupakan bantuk akomodasi di mana pihak-pihak nang taumpat saling mangurangi tuntutannya sakira ada manuntungnya bakalahian nang ada. Sikap dasar gasan manggawi compromise adalah salah sabuting pihak maiihi gasan marasai wan mamahami kaadaan pihak nang lain wan kaitu jua pihak nang di subalah. Nang kaya traktat antara babarapa nagara, akomodasi antara babarapa partai pulitik maraga sadar bahwa baisi kakuatan surang-surang dalam suatu pamilihan umum.^[1]

Arbitration

Arbitration marupakan cara gasan manggawi compromise lamun pihak-pihak nang bahadapan kada sanggup manggawinya surangan. Bakalahian dituntungakan ulih pihak katiga nang dipilih ulih kadua balah pihak atawa ulih awak nang baisi kuasa labih tinggi matan pihak-pihak nang bakalahi, sawagai cuntuh manuntungakan piduhal buruh.^[1]

Mediation

Mediation mirip lawan arbitration maraga ada dibawai pihak katiga nang kada barat subalah dalam piduhal nang ada. Pihak katiga ngitu baisi tugas maihtiarakan bakalahian sacara damai. Kadudukan pihak sawagai tukang papadah wara, bubuhannya atawa inya kada baisi kuasa mamutusakan.

Conciliation

Conciliation marupakan ihtiar gasan manamuakan kahandak-kahandak matan pihak-pihak nang bakalahi sakira tajuhut paakuran matan kadua balah pihak. Conciliation sipatnya lamah matan pada coercion wan mambuka kasampatan gasan pihak-pihak nang taumpat gasan maadakan asimiliasi. Cuntuhnya, panitia tatap di Indunisia nang khusus bagawi manuntungakan hiwal-hiwal burah, di manada duduk wakil-wakil parusahaan, wakil-wakil buruh, wakil-wakil Departemen Tenaga Kerja wan satarusnya kusus bagawi manuntungakan piduhal-piduhal jam bagawi, tambang, hari parai, wan lain sawagainya.^[1]

Toleration

Toleration rancak dingarani tolerant-participation. Ngini marupakan akomodasi kadada paakuran nang rasmi. Takananya toleration cungul kada sadat wan kada rancanaakan maraga ada watak urang atawa kalumpuk nang malindat diri matan piduhal. Lamun di sajarah, bangsa Indunisia marupakan bangsa nang toleran nang mancubat malindat matan piduhal.^[1]

Stalemale

Stalemale marupakan akomodasi nang mana pihak-pihak nang bakalahi saimbang nang pada suatu wayah ampih bakalahian. Hal ngini maraga gasan kadua balah pihak sudah kadada kamungkinan lagi gasan maju atawa baundur. Sawagai cuntuh stalemale, ada Amirika Sarikat wan Rusia di danul nuklir.^[1]

Adjudication

Adjudication marupakan bantuk akomodasi nang manutungakan piduhal di pangadilan.^[1]

Kulihan Akomodasi

Bapanjang libar Gillin wan Gillin manjalasakan kulihan prusis akomodasi lawan manjuhut cuntuh-cuntuh matan sajarah. Antara lain kulihannya sawagai barikutː^[1]

Akomodasi, wan kakambuhan masarakat

Akomodasi wan kakambuhan masarakat hudah manyumbang gasan malindat masarakat matan banih-banih bakalahian nang pacangan maranakan bakalahian hanyar. Haratan urang-urang Normandia manguasai Inggris haratan 1066, buhannya hudah mamaksa suatu kabudayaan hanyar ka masarakat nang buhannya kuasai. Basa, sistim feodalisme, hukum, wan satarusnya diubah atawa diganti. Dalam prusis ngitu ada bakawin bakambuh wan banyak urang Inggris nang mandapat kadudukan hanyar nang tinggi. Kaadaan ngitu mangurangi jarak susial (social distance) antara panjajah lawan nang dijajah. Salihan, akomodasi jua manahan kahandak-kahandak gasan basaing nang pacangan mahabisakan duit wan tanaga wara.^[1]

Manikin bubuhan/urang subalah

Rancak basaingan digawi gasan kauntungan kalumpuk tartantu wara (nang kaya kalumpuk paulah) wan karugian kalumpuk nang lain (nang kaya kalumpuk nang manukar). Akomodasi antar golongan paulah nang pamulaannya basaing pacangan maulah turunnya harga, maraga barang wan jasa tanyaman sampai ka urang nang manukur.^[1]

Koordinasi barbagai sikap urang nang balain

Ngini talihat jalas lamunnya dua ikung, nang kaya basaing manduduki jabatan pimpinan di partai pulitik. Di dalam kampanye pamilihan, parsaingan ada wan panas, tagal imbah salah sabuting nang tapilih, rajin nang kalah dibawai gasan bacaram sakira utuh wan integrasi partai pulitik.^[1]

Paubahan lambaga-lambaga kamasarakat sakira sasuai lawan kaadaan hanyar atawa kaadaan nang baubah

Paubahan dalam kadudukan

Sabujurnya akomodasi mancungulakan panatapan hanyar ka kadudukan urang wan kalumpuk. Bakalahian hudah maulah kadudukan-kadudukan ngitu baguyang wan akomodasi manguati pulang kadudukan ngitu.^[1]

Akomodasi mambuka jalan ka ampah amiliasi

Adanya prusis asimilasi, bubuhan pihak jadi maminandui sabuting sama lain, wan cungul banih mahargai buhannya tanyaman mamaraki.^[1]

Jujuhutan

^ ^a ^b ^c ^d ^e ^f ^g ^h ⁱ ^j ^k ^l ^m ⁿ ^o ^p ^q Soekantro, Soerjono; Sulitstyowati, Budi (2019). Sosiologi Suatu Pengantar. Depok: PT RAJAGRAFINDO PERSADA. hlm. 68–72. ISBN 978-979-769-577-4.

[:0-1] ^ ^a ^b ^c ^d ^e ^f ^g ^h ⁱ ^j ^k ^l ^m ⁿ ^o ^p ^q Soekantro, Soerjono; Sulitstyowati, Budi (2019). Sosiologi Suatu Pengantar. Depok: PT RAJAGRAFINDO PERSADA. hlm. 68–72. ISBN 978-979-769-577-4.

[1]