Rumah Betang

Rumah Betang di Kabupatin Kapuas.

Rumah Betang adalah salah sabuting janis satruktur rumah adat urang Dayak nang rumahnya diangkat tumatan tanah nang mana batujuan gasan manjauhakan matan binatang-binatang nang buas wan jua banyu baah. Rumah Betang saurang diulah matan batang nang kualitasnya baik banar wan jua kada kawa dimakan rayap, kaya batang ulin nang kuat wan kawa batahan inggan ratusan tahun.

Sabarataan Suku Dayak, rancaknya badas di Rumah Betang. Babarapa suku Dayak, paulahan Rumah Betang musti mahatiakan sarat-sarat nang ada: kaandakan hulu nang harus sajajar wan arah matahari cungul lawan jua sabalah hilirnya musti sajajar jua lawan matahari tinggalam.

Halaman muka Rumah Betang rancaknya tadapat balai nang dipakai gasan manyambut urang badatang wan jua badapatan adat. Ada jua nang ngarannya Sapundu nang marupaakan paung batawas manusia wan jua baisi ukuran nang has. Sapundu ngini saurang rancaknya dipakai gasan maikat binatang-binatang gasan upacara adat.

Di padudian Rumah Betang rancaknya ada balai halus bangaran Tukau nang dipakai gasan manyimpani alat-alat bahuma nang kaya lisung atawa halu. Di padudian juwa ada wadah gasan manyimpan sanjata nang bangaran bawong. Di pamukaan wan jua padudian Rumah Betang ada jua nang ngarannya Sanding. Sanding adalah wadah gasan manyimpan tulang manulang matan bubuhan kulawarga nang sudah jangak wan jua bahabis Upacara Tiwah.

Makna wan nilai

Rumah Betang gasan masarakat Dayak kada wastu kisah lagindaris kahidupan padatuan, tagal jua sabuah panyataan tantang tata pamung disa, urganisasi susial wan jua sistim kamasarakatan wan jua titik pusat kahidupan urangnya. Rumah Betang ngini adalah pusat kabudayaan marga sabarataan parusis kahidupan balangsung di sana.

Di balik kasadarhanaan Rumah Betang, tasimpan nilai-nilai kahidupan nang unggul. Nang kada kawa bubuhan itah pungkiri adalah rumah Betang sudah manjadi simbul nang kukuh matan kahidupan kumunal masarakat Dayak.

Lawan mandiamakan Rumah Betang wan jua manjalani sabarataan parusis kahidupan di sana, manunjukakan bahua bubuhannya liwar mancintai kadamaian dalam kumunitas nang rukun. Rumah Betang manjadi wadah nang ipiktip masarakat Dayak gasan mambina satu wan lain marga balain di bawah sabuah hatap.