Putu mayang
Putu mayang adalah hidangan khas Banjar, Kalimantan Selatan, Indunisia, nang asalnya hidangan paranakan matan India wan imbah itu manyabar ka Asia Tunggara. Putu mayang rancak dimiripakan lawan puracit.[1] Wadai nangini dingarani putu mayang maraga inya lunjuran-lunjurannya nangkaya mayang maurai.[2]
Bahan utama putu mayang yaitu galapung baras, banyu santan, galapung kanji, wan gula putih. Cara maulahnya, samunyaan nitu diudak sampai rata dalam wadah nang sudah ditanggar di atas api. Imbah adunan nitu sudah likat, dibangkit tarus didinginakan.[2]
Ambil citakan putu mayang nang banyak luangnya, nang diulah matan sing atawa aluminium. Luang-luangnya nitu halus kaya talus jarum. Aduan likat tadi dipingsar ka dalam citakan, lalu kaluaran di bawah lunjuran-lunjuran putu mayang. Di bawah nitu sudah ditanai lawan daun pisang nang dipaliti minyak lamak.[2]
Putu mayang nitu diulah, satuyuknya bundar kira-kira ampat jari. Amun dirasa masih mantah, tarus dikukus sampai masak. Mamakan putu mayang musti dikuahi lawan juruh atawa banyu gula habang nang dijarang lawan santan wan ditambahi uyah sadikit.[2]
Bahan acuan
[babak | babak asal-mulanya]- ^ "Cara Membuat Puracit, Kue Putu Mayang Legit Asal Banjar". bestie.suara.com. 5 Siptimbir 2023. Diakses tanggal 21 Nupimbir 2023.
- ^ a b c d Seman, Syamsiar (2023). Wadai Banjar 41 Macam: Wadai Tradisional Ulahan Urang Banjar. Banjarmasin: Lembaga Pendidikan Banua Banjarmasin. hlm. 35–36. ISBN 978-602-96540-6-0 Periksa nilai: checksum
|isbn=(bantuan).
