Main bal

Saikung panyarang (habang) manggiring bal malangkawi dua ikung pamain balakang wan handak manyipak bal ka ampah kipar nang manjaga gawang.

Main bal (basa Indunisia: Sepak bola), adalah cabang ulahraga nang mamakai bal nang rancaknya diulah matan bahan kulimbit wan dimainakan ulih dua kalumpuk nang masing-masing baanggutaakan 11 (sawalas) urang pamain tatambaian wan babarapa pamain cadangan. Mamasuki abat ka-21, ulahraga ngini sudah dimainakan ulih labih matan 250 juta urang di 200 nagara, nang manjadiakannya ulahraga panyuhurnya di dunia. Main bal batujuan gasan mancitak gul sababanyaknya lawan mamasukakan bal ka gawang musuh. Main bal dimainakan dalam lapangan tabuka nang babantuk pasagi panjang, di atas kumpai atawa kumpai sintitis.

Sacara umum, wastu panjaga gawang haja nang baisi hak manjapai bal lawan tangan di dalam dairah gawangnya, sadangakan 10 (sapuluh) pamain lainnya dibariakan mamakai sabarataan awaknya suwalih tangan, rancaknya lawan batis gasan manyipak, dada gasan manguntrul, wan kapala gasan manyundul bal. Tim nang mancitak gul pambanyaknya di pahabisan paturaian jadi pamanangnya. Lamun sampai waktu habis masih imbang, maka kawa manggawi pangundian, pamanjangan waktu atawa jua adu pinalti, bagantung lawan bantuk panggawian paturaian. Matan sabuting paturaian rasmi, 3 puin diunjukakan gasan tim pamanang, 0 puin gasan tim nang kalah wan masing-masing 1 puin gasan dua tim nang bamain imbang. Saupama damintu, pamanang sabuting paturaian bal kawa diupauakan sawayah-wayah atas skandal wan tindakan kariminal nang tabukti di lain hari. Sabuting laga main bal kawa dimanangakan sacara utumatis ulih sabuting tim lawan 3-0 lamun tim musuh singhaja bahandasut matan paturaian (Walk Out).

Paraturan paturaian sacara awam dihanyari saban tahunnya ulih indung urganisasi sipak bal antarabangsa (FIFA), nang jua manggawi Piala Dunia saban ampat tahun sakali.