Bibinian

Tumatan Wikipidia basa Banjar, insiklupidia bibas
Malacung ka napigasi, gagai
Lambang planét Vénus nang dipakay jua gasan lambang binian

Bibinian/bebinian/babinian atawa binian atawa bibini/bini-bini adalah salah satu janis kalamin nang ada pada manusia, janis kalamin nang sabutingnya lagi adalah lalakian.

Lamun di dalam Bahasa Inggris, ada bida antara istilah bibinian nang sudah akil balig lawan bibinian nang masih kakanakan. Kakanakan binian dikiaw lawan istilah girl, mun nang sudah ganal wan liwat akil balig dikiaw woman. Lamun dalam Bahasa Banjar bibinian nang masih dadaraan disambat diang.

Bibinian itu istilah gasan manusia haja, mun gasan binatang dipakay istilah batina.

Ciri-ciri kalamin sékundér[babak | sunting sumber]

Gambar manusia bibinian nang ada di plakat Pioneer 11

Manusia manunjukakan parbidaan bantuk awak antara lakian lawan binian nang kadada hubungan langsung lawan kamampuan barkambang-biak, tagal kabanyakan ciri-ciri ini ada hubungannya lawan sarana daya tarik séksual.

Ada kecenderungan awak lakian labih ganal atawa labih tinggi panjang daripada awak bibinian. Tagal ini kada kawa dipukul-rata. Ada jua lalakian nang héndép, wan bibinian gin ada jua nang pancaw.

Di bawah ini ada setabul ciri-ciri sékundér manusia bibinian, nang didapatakan wayah kakanakan bibinian ma'alami akil balig atawa jua kawa jua didapat imbah inya tuha:

  • Tumbuh rambut sakitar alat kalamin wan katiak.
  • Pinggul bamagin libar
  • Ma'alami datang bulan
  • Buah dada bamagin mancungul
  • Kulimbit bamagin mulus

Sistim kambang-biak[babak | sunting sumber]

Anatomi alat kelamin bibinian

Lamun diitihi matan sudut ilmu hayat, organ kelamin bibinian wanita nang bahubungan lawan sistim kambang-biak, sedangkan ciri-ciri kalamin sékundér nang bahubungan lawan maharagu anak, atawa dalam sepalih kabudayaan gasan manarik kancaan. Ovarium (indung hintalu), salain baisi fungsi biasa gasan mahasilakan hormon, mahasilkan jua gamét bini-bini nang bangaran ovum (hintalu) nang bila dibuahi ulih gamét laki-laki (spérma), kawa mahasilakan anak. Utérus (rahim) adalah organ lawan jaringan nang malindungi wan ma'ingu parkambangan janin wan otot gasan mangaluarakan janin itu wayah malahirakan. Vagina (puki) diguna'akan dalam parkawinan wan malahirakan (urang rancak salah manyambat vagina, padahal nang dimaksud'akan bisa ada vulva atawa alat kalamin binian luar kaya labia, kalantit, wan urétra bini-bini). Buah dada baévolusi matan kelenjar paluh jadi mahasilakan banyu susu, sékrési bagizi nang mambida'akan mamalia lawan janis satua lain.