Capil ka isi

Abdoel Moeis Hassan

Tumatan Wikipidia Banjar, kindai pangatahuan
Abdoel Moeis Hassan
Abdoel Moeis Hassan
Gubernur Kalimantan Timur ke-2
Masa jabatan
10 Agustus 1962 – 14 September 1966
PandahuluAPT Pranoto
PanggantiSoekadio
Informasi pribadi
Diranakakan2 Juni 1924
Samarinda, Hindia Belanda
Jiun21 Nupimbir 2005 (umur 81)
Jakarta, Indonesia
Partai pulitikPartai Nasional Indonesia (1950-1970)
PasanganFatimah
AnakZulchadriansyah
Julian Anwarie
Taufik Siradjudin
Chaidir Aulia
Farid Hamdi
Olvia Afiaty
Johny Janwarie
KawitanMohammad Hassan (ayah)
Asiah (ibu)
MamarinaMohammad Saleh (kakek) Muhammad Syarkawie Hassan (adik)
ProfesiPolitisi

Haji Abdoel Moeis Hassan (diranakakan di Samarinda, 2 Juni 1924 – habis umur di Jakarta, 21 Nupimbir 2005 pas umur 81 tahun) adalah saikung tokoh pamuda pargarakan kabangsaan di Samarinda pas masa 1940–1945 wan pamimpin parjuangan diplomasi pulitik gasan kamardikaan Republik Indonesia di wilayah Kalimantan Timur rahatan 1945–1949. Mulai anum, inya rancak maumpati aktivitas pargarakan kabangsaan di Samarinda wan balajar masalah politik pas A.M. Sangadji. Pas tahun 1940, inya maualah Roekoen Pemoeda Indonesia (Roepindo) wan jadi kapala ahuinya. Lawan A.M. Sangadji, inya maulah lambaga pendidikan bangaran Balai Pengadjaran dan Pendidikan Ra'jat pas tahun 1942. Inya bagabung dalam Panitia Parsiapan Panyambutan Kamardikaan Republik Indonesia (P3KRI) gasan manjadiakan Proklamasi Negara Indonesia di Samarinda tahun 1945 wan maulah Ikatan Nasional Indonesia (INI) Cabang Samarinda nang batujuan manentang panjajahan Walanda di Samarinda satahun imbahnya. Tahun 1947 inya jadi katua Front Nasional sabagai kongsi organisasi nang mandukung RI wan manentang federasi nang diulah Walanda.

Pahabisan tahun 1949, lawan buhan Front Nasional, inya manuntut buhan pamarintah lokal gasan kaluar pada Republik Indonesia Serikat (RIS) wan bagabung duwa RI-Yogya. Tuntutannya tacapai lawan bagabungnya Keresidenan Kalimantan Timur ka wilayah RI rahatan 10 April 1950. Inya ma'adaakan Kongres Rakyat Kaltim pas 1954 minta diulahakan Provinsi Kalimantan Timur sakira pambangunan kawa babagus. Tahun 1956, pamintan dikabulakan pas 9 Januari 1957 Kaltim rasmi jadi provinsi. Tahun 1960, inya jadi Katua Komisi Gabungan di DPR Gotong Royong nang baisi tugas manuntungakan RUU Pokok Pemerintahan Daerah wan RUU Pokok Agraria.

Tahun 1962, sidin jadi Gubernur Kalimantan Timur kadua. Pada tahun 1964, sidin maindahakan usaha panyalukutan keraton Kutai ulih massa wan tantara suruhan Panglima Kodam IX Mulawarman. Tahun 1966, sidin ampih jadi Gubernur wan jadi pagawai di Departemen Dalam Negeri di Jakarta. Tahun 1968 sampai 1970, sidin baasa jadi angguta DPR RI mawakili PNI.

Tahun 1976, sidin pansiun matan PNS wan turun tangan di bidang sosial kamasyarakatan lawan manulis artikal wan buku sampai 2004 wan maninggal dunia pada 2005 dalam umur 81 tahun. Tahun 2018, sabuting rumbung pamarhati sajarah nang independen maajuakan usulan calon Pahlawan Nasional Abdoel Moeis Hassan kapada Wali kota Samarinda. Buhan sajarawan akademis dalam Seminar Nasional 2019 manilai Abdoel Moeis Hassan kawa diusulakan ka pamarintah pusat sawagai Pahlawan Nasional.

Kulawarga wan pandidikan

[babak | babak asal-mulanya]

Abdoel Moeis Hassan adalah urang Banjar. Sidin anak kalima matan Mohammad Hassan, yakni saurang tokoh Syarikat Islam Samarinda wayah pargarakan kabangsaan. Kai sidin, matan abah, bangaran H. Mohammad Saleh nang baasal matan Amuntai, Kalimantan Selatan. Lawan, kai-nini matan uma sidin baasal matan Banjarmasin.[1]

Pas umur 5 tahun, Abdoel Moeis Hassan basakulah di Meisje School nang diulah Aminah Sjoekoer lawan laki sidin, Mohammad Jacob. Sidin dapat ijazah MULO matan Instituut Het Zonnig Land. Salain nitu, sidin jua baisi ijazah Boekhouding A wan B jua manamatakan Hollandsch-Inlandsche School (HIS) di Sungai Pinang, Samarinda. Pandidikan politik sidin didapat matan A.M. Sangadji, saurang tokoh Pergerakan Penyadar eks PSII lawan H. Agus Salim pada masa penjajahan Belanda.[2]

Wayah tahun 1944, dalam usia 20 tahun, Abdoel Moeis Hassan manikah lawan Fatimah, nang taanum ampat tahun pada sidin.[3] Sidin lawan Fatimah dikaruniai anam anak lakian wan saikung binian.[4] Sidin baisi ading indung bangaran Muhammad Syarkawie Hassan nang jadi Ketua Umum Pengurus Besar Persatuan Dokter Gigi Indonesia periode 1982-1988 serta Ketua Majelis Kehormatan wan Penasihat Pengurus Besar PDGI periode 1988-2003.[5]

Marga hidup sazaman lawan Inche Abdoel Moeis wan gasan malainakan kaduanya, uurang mangiyau Abdoel Moeis Hassan lawan galaran "Moeis Kecil" sadangkan I.A. Moeis lawan "Moeis Tinggi". Hal ngini badasarakan laiannya postur antara kaduanya.[6]

Kiprah

[babak | babak asal-mulanya]

Parjuangan wan politik

[babak | babak asal-mulanya]
Abdoel Moeis Hassan wayah 17 Agustus 1949.
Moeis Hassan (duduk di muka, katiga matan kanan) dalam rangka Konferensi INI ka-3 di Samarinda pada 7–8 Desember 1949.
Moeis Hassan wayah paandakan batu panambaian Tugu 40 Tahun Kebangunan Nasional wayah 20 Mei 1948.

Pada Mei 1940, Abdoel Moeis Hassan menggagas pambantukan organisasi kapamudaan nang bahaluan kabangsaan bangaran Roepindo (Roekoen Pemuda Indonesia).[7] Wayah baumur 18 tahun, inya lawan A.M. Sangadji maaktifakan Neutrale School jadi Balai Pengadjaran dan Pendidikan Rajat (BPPR) pada 1942.[8]

Imbah Republik Indonesia memproklamasikan kamardikaan 17 Agustus 1945, pahadangan Samarinda wan Kalimantan Timur balum bagabung lawan Republik Indonesia, inya bagabung dalam Gerakan Dr. Soewadji nang marancanaakan proklamasi kamardikaan di Samarinda.[9]

Imbahnya, sidin bajuang limpua jalan pargarakan diplomasi dalam wadah partai politik lokal bangaran Ikatan Nasional Indonesia (INI) wan koalisi organisasi bangaran Front Nasional. Tahun 1946 sidin maulah INI cabang Samarinda.[10] Pada tahun 1947, sidin ditunjuk INI jadi ketua Front Nasional. Kadua organisasi nang bamarkas di Gedung Nasional Samarinda nitu manyataakan sikap mandukung Negara Republik Indonesia wan manantang pandudukan Walanda di Indonesia.[11] Sikap ini batolak balakang lawan ampat kasultanan nang ada di Keresidenan Kalimantan Timur, nang hakun mamilih bagabung dalam Pemerintah Federasi Kalimantan Timur ulahan Gubernur Jenderal Hindia Belanda, Hubertus Johannes van Mook.[12]

Federasi Kalimantan Timur suah manawarakan kadudukan sawagai delegasi dalam Bandung Federale Conferentie (BFC), yakni Konferensi Federal Bandung nang digagas Van Mook. Tagal, sidin mangindahakan marga konsekuen lawan sikap politik organisasi parjuangannya nang nonkooperatif atawa kada hakun bagawi baimbai lawan Walanda wan nang maumpati.[13]}

Jujuhutan

[babak | babak asal-mulanya]
  1. ^ Hassan 1994, hlm. 191.
  2. ^ Hassan 1994, hlm. 192.
  3. ^ Sarip 2018, hlm. 19.
  4. ^ Sarip 2018, hlm. 91.
  5. ^ Hassan 2004, hlm. 360.
  6. ^ Sarip 2017, hlm. 146.
  7. ^ Hassan 1994, hlm. 14.
  8. ^ Hassan 1994, hlm. 51.
  9. ^ Sanusie 1984, hlm. 44.
  10. ^ Hassan 1994, hlm. 221.
  11. ^ Hassan 1994, hlm. 222.
  12. ^ Penyusun 1992, hlm. 114.
  13. ^ Pardede 2018, AM Hassan Diusulkan.

Bahan acuan

[babak | babak asal-mulanya]
  • Sanusie, M. Djunaid, dkk (1984). Secercah Perjuangan BPRI Bn. VIII Brig. “S” Div. VI (NAROTAMA) di Samarinda. Samarinda: Pemda Kalimantan Timur. 
  • Sejarah Pemerintahan di Kalimantan Timur dari Masa ke Masa. Samarinda: Pemerintah Provinsi Daerah Tingkat I Kalimantan Timur. 1992. 
  • Hassan, A. Moeis (1994). Ikut Mengukir Sejarah. Jakarta: Yayasan Bina Ruhui Rahayu. 
  • Sarip, Muhammad (2017). Samarinda Tempo Doeloe Sejarah Lokal 1200–1999. Samarinda: RV Pustaka Horizon. ISBN 978-602-60453-4-8. 
  • Sarip, Muhammad (2018). Moeis Hassan dalam Sejarah Perjuangan dan Revolusi di Kalimantan Timur. Samarinda: RV Pustaka Horizon. ISBN 978-602-5431-22-7. 
  • Pardede, Doan E. (4 Agustus 2018). Januar Alamijaya, ed. "AM Hassan Diusulkan Jadi Pahlawan Nasional dari Kaltim, Ini Sosok dan Perjuangannya". Tribun Kaltim Online. Diakses tanggal 8 Agustus 2018. 
Dijumput matan "https://bjn.wikipedia.org/w/index.php?title=Abdoel_Moeis_Hassan&oldid=98240"