Tumbung:Habar Banua Banjar

BAKAS HUKUMAN KAWA BACALUN JADI ANGGUTA DPD RI

TVRI Kalsel, Banjarmasin -- Bakas hukuman kawa bacalun jadi angguta DPD RI, asal sudah kaluar pada panjara paling kada lima tahun. KPU Prupinsi Kalimantan Selatan mamadahakan aturan sagan calun angguta DPD RI, manyarui bubuhan ormas, wakil warga wan partai pulitik, tamasuk nang handak bacalun jadi angguta DPD RI.

Ujar Katua KPU Prupinsi Kalimantan Selatan, Mirhan A.M., sasuai aturan, urang nang suwah dihukum panjara kawa haja bacalun jadi angguta DPD RI, asal sudah lima tahun kaluar pada panjara. Lain pada itu, tuntutan hukumannya kada labih pada lima tahun jua.

Dilihat nyamannya aturan bacalun jadi angguta DPD RI ni, warga musti itih mamilih. Ujar paribasa, “Apik-apik mamilih, kaluku tapilih bangkung”. Maginnya kaina calun nang sagan angguta DPD RI matan Prupinsi Kalimantan Selatan. Jangan sampai kaina warga tapilih ngaran, atawa tapilih nang banyak duit haja -- tagal, imbah jadi, kada mambawa kamaslahatan jua sagan banua. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 31 Maret 2013, Pukul 5 kamarian. TVRI Kalimantan Selatan, mahabarakan.)

[[Tumbung:BAKANTAN JADI TANDA PORWANAS XI DI BANUA TVRI Kalsel, Banjarmasin -- Bakantan tapakai pulang sagan tanda Porwanas nang ka-11 di Banjarmasin, 4-11 Saptimbir 2013 dihadap. Tanda Porwanas ni ditapung tawari wayah HPN wan Milad PWI di Mahligai Pancasila, Banjarmasin. Wakil Hubnur Kalimantan Selatan, Rudy Resnawan, wan Katua Umum PWI Pusat, Margiono, manguyak bungkusan pigura bagambar bakantan, nang jadi tanda Porwanas ka-11.

Katua PWI Kalimantan Selatan, Fathurahman, mangaku, mulanya ngalih jua mamilih tanda sagan Porwanas ka-11 ni. Bakantan suwah jua dipakai sagan tanda Porwanas di Banjarmasin. Tagal, bakantan nang sagan tanda Porwanas ka-11 ni lain jua lawan bakantan nang tadahulu. Bakantan nang ada ni balaung, basalimpang wan babaju sasirangan.

Muha bakantan nang takurihing jadi tanda, PWI Kalimantan Selatan yakin wan siap jadi puhun gawi nang baik sagan 3.500 wartawan Indunisia nang cagar datangan ka banua. Lain pada baadu ulah raga, bubuhan wartawan cagar bakongres atawa bamuzakarah. (*) [ysas]

(“Habar Banua”, TVRI Kalimantan Selatan, Banjarmasin. Siaran Ahad, 7 April 2013, Pukul 5 kamarian. Ratna Sari Dewi, Yusar Wardana, TVRI Kalimantan Selatan, mahabarakan.)]]