Syamsudin Noor

Kapitan Udara (Anumerta) Muhammad Syamsudin Noor (diranakakan di Alabio, Hulu Sungai Utara, Kalimantan Selatan, 5 Nupimbir 1924 – habis umur di Gunung Galunggung, Jawa Barat, 26 Nupimbir 1950 pas umur 26 tahun) adalah urang parwira TNI-AU. Ngaran sidin wahini diabadikan di Lanud Syamsudin Noor, Banjarbaru, Kalimantan Selatan.

Parjalanan hidup

Sjamsudin adalah putra Kalimantan nang diranakakan di Kuta Alabio, Kabupaten Hulu Sungai Utara, Kalimantan Selatan. Sidin marupakan anak katalu matan anam badingsanak tiba Abah H. Abdul Gaffar Noor - Pansiunan Kyai bakas Kapala Federasi Kalimantan Tenggara wan Uma Hj. Putri Ratna Willis (trah Karajaan Pulau Laut). Wayah tahun 1932 masuk sakulah H.I.S di Batavia ( wayahini Jakarta ) lulus H.I.S wayah tahun 1939 manarusakan pandidikan M.U.L.O di Bogor, Jawa Barat. Pandidikan Mulo salawas 3 tahun, bujurannya wayah tahun 1942 wan tamat matan M.U.L.O imbah ngitu batarus pulang sakulah di A.M.S nang ada di Yogyakarta, Jawa Tengah wan lulus wayah tahun 1945.

Imbahnya tamat matan pandidikan umumnya, di AMS Yogyakarta, Muhammad Syamsudin Noor nang masih anum asa takiau diri sidin gasan umpat ka dunia kamilitiran bagian udara, imbahnya wayah tahun itu juwa sidin manarusakan pandidikan pulang di Militarie Academie (MA) Yogyakarta salawas satu tahun. Parhatan tahun 1946 lulus matan sakulah Akademi Militer, nang imbahnya manarusakan sakulah kajuruan panarbangan Yogyakarta sampai tahun 1947.

Batujuan sakira maningkat kamampuan sidin digawiannya, sidin umpat pulang Pandidikan wan latihan Panarbangan Pasawat Udara di India wan Burma salawas matan 1947 sampai ka tahun 1950. Di Burma, sidin jadi pilot pasawat wayah panarbangan Indonesian Airways.

Gugur

Imbahnya bulik matan Burma wayah tahun 1950, Letnan Udara I Syamsudin Noor manarbangakan pasawat Dakota T-446 anggit AURI di Lapangan Udara Andir, Bandung, sampai musibah manimpa sidin wayah batugas panarbangan matan Lapangan Udara Andir ampah ka Tasikmalaya. Musibah ngini kajadian wayah hari minggu, 26 Nupimbir 1950 kikira jam 17.00 WIB, marga masin ada nang takang ditambah cuaca kada bagus di langit di sakulilingan Gunung Galunggung, Jawa Barat. Pasawat nang sewang maliaung bakajutan marumpak Cadas dinding gunung dilereng Gunung Galunggung nang andakannya kukurang labih 15 Km di higa tanggara Malang Bong (Kacamatan Ciawi, Tasikmalaya). Sidin gugur sawagai kusuma bangsa, wan dianggap sawagai saurang palupur gasan kalahiran “ Indonesian Airways “. Sidin dimakamkan lawan Upacara militir di Taman Makam Pahlawan Cikutra, Bandung wayah tanggal 29 Nupimbir 1950 diiringi panimbakan Salvo lawan jua batabur kambang lawan kakawalan panarbang matan pasawat Capung nang malalui di atas Taman Makam Pahlawan.

Pranala luar

• (Bahasa Indonesia) Silsilah Syamsudin Noor