Capil ka isi

Sambahyang Duha

Tumatan Wikipidia Banjar, kindai pangatahuan

Sambahyang Duha (Arab: صلاة الضحى) ialah sambahyang sunah nang digawi saurang Muslim wayah waktu Duha. Waktu Duha ialah wayah matahari mula'i naik kikira 7 hasta matan cungulnya (kikira jam anam atawa pitu baisukan) sampai zuhur.[1] Jumlah rakaat sambahyang Duha minimal 2 rakaat wan maksimal 12 rakaat, jua digawi dalam satuan 2 rakaat sakali salam.

Sambahyang Duha tamasuk sambahyang sunah nang dianjurakan (disambat sunah muakad)[2] gasan digawi imbah matahari tarbit wan mula'i tarasa panas manggantang. Waktu nang tatambaian banar gasan manggawi sambahyang ngini ialah sakitar jam 9 pagi. Tagal umumnya, waktu sambahyang ngini dimula'i sakitar jam 7, wan barahir handak waktu sambahyang Zuhur sakitar jam 11.[3][4]

Kautamaan

[babak | babak asal-mulanya]

Kautamaan nang didapat wan dirasaakan ulih urang nang manggawi sambahyang Duha ialah jadi sadakah matan tubuh saurang, diampuni dusa saurang[5], wan kawa malapangakan dada dalam sabarataan hal napalagi hal rajaki, karana banyak urang nang talibat dalam hal ngini.[1][6]

Di antara kautamaan lain jua nang kawa disambat gasan urang nang manggawi sambahyang Duha ialah:[6][7][8]

  • Maumpati sunah Rasulullah sawagai wasiat lawan Abu Hurairah ra.;
  • Jadi saurang nang barasih matan dusa sampai kayanya du'a nyaman dikabulakan;
  • Sabarataan kabutuhan inya di dunia akan dicukupakan ulih Allah;
  • Jadi urang nang kada tamasuk kalangan nang lalai;
  • Sambahyang ngini kawa dianggap sawagai sambahyang Awwabin;
  • Diulahan rumah atawa istana di surga kaina;
  • Mandapatakan pahala kaya urang nang naik haji wan umrah.

Hadits Tarait

[babak | babak asal-mulanya]

Ada Hadits-Hadits Rasulullah tarait sambahyang Duha, antara lain:[1][9][10]

  • "Barang siapa sambahyang Duha 12 rakaat, maka Allah akan maulahakan gasan inya istana di surga." (HR. Tirmidzi wan Ibnu Majah)
  • "Siapa jua nang manggawi sambahyang Duha lawan santai, maka akan diampuni dusa-dusanya ulih Allah, biar dusa ngitu sabanyak buih di lautan." (HR. Tirmidzi)
  • Matan Ummu Hani ra., Rasulullah sambahyang Duha 8 rakaat, wan basalam saban dua rakaat. (HR. Abu Dawud)
  • Matan Zaid bin Arqam ra. baucap, "Nabi saw. kaluar ka masarakat Quba wan bubuhannya lagi sambahyang Duha." Inya basabda, "Sambahyang Awwabin (Duha) barahir sampai panas manggantang (tangah hari)." (HR. Ahmad, Muslim, wan Tirmidzi)[11]
  • Rasulullah basabda di dalam Hadits Qudsi, Allah bapirman, “Wahai anak Adam, jangan sakali-kali pian kulir manggawi ampat rakaat sambahyang Duha, karana lawan sambahyang ngitu, Ulun cukupakan kabutuhan buhanmu wayah kamarianan harinya.” (HR. Hakim wan Thabrani)
  • "Barang siapa nang masih badiam saurang di masigit atawa tampat sambahyangnya imbah sambahyang Subuh karana manggawi itikap, bazikir, wan manggawi dua rakaat sambahyang Duha lawan jua kada bapandiran, kacuali kabaikan, maka dusa-dusa inya akan diampuni biar banyaknya malabihi buih-buih di lautan." (HR. Abu Dawud)
  • Matan Abi Dzar ra. matan Nabi saw., Inya basabda, "Saban pagi ada kawajipan gasan basadakah saban parsandian (ruas). Saban tasbih ialah sadakah, saban tahlil ialah sadakah, saban takbir ialah sadakah, wan maanjurakan kabaikan jua mancigah kamungkaran ngitu sadakah. Cukup haja manggantiakan sabarataan ngitu lawan dua rakaat sambahyang Duha." (HR. Muslim)
  • Matan Abu Darda ra., inya baucap: "Kasayangan ulun Rasulullah mambarii tiga hal nang kada akan ulun tinggalakan salawas ulun masih hidup, yaitu bapuasa tiga hari saban bulan, sambahyang Duha, wan supaya ulun kada guring sabalum manggawi sambahyang Witir." (HR. Muslim)[12]

Du'a Sambahyang Duha

[babak | babak asal-mulanya]

Umumnya, du'a imbah sambahyang Duha kawa mamakai du'a barang haja. Imbah suah jua tacatat Nabi saw. baistigfar imbah sambahyang Duha wan dilanjutakan lawan du'a lain.[13] Tapi, ada du'a nang rancak dibaca atawa dianjurakan gasan dibasa imbah sambahyang Duha ngitu. Du'a nang dibaca, yaitu:[9]

اَللهُمَّ اِنَّ الضُّحَآءَ ضُحَاءُكَ، وَالْبَهَاءَ بَهَاءُكَ، وَالْجَمَالَ جَمَالُكَ، وَالْقُوَّةَ قُوَّتُكَ، وَالْقُدْرَةَ قُدْرَتُكَ، وَالْعِصْمَةَ عِصْمَتُكَ. اَللهُمَّ اِنْ كَانَ رِزْقَى فِى السَّمَآءِ فَأَنْزِلْهُ وَاِنْ كَانَ فِى اْلاَرْضِ فَأَخْرِجْهُ وَاِنْ كَانَ مُعَسَّرًا فَيَسِّرْهُ وَاِنْ كَانَ حَرَامًا فَطَهِّرْهُ وَاِنْ كَانَ بَعِيْدًا فَقَرِّبْهُ بِحَقِّ ضُحَاءِكَ وَبَهَاءِكَ وَجَمَالِكَ وَقُوَّتِكَ وَقُدْرَتِكَ آتِنِىْ مَآاَتَيْتَ عِبَادَكَ الصَّالِحِيْنَ

Baarti: "Ya Allah, sabujurnya waktu Duha ngitu ialah waktu Duha Pian, kaagungan ngitu ialah kaagungan Pian, kabungasan ngitu ialah kabungasan Pian, kakuatan ngitu ialah kakuatan Pian, parlindungan ngitu ialah parlindungan Pian. Ya Allah, jaka rajaki masih di atas langit, maka gugurakanlah, jaka masih di dalam bumi, maka kaluarakanlah, jaka masih ngalih, maka nyamanakanlah, jaka haram, maka barasihakanlah, jaka masih jauh, maka parakakanlah. Barakat waktu Duha, kaagungan, kabungasan, kakuatan, wan kakuasaan Pian, limpahakanlah lawan kami sabarataan nang hudah Pian limpahakan lawan hamba-hamba Pian nang salih."

  • Dalam Fatwa Mufti Markaz Al-Fatawa Asy-Syabkah Al-Islamiyah, Dr. ‘Abdullah Al-Faqih, Fatwa numur 53488, 1 Sya’ban 1425, ditarangakan:

Du’a Duha nang kaini (“Allahumma innadhuha dhuha-uka, wal bahaa baha-uka, wal jamala jamaluka, wal quwwata quwwatuka, wal qudrota qudrotuka, wal ‘ismata ‘ismatuka ...") kada ditamui dalam barbagai kitab nang masandarakan du'a ngini sawagai Hadits matan Nabi Muhammad saw. Du'a kaitu ditulis ulih Asy-Syarwani dalam Syarh Al-Minhaj, wan Ad-Dimyathi dalam I’anatuth Tholibin, tapi du'a ngini kada disambat sawagai Hadits.

Surah-Surah nang Baik Banar Dibaca

[babak | babak asal-mulanya]

Ada babarapa surah nang baik banar dibaca wayah sambahyang Duha ialah:[1][14]

Surah nang disunahakan banar wayah sambahyang Duha, yaitu:[15]

  • Rakaat awal disunahakan mambaca Asy-Syams; wan
  • Rakaat kadua disunahakan membaca Ad-Dhuha.[16]

Gasan rakaat imbahnya:[17]

  • Saban rakaat awal disunahakan membaca Al-Kafirun; wan
  • Saban rakaat kadua disunahakan membaca Al-Ikhlas.[18]

Manfaat nang Didapat

[babak | babak asal-mulanya]

dr. Ebrahim Kazim, saurang duktur, panaliti, wan diriktur matan Trinidad Islamic Academy manyataakan, garakan taratur matan sambahyang kawa manguatakan utut lawan tindunnya, sindi, jua baipik baik banar lawan sistim kardiuvaskular.

Napalagi sambahyang Duha kada gasan manyiapakan saurang mahadapi hari lawan rangkaian garakan taraturnya haja, tapi jua manangkalakan sitris nang kayanya cungul dalam kagiatan saban hari, sasuai lawan katarangan dr. Ebrahim Kazim tarait sambahyang, "Ada tagang nang hilang karana tubuh sacara fisiulugis mangaluarakan zat-zat, kaya inkifalin, indurfin. Zat ngini samacam murfin, tamasuk upiati. Ipik kaduanya jua kada babida lawan upiati lain. Bidanya, zat ngini alami, dipruduksi saurang ulih tubuh, sampai labih bamanfaat wan takuntrul.

Ada jua manfaat gasan urang nang manggawi sambahyang Duha, yaitu:[19]

Daptar Buku

[babak | babak asal-mulanya]
  • Azzet, Ahmad Muhaimin (2010). 7 Cara agar Rezeki Semakin Bertambah dan Barakah. Yogyakarta: Diva Press. ISBN 978-602-955-504-2.
  • Ghazali, Imam (2008). Bertambah Kaya Lewat Shalat Dhuha. Mitra Press. ISBN 978-979-17230-1-5.
  • Rifai, Moh (2010). Risalah Tuntunan Shalat Lengkap. Semarang: Karya Toha Putra.

Jujuhutan

[babak | babak asal-mulanya]
  1. 1 2 3 4 "Doa Sholat Dhuha Dan Terjemahnya - Keajaiban Do'a !!" (dalam bahasa Inggris). 2018-09-06. Diakses tanggal 2026-03-03.
  2. ↑ "Sholat Dhuha: Keutamaan, Tata Cara, dan Doa". BAZNAS Indonesia (dalam bahasa Indonesia). 2025-05-02. Diakses tanggal 2026-03-03.
  3. ↑ "Waktu Terbaik untuk Salat Dhuha dan Jam Haram Mengerjakannya". Jatimtimes.com (dalam bahasa Indonesia). Diakses tanggal 2026-03-03.
  4. ↑ Kristina. "Apakah Boleh Sholat Dhuha 15 Menit sebelum Dzuhur?". detikhikmah (dalam bahasa Indonesia). Diakses tanggal 2026-03-03.[permanent dead link]
  5. ↑ Kosmos, Pusti (2024-06-06). "Panduan Lengkap: Tata Cara Sholat Dhuha". Program Studi S1 Administrasi Bisnis (dalam bahasa Indonesia). Diakses tanggal 2026-03-03.
  6. 1 2 Cantika, Yufi. "Tata Cara Sholat Dhuha: Keutamaan dan Doa Setelah Sholat Dhuha" (dalam bahasa Indonesia). Diakses tanggal 2026-03-03.
  7. ↑ Yasmin, Puti. "9 Keutamaan dan Manfaat Sholat Dhuha, Lancar Rezeki Hingga Urusan Dunia". detiknews (dalam bahasa Indonesia). Diakses tanggal 2026-03-03.[permanent dead link]
  8. ↑ "Ini Keutamaan Shalat Dhuha: Memohon Rezeki, Sedekah Persendian". BAZNAS Indonesia (dalam bahasa Indonesia). 2025-09-17. Diakses tanggal 2026-03-03.
  9. 1 2 "Cara, Niat, dan Doa Shalat Dhuha". al-badar.net (dalam bahasa Inggris). Diakses tanggal 2026-03-03.
  10. ↑ Maharani, Berliana Intan. "Berapa Rakaat Sholat Dhuha yang Dianjurkan Rasulullah SAW?". detikhikmah (dalam bahasa Indonesia). Diarsipkan dari versi asli tanggal 2023-07-03. Diakses tanggal 2026-03-03.
  11. ↑ "Waktu Sholat Dhuha, Penjelasan dan Dalilnya" (dalam bahasa Indonesia). 2021-04-03. Diakses tanggal 2026-03-03.
  12. ↑ Kristina. "Apakah Boleh Sholat Dhuha 15 Menit sebelum Dzuhur?". detikhikmah (dalam bahasa Indonesia). Diakses tanggal 2026-03-03.[permanent dead link]
  13. ↑ Ghazali, Imam (2008). Bertambah Kaya Lewat Shalat Dhuha. Mitra Press. hlm. 106. ISBN 978-979-17230-1-5.
  14. ↑ Halimatussyadiyah (2022-01-07). "Kapan Batas Waktu Sholat Dhuha Agar Rezeki Mujur?" (dalam bahasa Inggris). Diakses tanggal 2026-03-03.
  15. ↑ Ghazali, Imam (2008). Bertambah Kaya Lewat Shalat Dhuha. Mitra Press. hlm. 98–101. ISBN 978-979-17230-1-5.
  16. ↑ Rifai, Moh. (2010). Risalah Tuntunan Shalat Lengkap. Semarang: Karya Toha Putra. hlm. 85.
  17. ↑ Ghazali, Imam (2008). Bertambah Kaya Lewat Shalat Dhuha. Mitra Press. hlm. 101–103. ISBN 978-979-17230-1-5.
  18. ↑ "Apakah Ada Bacaan Surat Tertentu dalam Shalat Dhuha?". Rumaysho.Com (dalam bahasa Indonesia). Diarsipkan dari versi asli tanggal 2014-10-06. Diakses tanggal 2026-03-03.
  19. ↑ "Pengertian, Manfaat, Keutamaan dan Do'a Sholat Dhuha". SMA Muha Pangandaran (dalam bahasa Indonesia). Diakses tanggal 2026-03-03.
  20. ↑ "Niat & Tata Cara Shalat Dhuha serta Manfaatnya". www.bankmuamalat.co.id. Diakses tanggal 2026-03-03.
Dijumput matan "https://bjn.wikipedia.org/w/index.php?title=Sambahyang_Duha&oldid=110042"