Sakban

Sakban ialah bulan kawalu dalam pananggalan Hijriah. Ngaran Sakban nang baarti pamisahan, disambat damintu maraga urang-urang Arab bapancar wan bapisah wayah bulan ngini gasan bagagai banyu wan padang rumput. Salain ngitu, bubuhannya rancak bapancar gasan panyarangan atawa panyarbuan imbah manahan saurang matan paparangan salawas bulan Rajap, bulan nang tamasuk disucikan.

Dalam arti lain, Sakban matan kuya Syi'ab nang baarti di atas gunung. Maksudnya, Sakban marupakan puncak gasan mambanyaki amal ibadah supaya mambarasihi hati wan jiwa sabalum Ramadan datang supaya labih masak, wan nginilah nang disambat bulan pasiapan sabalum bulan bapuasaan nang wajib.

Sakban ialah salah sabuting bulan nang hibak barakatnya dalam almanak Islam, nang mana inya dihimpit lawan dua bulan mulia, yaitu Rajap wan Ramadan, wan sagawai pananda akan datang bulan bapuasaan. Takadang bulan ngini rancak dilupakan, tagal inya baisi kautamaan nang ganal banar wan jadi waktu nang pas gasan umat Islam manyapakan saurang sacara spiritual manyambut bulan suci imbahnya.

Paristiwa

Paristiwa-paristiwa nang ada pas bulan Sakban ngini ialah:

• Paubahan arah kiblat matan Baitul Maqdis ka Kakbah di Makkah pas tahun ka-2 Hijriah;
• Turunnya parintah kawajiban bapuasa di bulan Ramadan, nang jadi rukun Islam ka-4;
• Tajadinya Nabi Muhammad saw. lawan dua bini inya bakawinan, yaitu Siti Juwairiyah wan Siti Hafsah;
• Turunnya parintah basalawat;
• Sabarataan amalan nusia diangkat ka langit;

• 1 Sakban, Zainab binti 'Alī diranakanan;
• 3 Sakban, Husain bin 'Alī diranakakan;
• 4 Sakban, 'Abbas bin 'Alī diranakakan;
• 5 Sakban: Imam Syiah, 'Alī ibnu Husain diranakakan, wan Hazrat Fizza, tangan-bibinian (Qaneez) matan Fatimah maninggal;
• 7 Sakban, Qasim bin Hasan diranakakan;
• 8 Sakban, Khwaja Abdul Ghaffar Naqsyabandi atawa Pir Mitha maninggal;
• 11 Sakban, 'Alī Al-Akbar diranakakan;
• 15 Sakban: malam badu'a nang dikanal lawan Lailatul Baraat nang digawi ulih Muslim, wan dua balas Imam nang tarahir, Muhammad Al-Mahdi diranakakan;
• 22 Sakban, Khwaja Muhammad Usman Damani, saurang guru sufi matan tradisi Naqshabandi maninggal;
• 27 Sakban, Sayyad Laal Shah Hamdani, saurang syeikh Naqshabandi takamuka diranakakan.

Kautamaan

Hudah disambatakan dalam barbagai Hadits Nabi Muhammad saw. tarait kautamaan bulan Sakban. Di antaranya nang baarti:

Matan Aisyah ra., inya manuturaka, "Rasulullah saw. rancak manggawi puasa, sampai-sampai kami bapandapat, inya kada suah kada bapuasa, wan inya rancak kada bapuasa, sampai-sampai kami bapandapat, inya kada suah bapuasa. Tagal, ulun kada suah maitihi Rasulullah bapuasa hibak sabulanan, kacuali pas bulan Ramadan, wan ulun kada suah maitihi inya labih banyak bapuasa matan puasa di bulan Sakban." (HR. Bukhari Numur 1833, Muslim Numur 1956)

Badasarkan Hadts yang dikamukakan di atas, bapuasa di bulan Sakban dianjurakan banar gasan umat Islam, tagal kada hibak sabulanan kaya nang digawi Nabi Muhammad, dikaranakan bulan nang wajib digawi puasanya sabarataan imbahnya ialah bulan Ramadan, sawagaimana dalam Hadits nang baarti:

"Jangan ikam badahulu bapuasa sahari atawa dua hari (sabalumnya) di bulan Ramadan, kacuali gasan sasaruang nang bapuasa tartantu, maka inya bulih manarusakan puasa inya." (HR. Bukhari Numur 1781, wan Muslim Numur 1812, sahih)

Amalan nang Dianjurakan

Babarapa amalan nang dianjurakan bubuhan ulama gasan umat Islam pas Sakban ngini, yaitu:

• Bapuasa sunah, napalagi sabulanan, atawa awal wan patangahan bulan;
• Mambanyaki istigfar wan du'a lawan Allah swt. Du'a nang rancak dianjurakan bubuhan ulama di bulan ngini, yaitu: "Allahumma baarik lanaa fii rajabi wa sya'baana wa ballignaa ramadhaan," baarti: "Ya Allah, barakahilah kami pas bulan Rajap wan Sakban. Sampaiakan kami lawan bulan Ramadan.";
• Maningkatakan mambaca Al-Qur'an sawagai parsiapan Ramadan;
• Mambanyaki salawat lawan Nabi Muhammad saw.;
• Basadakah wan baamal susial lawan sasama nusia.

Tiringi Jua

• Nispu Sakban
• Kiblat