Rumah Tongkonan

Rumah Adat Tongkonan

Rumah Tongkonan marupakan rumah adat bubuhan masyarakat Tana Toraja mulai bahari. Tongkonan asal katanya dari Tongkon, nang baisi arti Duduk. Rumah nangini kada bulih jadi ampun urang saikung. Rumah Tongkonan bahari dipakai gasan wadah pusat pamarintahan, gasan wadah kakuasaan adat, lawan gasan wadah bubuhan warga Tana Toraja bakumpulan. Bahari Rumah Tongkonan suah jua dipakai gasan manyimpani janajah. Rumah Tongkonan baisi hatap nang hujungnya mancungit ka atas di kadua hujungnya, mahirip lawan tanduk hadangan. Rumah Tongkanan baisi lantai labih dari sabuting. Disubalah dalam ada palidangan, panampik kacil, panampik tangah, lawan padapuran. sulung rumah atawa barumahannya dipakai gasan dijadiakan kandang hiwan haraguan.

Rumah Tongkonan baisi talu wadah didalamnya, subalah utara, subalah tangah lawan subalah salatan.

Macam lawan Kagunaan Rumah Tongkonan

1. Tongkonan Layuk atawa Tongkonan Pesio' Aluk, kagunaannya gasan wadah baulah atawa manyusun aturan sosial keagamaan.
2. Tongkonan Pekaindoran atawa Pekamberan atawa Tongkonan Kaparengesan, kagunaannya gasan wadah barunding pamarintahan adat.
3. Tongkonan Batu A'riri, kagunannya gasan tongkonan tambahan.

Kepala lawan Tanduk Hadangan nang digantung dimuka rumah tongkonan

Samuaan Rumah Tongkonan pasti baampah ka subalah utara, karana subalah utara marupakah araha nang dianggap panting lawan masyarakat Tana Toraja. Hujung hatap nang bajijir mahadap ka subalah utara baisi arti bahwa tutuha buhannya baasal dari subalah utara lawan kaina buhannya pacang takumpulan pulang di subalah utara.

Kapala Hadangan dipakai gasan pancirian rumah adat tongkanan. Hadangan dikurbanakan kada sadikitan satiap upacara pamakaman adat Toraja. Imbahitu kapala lawan tanduk hadangannya digantung di tawing subalah muka rumah tongkonan. makin banyak tanduk hadangan nang digantung baarti makin harat kadudukan kaluarga janajah nitu. Di tawing subalah barat digantungakan rahang hadangan tadi. Di tawing subalah timur digantungakan rahang babi.

Rumah Tongkonan ampun bangsawan lawan urang biasa belainan. nang paling kalihatan banar belainannya itu ada di tawingnya, jandila, lawan angin-angin, nang dihiasi lawan ukiran halus, rinci, lawan bamacam-macam. ukirannya ada nangkaya gambar hayam, babi, hadangan lawan disulang-sulingi sulur.

Rumah Tongkanan rancak dibabak lawan bubuhannya gasan manjaga atawa manaikakan kaharatan lawan pangaruh dari bubuhan bangsawan. Satiap mambabak Rumah Tongkonan pasti diadakan upacara nang ngalih wan melibatakan samuaan jiran, mahirip lawan upacara pamakaman. Rumah tongkonan baisi ciri khas kada memakai paku/logam dalam maulah rumahnya, tatapi mamakai pasak.