Pamulalit ilat

Pamulalit ilat (basa Inggris: tongue twister) adalah frasa atawa susunan kata-kata nang baisi kamahiripan dalam bunyi maulah ngalih diucapakan sacara hancap lawan bujur. Kamahiripan bunyi dalam pamulalit ilat di antaranya marga adanya aliterasi (paulangan bunyi konsonan awal, misalnya: buaya, biawak, buaian), asonansi (paulangan bunyi vokal), wan konsonansi (paulangan bunyi konsonan uncit). Bahanu pamulalit ilat disusun matan homofon wan rancak disusun jadi mangandung rima.^[1]

Guna

Pamulalit ilat, nang wastu tadiri matan babarapa kata, dimaksutakan gasan diucapakan baulang-ulang sahancapnya. Kalimat-kalimat panjang nang jadi pamulalit ilat wastu parlu diucapakan sakali, tagal sahancapnya wan kadada salah.

Pamulalit ilat kawa dipakai gasan mambantu mangambangakan kamampuan bapandir, tarapi bapandir, mambantu mahilangakan lugat, wan jadi pamainan gasan urang nang marasa tatantang gasan kawa maucapakannya.^[2] Di bubuhan kakanakan, pamainan pamulalit ilat tasuhur gasan saling manampaiakan kamahiran bapandir. Kakanakan katuju lamun tajadi tasilahu ilat nang maulah taucapakannya kata-kata tangatan.

Pamulalit ilat dipinandui dalam bamamacam basa di dunia. Dalam bahasa Inggris misalnya, fonem s [s] wan sh [ʃ] nang bunyinya mahirip maulah kangalihan artikulasi, misalnya: She sells seashells on the seashore (Inya bajual cangkang karang di pinggir pantai). Salah satu pamulalit ilat dalam bahasa Prancis, Un chasseur sachant chasser sait chasser sans son chien de chasse (Saikung pamburu nang tahu cara baburu tahu cara baburu tanpa anjing baburunya) jua marga kamahiripan fonem s [s] wan sh [ʃ]. Maumpat Guinness Book of World Records, pamulalit ilat pangalihnya dalam basa Inggris adalah The sixth sick sheik's sixth sheep's sick.

Jujuhutan

^ Clements, William M.(1997). "Tongue Twister".Folklore: An Encyclopedia of Beliefs, Customs, Tales, Music, and Art.Ed. Thomas A. Green.ABC-CLIO.793.
^ Rief, Sandra F. (2007). How to Reach and Teach All Children through Balanced Literacy: User-friendly Strategies, Tools, Activities, and Ready-to-use Materials. John Wiley and Sons. hlm. 108. ISBN 0-7879-8805-7. Diakses tanggal 2009-11-27.

[folklore-1] Clements, William M.(1997). "Tongue Twister".Folklore: An Encyclopedia of Beliefs, Customs, Tales, Music, and Art.Ed. Thomas A. Green.ABC-CLIO.793.

[2] Rief, Sandra F. (2007). How to Reach and Teach All Children through Balanced Literacy: User-friendly Strategies, Tools, Activities, and Ready-to-use Materials. John Wiley and Sons. hlm. 108. ISBN 0-7879-8805-7. Diakses tanggal 2009-11-27.

[1]

[2]