Haji Buyasin
Haji Buyasin atawa Hadji Boijasin adalah salah saurang pahlawan Perang Banjar nang bajuang wayah kasultanan Banjar. Sidin bajuang baimbai Damang Lihman wan Kiai Langlang Buana. Sidin tarkanal sabagai pahlawan anum nang digalari ulih bubuhan Walanda sabagai "Barandal Licin", Musabab lalingkahan sidin nang ngalih banar ditangguh wan sidin wayah malakukan panyarangan katuju mambakar bubuhan prajurit Walanda.
Ngaran langkap sidin adalah Haji Muhammad Jasin. Lahir di kampung Sabuhur (Kabupatin Tanah Laut, Kalimantan Selatan) wayah tahun 1837. Ngaran asli sidin Muhammad Yasin.[1]
Manurut riwayat, wayah bulan Agustus 1859, Haji Buyasin wan Demang Lehman wan Kiai Langkang manyarang Benteng Tabanio. Rahatan sarangan nitu, banyak sardadu Walanda nang maninggal atawa habis umur.[2]
Walanda handak maambil Benteng Tabanio lagi mamakai kapal perang Bone, sarangan nang pamulaan kada kawa mangalahakan Haji Buyasin. Saragan nang kadua kali, Walanda mamakai kapal Arjuna, Celebes, Matrado, wan Onrust, sahingga Haji Buyasin wan pasukannya baundur.
Haji Buyasin wan kakawanan tapaksa baundur ampah Takisung, lalu manuju ka Pelaihari. Sampai ka Bati-bati, Haji Buyasin wan bini, wan garilya nang maumpati sidin dikapung ulih pasukan Walanda salawas 10 hari, andakannya pas di Tambak Lining wan Salingsing, bulan Mai 1864. Wayah ari ka-11, Haji Buyasin wan kakawalan sidin kawa salamat, limbah nitu buhannya bukahan ka Pengaron.[2]
Kamatian Haji Buyasin kajadian pas sidin bamara ampah Tanah Dusun, Kalimantan Tangah. Wayah handak manyabarang Sungai Lintuni, sidin batamu wan kaki tangan Walanda, Pambakal Bonang. Wayah nitu, Haji Buyasin ditimbak ulih Pambakal Bonang, tanggal 26 Januari 1866. Isuknya, janajah sidin dikuburakan di Pamakaman Masjid Lama Banjarmasin (Teluk Masjid).
Ngaran Haji Buyasin diandak jadi ngaran rumah sakit, yakni Rumah Sakit Umum Haji Boejasin di Kabupatin Tanah Laut. Ngaran sidin jua dijadiakan ngaran jalan, yakni Jalan Haji Buyasin di muka Kantor Dinas Perikanan dan Ketahanan Pangan, di sabalah kiwa Dinas Perumahan Rakyat Kabupaten Tanah Laut, sampai ka bundaran Parit.[2]
Jujuhutan
[babak | babak asal-mulanya]- ^ Verzameling der merkwaardigste vonnissen gewezen door de Krijgsraden te velde in de Zuid- en Ooster-afdeeling van Borneo gedurende de jaren 1859-1864: bijdrage tot de geschiedenis van den opstand in het Rijk van Bandjermasin (dalam bahasa Belanda). Ter Landsdrukkerij. 1865.
- ^ a b c Asal-Usul Nama Jalan di Pelaihari. Tanah Laut: Dinas Perpustakaan dan Kearsipan Kabupaten Tanah Laut. 2017. hlm. 25.