Ganja

Tumatan Wikipidia basa Banjar, insiklupidia bibas
Loncat ke navigasi Loncat ke pencarian
?Ganja
Cannabis Plant.jpg
Klasifikasi ilmiah
Karajaan: Plantae
Divisi: Magnoliophyta
Kelas: Magnoliopsida
Ordo: Urticales
Famili: Cannabaceae
Genus: Cannabis
Spesies: C. sativa
Nama binomial
Cannabis sativa
Linnaeus
Subspesies

C. sativa L. subsp. sativa
C. sativa L. subsp. indica

Ganja' atawa mariyuana marupakan psikotropika mangandung tetrahidrokanabinol[1] wan kanabidiol nang maulah pamakainya marasa'akan euforia. Ganja biasanya diulah manjadi ruku gasan dihisap supaya efek matan zatnya bariaksi.

Tanaman samusim ngini tingginya kawa mancapai 2 mitir. Badaun manjari lawan kambang laki wan bini ada di tanaman balain (barumah dua). Kambangnya halus-halus dalam garumbungan di hujung ranting. Ganja kawa tumbuh di pagunungan tropis haja lawan katinggian di atas 1.000 meter di atas parmukaan laut.

Ganja manjadi simbol budaya hippie nang suah tarkanal di Amerika Serikat. Hal ngini biasanya dilambang'akan wan daun ganja nang bantuknya khas. Salain ngitu, ganja wan opium rancak jua disambat sabagai simbol parlawanan tahadap arus globalisasi nang dipaksa'akan nagara kapitalis tahadap nagara bakembang. Di India, sapalih Sadu nang manyambah dewa Siwa mangguna'akan produk ganja gasan manggawi ritual panyambahan lawan cara mahisap hasis lewat bong wan minum bhang.

Mulai 10 Desember 2013, Uruguay mambulih'akan ganja gasan diparjualbeli'akan wan dikonsumsi di nagara ngitu.[2][3]

Kontroversi[babak | babak asal mulanya]

Sapalihan nagara manggolong'akan tanaman ngini sabagai narkotika, biar kadada bukti bahwa pamakainya timbul jadi kacanduan, balain lawan ubat-ubatan tarlarang jenis lain nang mangguna'akan bahan-bahan sintetis atawa semisintetis nang merusak sel-sel otak. Di antara pangguna ganja, bamacam efek nang ditimbul'akan, tarutama euforia. Maskipun dampak panggunaan ganja gasan kesehatan masih mambutuh'akan panalitian tarus manarus, tatapi kadar tetrahidrokanabinol nang ada di ganja nang makin tinggi dari tahun ka tahun patut dijanaki. Kadar tetrahidrokanabinol nang ada di daun ganja dahulu bakisar antara 1% sampai 4%, wayah ini kadarnya kawa mancapai 7%. Bamakin maningkatnya kadar tetrahidrokanabinol kawa maulah urang makin lakas marasa'akan katargantungan lawan ganja.[4]

Efek nang kada baik sacara umum adalah pangguna timbul jadi koler wan otak timbul jadi lambat bapikir. Tapi, masalah ngini masih manjadi kontroversi, gara-gara kada sabarataan disapakati oleh babarapa kalumpuk tartantu nang mandukung ganja gasan medis wan ganja gasan rekreasi. Salain disambat kawa gasan paradam rasa sakit, wan pangubatan gasan panyakit tartantu (tamasuk kanker), banyak jua urang nang manyambat ada kanaikan kreativitas dalam bapikir lawan dalam bakarya apalagi babuhan seniman nang kaya palukis wan musisi. Kanaikan kreativitas dipangaruhi jua oleh jenis ganja nang dipakai. Efek nang ditimbul'akan bamacam-macam gasan satiap urang. Ada nang meaasa'akan efek nang maulah inya jadi koler, kalumpuk nang laian ada nang jadi cangkal, apalagi dalam bapikir kreatif (kada aktif sacara fisik nang kaya efek nang dihasil'akan metamfetamin). Ngitu samunyaan tagantung kadar tetrahidrokanabinol nang takandung dalam ganja. Bamakin tinggi kadar tetrahidrokanabinol di dalam ganja, baarti bamakin ganal paubahan otak nang timbul wan risiko kacanduan pun makin banaik.[5]

Ganja kada tabukti sabagi panyabab kematian gara-gara zat nang takandung dalam ganja. Apalagi pas jaman bahari dianggap sabagai tanaman nang luar baisa nang parak samunya'an kawa dipakai gasan bamacam-macam kaparluan. Tapi, akibat ganja nang kadar tetrahidrokanabinol tinggi ma'akibat'akan darah rendah wan hilangnya ingatan jangka pendek, percepatan detak jantung, bakurangnya kamampuan motorik, wan efek samping lain nang mahalangi kinerja awak dalam banyak kagiatan. Amun ngini tajadi dalam kundisi wan situasi lingkungan nang kawa mambahaya'akan kaya bakandaraan nang parlu konsentrasi. Maka kacalakaan kawa timbul nang bapaluang ganal manimbul'akan kamatian.[6] Pamakaian nang aman adalah mahitung batas wajar zat psikoaktif nang jangan sampai di atas kasanggupan awak ma'ambil zat ngitu, wan kada manggawi aktivitas nang mambahaya'akan jiwa gara-gara efek mamabuk'akan ganja nang malabihi mabuk alkohol atawa narkoba nang lain amun kadar tetrahidrokanabinol talalu tinggi gasan dihadapi oleh tubuh individu penggunanya.

Dalam panalitian ilmiah nang mamakai mitudi tinjauan sistematis nang mambandingkan efektivitas ganja sanagai antimuntah, didapati hasil ganja dasar efektif gasan antiemetik dari pada prochlorperazine, metoclopramide, chlorpromazine, thiethylperazine, haloperidol, domperidone, atawa alizapride. Tapi pamakaiannya dibatasi banar dosisnya, gara-gara sapalih pasien ma'alami gajala efek psikotropika dari ganja nang babahaya banar kaya sakit kapala, depresi, halusinasi, paranoia, wan jua arterial hypotension.

Pamanfaatan[babak | babak asal mulanya]

Ganja kada ditangati gasan wilayah bawarna biru, wan wilayah bawarna habang masih bastatus dilarang banar lawan aturan hukum nang katat wan barat

Tumbuhan ganja sudah dikanal manusia mulai bahari wan dipakai gasan bahan tekstil gara-gara serat nang dihasil'akannya kuat. Biji ganja kawa jua dipakai gasan sumber minyak. Tapi, ganja dikanal jua sabagai sumber narkotika wan kagunaan ngini labih banilai ekonomi, karana dominan pemanfaatannya gasan hal nang basifat rekreasional.

Di sapalih nagara pananaman wan kabaisian ganja sabarata'annya kada dibulih'akan. Di sapalih nagara lain, pananaman ganja dibulih'akan gasan kapantingan medis wan rekreasi lawan syarat wan katantuan nang dipakai di nagara atawa wilayah ngitu.

Sabalum ada larangan nang karas gasan pananaman wan kapamilikan lawan panggunaan ganja pas tahun 1976, di Aceh daun ganja manjadi komponen sayur nang umum disaji'akan. Bagi nang mamakainya, daun ganja karing dibakar wan dihisap nang kaya ruku, wan kawa jua dihisap lawan alat khusus nang disambat bong. Di Indunisia, ganja digulung'akan narkutika gulungan satu manurut parundang-undangan nang balaku mulai tahun 1976 badasar'akan Undang-undang Nomor 9 Tahun 1976. Wayah ini, Undang-undang Nomor 35 Tahun 2009 dijadi'akan paduman hukum nang masih dipakai sampai wayah ini. Bamakin dunia bamaju pas jaman globalisasi, Indunisia kena maumpati jua lawan parkambangan jaman gasan mambulihakan pamakaian ganja gasan kaparluan medis nang kaya pamulaannya. Imbah ngitu, kaparluannya gasan pamakaian ekreasional pahabisannya.

Indunisia pacangan mambulih'akan ganja amun bangsanya sudah siap nang kaya kasiapan bangsa di nagara-nagara nang sudah mambulih'akannya. Amun balum tapanuhi kesiapannya, maka susunan kahidupan timbul jadi bamakin kacau. Hal nang kaya ngini nang ditakutan'akan oleh babuhan atau gulungan nang kahidupannya dalam status aman, nyaman, wan tantram hidupnya. Pambulihan alkohol haja di Indunisia saja masih maulah kaributan maskipun miras sudah dibulih'akan di Indonesia. Sapalih babuhan atawa urang urang nang mandukung dibulih'akannya ganja tarinspirasi gara-gara garaman nagara-nagara nang sudah mambulih'akan ganja, nang kaya Kanada wan sapalih nagara bagian di Amerika Sarikat. Tapi, buhannya ni bapikir gasan kaparluan rekreasinya wara, wan kada mamikirakan akibatnya amun nyaman banar baisi ganja nang kaya baisi tambakau gara-gara dibulih'akan di Indunisia.

Budidaya[babak | babak asal mulanya]

Tanaman ngini kawa didapati dihampir sabarataan nagara tropis. Bahkan saaplih nagara baiklim dingin wahini sudah mulai mambudidaya'akannya dalam rumah kaca.

Di Indunisia, ganja dibudidaya'akan sacara ilegal di Aceh. Biasanya ganja ditanam pas pamulaan musim panghujan, parak musim kamarau sudah kawa dipanen hasilnya.

Hasil panen ganja bababtun daun berikut ranting wan kambang lawan buahnya barupa biji-biji nang halus. Campuran daun, ranting, kambang, wan buah nang sudah dikaring'akan ngini nang biasa dilinting urang jadi nang kaya ruku. Amun kambang biniannya diekstrak, kawa mahasil'akan damar kandal nang dingarani hasis.

Deputi Pencegahan Badan Narkotika Nasional (BNN) Irjen Polisi Ali Djohardi Wirogiotoanja manyambat bahwa ganja nang tumbuh di Indunisia baisi kadar tetrahidrokanabinol paling tinggi di dunia, biar kada dibudidayakan sacara modern nang kaya di nagara-nagara maju nang sudah mambulih'akan pamakaian ganja.[7] ‎Menteri Dalam Negeri (Mendagri), Tjahjo Kumolo manyambat ganja kualitasnya paling baik di dunia baasal dari Aceh.[8] Salain Aceh sabagai paringkat pamulaan panghasil ganja, ada Bengkulu sabagai paringkat katalu, Jambi paringkat katiga, wan Sumatra Utara sabagai provinsi nang ada diparingkat kaampat pemasok ganja di dunia.[9] Kapolda Bengkulu Brigadir Jenderal Polisi M. Ghufron manyambat Bengkulu baisi lahan nang subur banar gasan ditanami ganja. Bahkan, ganja-ganja nang dihasil'akan baisi kualitas tarbaik dibanding'akan tanaman nang kaya itu jua dari daerah lain.[10]

Lihat jua[babak | babak asal mulanya]

  • Ganja di Indunisia
  • Kanabis
  • Hasis

Referensi[babak | babak asal mulanya]

  1. ^ Ethan B Russo (2013). Cannabis and Cannabinoids: Pharmacology, Toxicology, and Therapeutic Potential. Routledge. p. 28. ISBN 978-1-136-61493-4.
  2. ^ "Uruguay Legalkan Konsumsi Ganja". MetroTV News. 11 Desember 2013. Check date values in: |date= (help)
  3. ^ "Uruguay Negara Pertama yang Legalkan Perdagangan Ganja". Kompas. 11 Desember 2013. Check date values in: |date= (help)
  4. ^ "Apa yang Terjadi Jika Rutin Mengisap Ganja Dalam Jangka Panjang? • Hello Sehat". Hello Sehat (in Indonesia). 2016-06-15. Retrieved 2020-02-21.
  5. ^ "Kalau Remaja Konsumsi Ganja, Begini Otaknya". Tribun Timur (in Indonesia). Retrieved 2020-02-21.
  6. ^ H, Patri; oyo. "Benarkah Overdosis Ganja Tidak Sebabkan Kematian?". Rumah Cemara (in Indonesia). Retrieved 2020-02-21.
  7. ^ BeritaSatu.com. "BNN: Ganja Indonesia Punya THC Tertinggi". beritasatu.com (in Indonesia). Retrieved 2020-02-21.
  8. ^ "'Ganja Aceh Terbaik Kualitasnya di Dunia' - Tribunnews.com". m.tribunnews.com. Retrieved 2020-02-21.
  9. ^ www.riauonline.co.id. "Astaga, 4 Daerah di Indonesia Ini Jadi Pemasok Ganja Dunia". RiauOnline (in Indonesia). Retrieved 2020-02-21.
  10. ^ "Ganja Terbaik Dari Bengkulu, Polda Giatkan Pemberantasan" (in Indonesia). Retrieved 2020-02-21.

Pranala luar[babak | babak asal mulanya]