Dirk Andries Williem van der Pijl

Dirk Andries Williem van der Pijl

Riwayat
Kalahiran	Brakel (en)
Kamatian	27 Siptimbir 1974 (73 tahun (id) terjemahkan) Banjarbaru (id)
Alkah	Alkah CTN Pulau Beruang KM 29, Banjarbaru
Agama (id)	Kerestén
Gawian
Gawian	Arsitek (id) wan insinyur (id)

Dirk Andries Williem van der Pijl (D.A.W. van der Pijl) atawa rancak dikiau Van Der Pijl adalah salah sabuting urang Walanda di Indunisia nang mambantui dalam parancangan wan pambangunan Kuta Banjarbaru, Kalimantan Salatan wan Kuta Palangka Raya, Kalimantan Tangah.

Kahidupan awal

Van Der Pijl diranakakan di Kuta Brakel, Zaltbommel, Parupinsi Gelderland, Walanda pada tanggal 23 Januari 1901. Inya adalah anak panambaian matan Dirk Govert Van der Pijl wan Cornelia Elisabeth Adriana Scholten.

Inya suah balajar di Universitas Leiden, yakni di jurusan Arsitiktur, nang mana inya mancangkali ilmu khusus Parancangan wan Paninjauan pada bangunan sakulah, garija, wan rurumaham. Inya mandapat pandidikan tihnik di tiga tampat, yakni Prof.ex. C. I (1920), Cand. C. I. (1922), wan Examen Arsitek (1924). Mulai matan ngitu, inya bagawi manjadi arsitik matan karir sebagai arsitek tahun 1924 sampai 1961. Waktu tahun 1929, inya pindah ka Hindia Walanda (wahini Indunisia).

Batu tulis nang baisi riwayat hidup Van der Pijl di Alkah CTN Pulau Beruang KM 29, Banjarbaru

Gawian

Waktu tahun 1924 sampai tahun 1929, inya suah manjadi Arsitik partikulir di Den Haag. Waktu panambaian pindah ka Indunisia, yakni tahun 1929, inya digawiakan manjadi Arsitik di Biru Insinyur Brinkman & Voorhoeve, Bandung sampai tahun 1930. Imbah ngitu, inya suah jua manjadi Arsitik Kutamadya (1930-1935) wan Arsitik Partikulir (1935-1942) di Cirebon.

Waktu ada bubuhan Japang di wilayah Hindia Walanda matan tahun 1942 sampai 1945, inya suah dipanjara lawan buhannya. Tapi waktu tahun 1946 sampai tahun 1947, inya digawiakan di Biru Parancanaan Harga wan Statistik (Prijzen en Statistiek) matan Kamantarian Panyusunan Ulang wan Parumahan di Den Haag (Ministerie van Wederopbouw en Volkshuisvesting in Den Haag).

Gawiannya di Kalimantan dimula'i di tahun 1947, nang mana inya manjadi M. T. A. kl I Departmen V & W (Wederopbouw dienst/ Layanan Rekonstruksi) nang digawiakan ulih Kapala Parumahan wan Pa pada Kepala Perumahan wanPangalulaan Banyu (Hoofd Residentie Waterstaat) di Balikpapan sampai tahun 1952. Imbah ngitu sampai tahun 1957, inya manjadi Insinyur Kapala di Dipartimin Gawian Umum nang yang digawiakan pada Parupinsi Kalimantan (Kapala bagian Gagadungan wan Parancanaan/Palaksana Kuta Banjarbaru). Waktu tahun 1957sampai tahun 1960, inya manjadi Pagawai Tinggi di Dipartimin Gawian Umum nang digawiakan pada Parupinsi Kalimantan (Kapala bagian Gagadungan wan Parancanaan/Palaksana Kuta Palangka Raya). Pada tahun 1961, inya pingsiun matan jadi arsitik wan manjadi Guru SMA di IImu Pasti dan IImu Gaya wan paninjau pada bangunan-bangunan K. D. Pos, K. D. Tel, wan Mekatani Ujung sampai tahun 1968.

Marancang Kuta Banjarbaru

Balaikuta Banjarbaru

Waktu tahun 1951, Hubnur Kalimantan waktu ngitu, dr. Murdjani mengusulakan sakira kawa maulah kuta hanyar nang nang bangaran Banjarbaru, nang artinya "Kuta Hanyar di Wilayah Banjar". Waktu ngitu, Kuta Banjarbaru tamasuk wilayah Gunung Apam nang baandak di jalan Banjarmasin-Martapura, nang mana wilayah ngini tamasuk ka dalam wilayah anak Kampung Guntung Payung, Kampung Jawa, Kecamatan Martapura. Gunung Apam rancak manjadi wadah istirahat gasan bubuhan buruh panambang intan nang manambang di Cempaka. Maraga ngitu, inya mambawai Van Der Pijl sagan maulah kuta ngini di tahun 1953.

Dalam maulah kuta ngini, inya baisi pandapat nang sama lawan Ebenezer Howard, yakni maulah kuta nang baisi lingkungan nang masih asli wan alami. Inya marancang babarapa buting bagian kuta nang kaya kantur, pusat industri, pusat pandidikan, rurumahan, taman, wan lain-lain, dimana bagian ngini mamarhatiakan lingkungan aslinya. Baberapa bangunan nang tamasuk hasil ulahannya di antaranya Banjarbaru 1-4, Kompleks Projakal, Kompleks Rindam, Kompleks Zipur, wan Kompleks SPN.

Tapi imbah tahun 1954, panetapan kuta ini manjadi pusat Parupinsi Kalimantan Salatan kadada lagi kisahnya. Bahkan pada tanggal 17 Agustus 1968, kuta ngini bamasuk ka dalam wilayah Kabupatin Banjar sampai tanggal 27 April 1999 (waktu Kuta Banjarbaru manjadi kutamadya maraga ada Undang-Undang Numur 9 tahun 1999). Pasal ngini maulah kuta ini baisi jumlah masyarakat matan luar banua nang pambanyaknya di Kalimantan Salatan, wan mulai bakambang kada baaturan mun dilihat matan tata kutanya.

Walau kuta ini mulai dirancanakan pulang manjadi pusat parupinsi waktu tahun 2011 wan diakuri bubuhan DPR RI waktu rapat paripurna di tanggal 15 Pibuari 2022, rancangan pusat pamarintahannya babida lawan rancangan nang diulah ulih Van der Pijl. Pusat pamerintahan nang diulah ulih pamarintah parupinsi pada tahun 2011 baandak di Cempaka, sadang pusat pamarintahan ulahan Van der Pij ada di Banjarbaru Kuta.

Kahidupan paribadi

Inya baisi bini nang bangaran Anna Gaspers, nang mana inya adalah turunan bubuhan Walanda nang diranakakan pada pada tanggal 27 Disimbir 1915 di Gombong, Kebumen, Jawa Tengah. Matan hasil banikahan ngini, inya baisi dua ikung anak binian: Andrea Cornelia dan Marijke Elizabeth. Matan dua ikung anaknya ngini, inya baisi ampat ikung cucu.

Matan tulisan batu tulis parak alkahnya, inya parak lawan bubuhan urang Islam di Banjarbaru. Inya jua suah manjadi bandahara dalam Panitia Pambangunan Masigit Jami Hidayatul Muhajirin di parak Kolam Renang Idaman, Banjarbaru wan rancakmenyapui halaman wan lingkungan masigit waktu sudah ampih bagawi. Maraga ngitu, inya rancak dielangi lawan kakawanan nang baragama Islam waktu hari-hari ganal bubuhan Kerestén.

Kuburan Van der Pijl di Alkah CTN Pulau Beruang KM 29, Banjarbaru

Kamatian

Inya maninggal pada hari Jumahat tanggal 27 Siptimbir 1974 atawa 11 Ramadan 1394 Hijriah wan dipatak di Alkah CTN Pulau Beruang KM.29, Banjarbaru. Imbah ngitu, bininya, Anna Gasper, maninggal pada 27 Disimbir 1994 wan dipatak di Banjarbaru jua.