Batamat Quran

Tumatan Wikipidia Banjar, kindai pangatahuan
(Diugahakan matan Batamat Al-Qur'an)

Batamat Quran atawa Bakhatam Quran adalah tradisi manamatakan atawa manuntungakan bacaan al-Qur'an, kitab suci umat Islam. Tradisi ini asalnya tumatan nabi Muhammad wan sahabat-sahabatnya nang biasa manuntungakan atawa manamatakan al-Qur'an dalam waktu tartantu.[1]

Tradisi Batamat Quran mulanya tradisi nang asalnya tumayan pondok pasantren tahfidz. Tradisi ini dudinya diumpati ulih masyarakat umum di Indunisia. Biasanya batamat Quran di pasantren tahfidz digawi lawan cara bil ghaib atawa bahapal, amun batamat Quran di masyarakat umum mamakai cara bin nash atawa lawan malihat mushaf. Tradisi Batamat Quran imbah itu tauar di babagai banua di Nusantara.[2]

Dalam tradisi urang Banjar, batamat Quran biasanya digawi gasan kakanakan atawa babujangan nang hanyar panambaian manuntungakan samuaan bacaan al-Qur'an sabanak 30 Juz. Kakanakan nang mandapat parayaan batamat Quran biasanya baumur antara sambilan sampai dua walas tahun. Pada umur ini, umumnya masyarakat banjar manyuruh kakanakan gasan mambaca wan manuntungakan al-Qur'an, baik itu lalakian atawa babinian.[3]

Salain digawi gasan kakanakan wan babujangan nang sudah manuntungakan samuaan bacaan al-Qur'an sabagai bantuk pangharagaan wan tanda kabungahan, batamat Quran ala urang Banjar jua biasanya digawi pada parayaan lainnya nangkaya gasan calun pangantin, ritual kamatian (pambacaan al-Qur'an talu hari di kuburan), parayaan maulid, tadarus pada bulan Ramadan, batamat massal, wan batamat Quran lainnya.[4]

Pakakas wan palaksanaan[babak | babak asal-mulanya]

Wayah handak manggawi batamat Quran, urang Banjar harus manyiapakan babarapa hal, mulai matan al-Qur'an, lapik duduk, payung kambang, lakatan lawan nyiur parut nang dibari gula habang, wan banyu putih dalam butul. Dalam batamat Quran jua musti manyaru guru mangaji atawa ustadz nang maajarakan Quran ka kakanakan, warga sakitar, wan kakaknakan nang pacangan umpat dalam acara.[4]

Payung kambang dalam tradisi batamat Quran adalah paring barangka nang babantuk lingkaran wan tungkat nang mahirip sabuting payung. Payung itu biasanya diulah tasusun matan bilah paring nang bajumlah ganjil. Jumlah bilangan ganjil ngini baraitan lawan ajaran Islam nang manyataakan Allah katuju bilangan ganjil wan ngaran-Nya bajumlah ganjil.[4]

Imbah itu, paring barangka babantuk payung tafi dihiasi lawan kartas minyak atawa kartas bawarna-warni gasan manukupi bagian atas rangka. Biasanya kartas nang dipakai bawarna habang wan putih. Salain itu, pada paring barangka digantung rintingan kambang, mulai matan bunga mawar, kananga, campaka, kacapiring, sampai malati. Ada jua hiasan duit kartas, caramin halus, wan sabagainya. Payung kambang ini kaina dipakai gasan manaungi pasrta nang handak batamat Quran wan bahanu diarak baimbai wan pasarta sabalum palaksanaan batamat.[4]

Bahan acuan[babak | babak asal-mulanya]

  1. ^ Rafi, Muhammad (12 Pibuari 2022). "Tradisi Batamat Alquran di Kalangan Masyarakat Banjar". tafsiralquran.id. Diakses tanggal 23 Marit 2023. 
  2. ^ Ahmad Nailul Fauzi. Komodifikasi Agama terhadap Pembacaan (Khataman) Alquran Air Kemasan KH-Q PT Buya Barokah. Diya Al-Afkar: Jurnal Studi al-Quran dan al-Hadis 7, no.02 (30 Desember 2019): 289.
  3. ^ Chaerul Mundzir. Nilai-Nilai Sosial dalam Tradisi mappanre Temme' di Kecamatan Tanete Rilau, Kabupaten Barru. Rihlah: Jurnal Sejarah dan kebudayaan 1, no. 01 (10 Mei 2014): 69-80
  4. ^ a b c d Tradisi Batamat Al Qur'an di Tanah Banjar. 2022. ISBN 9786236268261.