Anggrek hirang
| ?Anggrek hirang | ||||||||||||||||
|---|---|---|---|---|---|---|---|---|---|---|---|---|---|---|---|---|
.jpg) | ||||||||||||||||
| Klasifikasi ilmiah | ||||||||||||||||
| ||||||||||||||||
| Ngaran binomial | ||||||||||||||||
| Coelogyne pandurata |
Anggrék Hirang atawa Kersik Luai adalah tanaman matan famili Orchidaceae atawa anggrék-anggrékan. Tananaman ngini tumbuh di Sumatera, Kalimantan, Malaysia, wan Pilipina, nang mana tanaman ngini tamasuk tanaman maskut matan Parupinsi Kalimantan Timur. Tanaman ngini tamasuk tanaman nang dilindungi lawan pamarintah maraga tanaman ngini sudah langka wan jarang ditamui urang. Kambangnya sorang kawa mangaluarakan bau harum pada bulan Marit sampai Juni.[1][2]
Tanaman ngini baisi sifat épifit atawa barikit di tanaman lain. Rancak tanaman ngini barikit di puhun tuha, di parak pantai, atawa rawa di dataran randah nang tapanas.[2]
Parawakan
[babak | babak asal-mulanya]Tanaman ngini baisi ilat kambang atawa labellum nang saratnya bawarna hirang wan baisi gari-garis hijau babulu. Dalam sabuting tandan, ada 1-14 kuntum kambang nang baisi garis tangah kira-kira 10 santimitir. Daun kalupaknya nang bawarna hijau baisi panjang kira-kira 5-6 santimitir wan liarnya kira-kira 2-3 santimitir, nang mana daun ngini mamanjang wan manajam. Daun mahkutanya nang bawarna hijau anum baisi bibir nang bantuknya nang kaya biula bawarna hirang atawa cuklat anum, nang mana daun mahkutanya saurang tumbuh mamanjang wan manajam.[1]
Daun tanaman ngini tamasuk kalumpuk daun nang impar lawan kalumpuk rurumputan atawa Graminae.[3] Daunnya babantuk lunjung wan bawarna hijau, lawan jua baisi panjang kira-kira 40-50 santimitir wan libar kira-kira 2-3 santimitir.[1]
Tanaman ngini baisi buah nang bawarna hirang babantuk jurung nang panjangnya kira-kira 7 santimitir wan libar 2-3 santimitir. Walaupun ngitu, kada barataan kambang kawa jadi buah.[1]
Kalangkaan
[babak | babak asal-mulanya]Tanaman ngini sasain langka maraga kambangnya nang bagus wan unik, jadinya banyak urang nang bibas maambil tanaman ngini langsung matan hutan walaupun pamarintah maulah Paraturan Pamarintah RI No. 7 Tahun 1999 wan Undang-Undang No.5 tahun 1990 nang maatur pasal palindungan tanaman ngini. Pasal ngini ditambah pulang lawan masyarakat nang balum tahu lawan atura ngini maraga banyak hujungan matan sagi ikunumi. Sagan malindungi tanaman ngini, banyak urang mulai mambarikan pandidikan pasal palindungan anggrék hirang nang kaya panganalan anggrék, pangambangan budidaya, wan lainnya.[4] Salah sabutingnya yaitu pangambangan anggrék nang mamakai cara in vitro atawa di daiam laburaturium kultur jaringan tumbuhan. Bigi anggrék ditanam di média ulahan di laburaturium wan dibarii macam-macam parlakuan kimiawi nang kaya sanyawa urganik wan hurmun tumbuh, fisikawi, atawa biologis.[5]
Jujuhutan
[babak | babak asal-mulanya]- ^ a b c d Zapino, Tomi; Fitri, Chairi (2022). Kamus Nomenklatur Flora dan Fauna. Jakarta: Bumi Aksara. hlm. 645. ISBN 9786022178521.
- ^ a b Rahmatia, Diah; Pitriana, Pipit (2007). Buku Pengayaan Seri Flora & Fauna: Si Cantik Anggrek. Jakarta: JP Book. hlm. 78. ISBN 9789793487847.
- ^ Kartohadiprojo, Nies Sumarti; Prabowo, Gandhi (2009). Asyiknya Memelihara Anggrek. Jakarta: Gramedia Pustaka Utama. hlm. 21. ISBN 9789792246216.
- ^ Wahyudiningsih, Tri Suwarni; Jagau, Y.; Ravenska, N. (2018-10-16). "Konservasi Coelogyne pandurata Lindh. di Kalimantan Tengah: Karakter Morfologi, Propagasi In Vitro, dan Pelestarian Berbasis Komunitas Lokal". Jurnal Pengelolaan Lingkungan Berkelanjutan (Journal of Environmental Sustainability Management) (dalam bahasa Inggris): 125–139. doi:10.36813/jplb.2.2.125-139. ISSN 2598-0025. Diarsipkan dari versi asli tanggal 2023-03-20. Diakses tanggal 2023-03-20.
- ^ Untari, Rini; Puspitaningtyas, Dwi Murti (2006-09-06). "The effect of some organic compounds and NAA application on the in vitro growth of the black orchid (Coelogyne pandurata Lindl.)". Biodiversitas Journal of Biological Diversity (dalam bahasa Inggris). 7 (4). doi:10.13057/biodiv/d070409. ISSN 2085-4722.