Agama di Yunani Kuno

Raruntuhan kuil Zeus di Kirene, salah sabuting tampat gasan baibadah panganut agama Yunani Kuno

Babuhan bangsa Yunani Kuno atawa Yunani Bahari biasanya baisi pandangan bahwa dewa-dewi marupakan kumpulan sosok nang labih unggul dibanding manusia tapi mahuni dunia nang sama lawan manusia.

Dewa-dewi ngini baisi motif wan emosi nang sama lawan manusia, nang kaya cinta, birahi, hiri, sarakah, kasian, wan lainnya. Nang maulah balain lawan manusia, dewa-dewi ngitu tadi abadi wan baisi kamampuan nang liwar kada biasa. Dewa-dewi biasanya taumpat drama antara dewa-dewi nang lain, tatapi gara-gara mahuni dunia nang sama, dewa-dewi ngini katuju umpat campur lawan urusan manusia. Dalam pandangan bangsa Yunani kuno, dewa-dewi tu ganal banar sadangkan manusia halus banar nang jadinya dewa-dewi bisa haja manjajak manusia kaya samut wan dewa-dewi Yunani kuno biasanya mamanipulasi drama manusia gasan karamian buhannya wara.

Dewa-dewi Yunani kada baik banar atawa kada baik banar. Dewa-dewi ngini rumit, nang kaya manusia. Buhannya kada maulah paraturan moral gasan diumpati manusia wan kada paduli jua. Manusia kawa manjalin hubungan pribadi lawan dewa nang kaya manusia nang lain, tetapi superioritas dewa kada bulih ditakunakan wan unsur panyambahannya kada diingatakan. Kadang wan kada jarang, dewa-dewi Yunani bahubungan seksual lawan manusia, mahasilakan katurunan satangah dewa. Amun mambina hubungan lawan dewa-dewi nang lain, manusia kawa mamaksimalakan paluang dewa-dewi tartantu bakawan lawan inya. Manusia jua harus bahati-hati jangan talalu mautamakan sabuting dewa dibanding nang lain, karena dewa-dewi dalam agama Yunani kuno panyinggungan kaya manusia. Monoteisme kada payu di Yunani kuno, malahan disana monoteisme dianggap pahinaan.