30 Pibuari

Tumatan Wikipidia Banjar, kindai pangatahuan
Almanak Swedia Pibuari 1712

Dalam almanak Gregorian, Pibuari tadiri matan 28 atawa 29 hari. Tagal dalam sajarah tiga kali tajadi kajadian di babarapa nagara, bulan ngitu ba'isi 30 hari.

Wilayah Swedia (nang wayah ngitu tamasuk Finlandia) barancana gasan mangganti almanak Julian manjadi almanak Gregorian mula tahun 1700 lawan mahapusakan hari kabisat salawas 40 tahun ka muka. Ulih marga ngitu, 1700 lain tahun kabisat di Swedia, tagal tahun 1704 wan 1708 adalah tahun kabisat di luar rancana. Ngini ma'ulah almanak Swedia manjadi sahari tahancap daripada almanak Julian tagal masih 10 hari di balakang almanak Gregorian. Kabingungan bakurang wayah tahun 1712, dua hari kabisat ditambahakan, ma'ulah tahun ngitu ba'isi tanggal 30 Pibuari. Hari ngitu sama lawan 29 Pibuari dalam almanak Julian wan 11 Marit dalam almanak Gregorian. Pagantian Swedia ka almanak Gregorian wakasnya digawi wayah 1753.

Wayah 1929, Uni Soviet mamatuhakan almanak revolusioner Soviet di mana saban bulan ba'isi 30 hari wan sisa 5 atawa 6 hari kada hagian matan bulan napa haja wan manjadi hari parai. Ulih marga ngitu, tahun-tahun 1930 wan 1931 ba'isi 30 Pibuari tagal pagantian ngitu diwalangi'akan wayah tahun 1932 jadinya babulik ma'umpati almanak biasa.

Sacrobosco, sa'urang candakiawan abad ka-13 mangkalaim bahua dalam almanak Julian bulan Pibuari ba'isi 30 hari wayah tahun-tahun kabisat matan 44 SM sampai 8 M wayah Kaisar Augustus manyingkati Pibuari supaya bulan Agustus nang dingarani ma'umpati ngarannya ba'isi panjang nang sama lawan bulan Juli (nang dingarani manurut pandahulunya Kaisar Julius). Saupama kaya ngitu, kadada bukti sajarah manganainya wan kamungkinan ganal ngini wastu sabuting mitus lawas.

Sumber[babak | babak asal-mulanya]

  • The Oxford Companion to the Year. Bonnie Blackburn & Leofranc Holford-Strevens. Oxford University Press 1999. ISBN 0-19-214231-3. Halaman 98-99.

Pranala luar[babak | babak asal-mulanya]

Sabarataan pranala di bawah babahasa Inggris

29 Pibuari - 30 Pibuari - 1 Marat - Almanak Kajadian