Yusni Antemas

Yusni Antemas (nang baisi ngaran pena Anggraini, diranakakan di Amuntai, 22 April 1922 - habis umur di Amuntai, 12 September 2013 pada usia 91 tahun) wartawan, salian jua sastrawan Kalimantan Selatan. Sidin dikanal jua sabagai sajarawan, sakaligus pelukis nang dipinandui di mata seniman lokal di HSU bahkan di Kalsel.

Samasa hidup sidin sudah manyumbang lukisan gasan kapantingan pambibasan Irian Barat qan musium perjuangan Waja Sampai Ka Puting Banjarmasin. Salawas manjadi sastrawan dan wartawan tumatan 1940, sidin sudah manulis sadikitnya 25 judul buku. Buku-buku itu isinya ada nang sual sajarah banua, folklor, wan kisah kakanakan. Ada 12 judul nang ditarbitkan lawan Departemen Pendidikan dan Kebudayaan Republik Indonesia di Jakarta. Karya-karyanya nang lain ada jua tasimpan di Perpustakaan Nasional Australia, nangkaya Mutiara Nusantara seri 1, nang ditarbitkan Mega Sapura, Amuntai (1986); Si Pujung yang Menambat Barito (1980); Kahancuran di Baruh Kelayar (1980) dan Bara dan Nyala di Banua Lima (Negara-Alabio-Sungai Banar-Amuntai-Kelua). Didapati jua karya tahun 1974 tarbitan Banjarmasin nang isinya sajarah Kalimantan. Karya-karyanya ada jua tasimpan di Perpustakaan Universitas Yale antara lain: Orang-orang Terkemuka dalam Sedjarah Kalimantan, dari Mulawarman sampai H. Hasbullah Jasin (1971); Si Puyung yang Menambat Barito (1980); Mendulang Intan di Cempaka (1981) dan Tunas-tunas Mekar Pagi (1981).

Yusni Antemas habis umur pada tanggal 12 September 2013 pukul 3 pagi marga panyakit darah tinggi nang diharit. Jenazah disamayamakan di wadah bagana di kampung Sungai Bahadangan Kacamatan Banjang. Limbah dimandikan wan dikafani, almarhum langsung dibawa manuju Masigit At-Taqwa gasan disambahyangkan. Limbah itu dibawa manuju alkah kaluarga di kampung Lok Bangkai, Kacamatan Banjang gasan dikuburakan.