Wiramartas

Wiramartas adalah mantri pardagangan salajur mantri luar nagri Karajaan Nagara Dipa. Wiramartas suah batulak ka nagri Cina gasan mancari pandai gasan maulah berhala gangsa nang cagaran diandak di dalam candi mangganti berhala kayu cendana nang sudah buruk.

Kutipan Hikayat Banjar

Maka kata raja kapada Aria Magatsari dan Tumanggung Tatah Jiwa: "Aku handak barbuat berhala gangsa, karana pada rasaku berhala cendana akan buruk jua itu; berhala gangsa itu maski baratus-ratus tahun tiada akan buruk, tiada itu rusak. Siapa tahu barbuat itu?" Maka sambah Aria Magatsari dan Tumanggung Tatah Jiwa: "Hamba mandangar khabar urang-urang Cina itu tahu barbuat berhala gangsa." Kata raja: "Siapa nang patut kita suruh pada raja Cina maminjam pandai nang tahu barbuat berhala gangsa itu?" Sambah Aria Magatsari dan Tumanggung Tatah Jiwa: "Pada rasa hamba wastu Wiramartas itu nang patut, karana ia tahu bahasa Cina." Maka Wiramartas itu disuruh pada raja Cina, mambawa intan sapuluh, mambawa mutiara ampat puluh, mambawa jumantan ampat puluh, mambawa polam ampat puluh, mambawa mirah ampat puluh, mambawa baiduri ampat puluh dan lilin ampat puluh pikul dan damar saribu kindai, pekat saribu galung dan air madu saratus gantang, urang hutan sapuluh ikung, sarta mambawa surat maminjam urang nang tahu barbuat berhala gangsa. Sudah itu Wiramartas diparsalin sapanjanang baju sachlat, sabuk cindai, kain sarasah, karis barlandean amas sarta sangunya. Yang mahiringkan, urang lima puluh, sama diparsalin sabuk kimka dan kain Kaling. Sudah itu barlayar ia dangan pargata. Ada barapa lamanya di laut, maka datang ia itu pada palabuhan bandar Cina itu sarta mandirikan tatunggul putih dangan parhiasan tanda surat datang, suruhan raja basar. Maka dilihat syahbandar itu: "Suruhan dari mana ini?" Maka ia manyuruh bartanyakan. Maka ia, suruhan itu, datang bartanya: "Suruhan dari mana ini, siapa raja-dutanya?" Maka sahut urang dalam pargata itu: "Ini suruhan raja Nagara-Dipa, mambawa lanang sarta bingkis pada raja Cina ini. Nama raja-dutanya Wiramartas." Maka suruhan itu kembali datang barkata saparti katanya nang pada pargata saparti itu. Sudah itu maka syahbandar manyuruhkan urang manyuruh suruhan itu mamasang bedil sarta bunyi-bunyian. Sudah itu maka suruhan itu mamasang bedil bargamal rebab dan suling calampung sarta baraga-raga itu pada bandar Cina cara Cina dan sorak-sorak tanda sama suka muafakat itu. Maka syahbandar mahadap mangkubumi Cina katanya: "Hai mangkubumi, adapun di palabuhan itu utusan raja Nagara-Dipa, mambawa surat sarta bingkis pada raja kita. Nama raja-dutanya itu Wiramartas." Maka raja Cina manyuruh mangkubumi manghimpunkan manteri pada pangadapan. Sudah barhimpun manteri itu - ada kira-kira ampat ribu, sama dangan upacaranya cara Cina dan rakyatnya itu tiada terbilang - maka suruhan itu disuruh panggil. Maka syahbandar mambawa suruhan itu sarta bingkis sakaliannya, diarak dangan upacaranya cara Cina sarta bunyi-bunyian sarta barsorak-sorak itu. Sarta raja Cina sudah turun pada pangadapan itu dangan danang-danang kira-kira urang saribu dan upacaranya - itu parhiasan karajaannya - kira-kira dua ribu, sarta bunyi-bunyian; tahtanya mambari hebat. Hanya mangkubumi nang hampir pada raja itu. Maka suruhan itu datang, surat ditarima ulih mangkubumi, maka diparsambahkannya pada raja itu, maka ditarimanya. Sudah itu maka disuruh baca pada padrinya itu. Sudah dibacanya sarta sagala bingkis itu ditarima ulih mangkubumi, maka raja pun kembali sarta bunyi-bunyian, sarta bedil disuruh sulat urang. Sakaliannya urang sama kembali Wiramartas pun kembali pada tampatnya. Kamudian daripada itu Wiramartas ampat lima kali dijamunya ulih mangkubumi makan-minum itu - tiada tarsebut lamanya itu - musim pun datang angin kembali, maka raja Cina dihadap urang saparti pada pangadapan dahulu. Tahtanya saparti dahulu jua itu. Maka Wiramartas dipanggil raja itu, datang. Kata raja: "Hai Wiramartas, isuk lusa barang kahandak saudara beta raja Nagara-Dipa itu manyuruh kapada beta, jangan bartaha-taha. Dan ini surat beta sarta surat pambalas beta: urang ampat puluh, pandai berhala sapuluh, kim ka merah sakodi, kimka kuning sakodi, kimka biru sakodi, kimka putih sakodi, kimka hitam sakodi, kimka hijau sakodi, air amas sapuluh gantang, sawrna-warna sutera sapuluh gandang, pinggan sawarna-warna pinggan saribu, mangkuk basar saribu, mangkuk kacil saribu, cupu sawarna-warna cupu saribu-saribu, atal sapuluh pikul, manyan sapuluh pikul." Sudah itu sarta surat disarahkan maka Wiramartas diparsalinnya baju bartulis air amas dan kain sutera merah dan padang Jampun satu dan cindai ampat lambar; dan sagala awak parahu itu diparsalinnya salambar-salambar tapih cindai sarta kain sarasah itu. Sudah damikian maka Wiramartas mamohon, sarta dihantarkan dangan upacara sarta bunyi-bunyian. Raja pun pulang ka istananya, sakalian urang sama pulang masing-masing ka rumahnya itu. Wiramartas pun datang pada parahunya. Sudah itu maka ia barlayar, malam dan siang, tiada tarsebut di tangah laut itu. Wiramartas datang pada palabuhan Nagara-Dipa itu, maka tardangar ulih raja khabarnya datang itu sarta bunyi bedilnya. Maka Wiramartas itu mandirikan upacara parahu itu: panji-panji, umbul-umbul dan gamalan bunyi-bunyian. Maka manteri bandar itu manghadap pada Aria Magatsari manyambahkan utusan datang itu. Maka Aria Magatsari mahalukan ka palabuhan itu lawan parahu tanggahan namanya Si Carang Padap. Panjangnya sapuluh depa. Anjil-anjilnya kumbala rajasa barkakitir amas bartirai amas. Sulanya basi malila. Pabalahnya barkayuh ampat puluh, sama mamakai tapih sarasah nugraha raja. Parahu itu barkayuh tangkasnya saparti burung tarbang rupanya, saparti tulis. Kajangnya cindai merah. Tubuh parahu itu bartulis galuga pahul dan air amas. Aria Magatsari duduk di lampit bartulis air amas, barkandaga barumbai-rumbai amas, hudutannya bartutul amas, sawung-galing amas barmata merah dan awinan tumbak dua sama diparamas. Dan Patih Baras dan Patih Pasi, Patih Luhu, Patih Dulu itu maikutkan sarta kandaga, lampit, hudutan paring tulis, sama sabuah-sabuah saurang parahu itu. Maka datang Aria Magatsari ka palabuhan, maka Wiramartas itu dibawanya manghadap raja dan bingkis itu sarta surat raja Cina. Maka raja Nagara-Dipa itu dihadap Tumanggung Tatah Jiwa dan Sang Panimba Sagara, Sang Pambalah Batung, Sang Jampang Sasak, Sang Pangaruntun Manau, sarta manteri sarawisa dan manteri mandung, sarta dangan urang kaparak-kaparak itu. Maka Aria Magatsari dan Wiramartas itu datang manyambahkan surat raja Cina dangan sagala bingkis itu dan pasan raja Cina. Sudah diparsambahkan dan surat sudah dibaca sukalah raja itu, dan sagala nang mandangar surat itu sama suka hatinya. Maka sagala manteri itu sama dianugarahi bingkis dari Cina itu ulih raja, dahulunya Aria Magatsari dan Tumanggung Tatah Jiwa, Wiramartas diparsalin pula ampat panjanang, sarta parampuan dua urang. Yang lumpat maadam itu sama diparsalin dua-dua panjanang. Maka sagala bingkis itu sama disarahkan pada Wargasari nang manggaduh gadung itu. Pandai berhala nang sapuluh urang itu disuruh paliharakan pada Aria Magatsari. Sudah itu raja pun kembali ka istananya; sagala urang pulang masing-masing ka rumahnya. Kamudian daripada itu maka raja manyuruhkan pandai berhala itu barbuat berhala gangsa dua laki isteri, basarnya saparti budak. Hatta barapa lamanya ia barbuat, jadilah berhala itu. Maka diparsambahkannya pada raja itu, maka raja manyuruh mamanggil kaum bujangga ampat puluh itu, datang. Maka kata raja: "Hai kaum bujangga, berhala gangsa ini satahun sakali gosok lawan pasir nang halus, supaya jangan bardaki, sudah itu lulur dangan narawastu. Sudah itu hukup dangan manyan dangan bunga melur dan campaka dan pudak tiap-tiap malam jumaat, jangan menanti kusuruh. Dan tiap-tiap hari Jumaat manghadap berhala itu. Maka berhala cendana itu angkau buangkan ka laut, berhala gangsa ini angkau taruh di dalam candi itu bakas tampat berhala cendana itu; diparbaiki dan diparmuliakan saparti nang sudah tarsebut itu. Hatta barapa lamanya kamudian daripada itu nageri Nagara Dipa itu bartambah-tambah makmur, suka ramai. Banyak urang barbaniaga, saparti Cina dan Malayu, urang Johor, urang Aceh, urang Malaka, urang Minangkabau, urang Patani, urang Mangkasar, urang Bugis, urang Sumbawa, urang Bali, urang Jawa, urang Bantan, urang Palembang, urang Jambi, urang Tuban, urang Madura itu, urang Walanda, urang Makkau, urang Kaling. Ada nang satangahnya itu bardiam sakali, urang dagang-dagang itu. Banyaklah nang tiada tarsebut