Sistim imun

Tumatan Wikipidia basa Banjar, insiklupidia bibas
Loncat ke navigasi Loncat ke pencarian

Sistim imun atawa sistim kataguhan adalah sel-sel wan banyak susunan biologis lainnya nang batanggung jawap atas imunitas, yaitu patahanan pada urganisma gasan malindungi awak tumatan pangaruh biologis luar lawan cara maminandui wan mambunuh patogen. Pahadangan ngitu, tanggapan kolektif wan takurdinasi matan sistim imun awak ka paminanduan zat asing disambat respons imun. Sakira kawa baguna baik, sistim ngini cagar maminandui bamamacam pangaruh biologis luar nangkaya matan jangkitan, bakteri, virus sampai parasit, wan mahancurakan zat-zat asing lain wan mamusnahakan bubuhannya matan sel wan jaringan urganisma nang wigas sakira tatap baguna sacara nurmal.

Manusia wan vertebrata barahang lainnya baisi mekanisme partahanan nang kompleks, nang kawa dibagi manjadi sistim imun bawaan wan sistim imun adaptif. Sistim imun bawaan marupakan bantuk partahanan panambaian nang maumpatakan panghalang parmukaan, tanggapan paradangan, sistim komplémén, wan komponén sélulér. Sistem imun adaptif bakambang maraga diaktipakan ulih sistim imun bawaan wan mamarluakan waktu gasan kawa maampahakan réspons partahanan nang labih kuat wan khusus. Imunitas adaptif (atawa dapatan) membentuk memori imunologis setelah respons awal kapada patogen wan maulah parlindungan nang labih ditingkatakan pada partamuan lawan patogen nang sama limbah itu. Tindakan imunitas dapatan ngini manjadi dasar matan pamaksinan.

Gangguan pada sistim imun kawa barupa imunodefisiensi, penyakit autoimun, panyakit inflamasi, wan kanker.[1] Imunodefisiensi kawa tajadi wayah sistim imun kurang aktip sahingga kawa manimbulakan jangkitan baulang wan kawa mangancam jiwa.

Sajarah imunologi[babak | babak asal mulanya]

Imunologi adalah ilmu nang mampalajari struktur wan fungsi sistim imun. Imunologi awalnya asalnya tumatan ilmu mikrobiologi. Imunitas panambaiannya dikatahui wayah ada wabah Athena pada 430 SM. Thukidides mancatat urang nang wigas matan panyakit sabalumnya kawa batahan wan kada takana panyakit pulang.[2] Lambat laun, diciptaakan istilah "immunity" nang diturunakan matan istilah Latin "immunitas" gasan manggambarakan resistensi samacam itu. Pada abad ka-10, duktur Iran Al-Razi marupakan urang panambaian nang mambidaakan antara cacar (smallpox) wan campak (measles) wan jua mancatat kamungkinan teori panambaian pasla imunitas dapatan (acquired immunity). Pada abad ka-11, duktur wan filsuf Ibnu Sina mausulakan jua teori labih lanjut gasan imunitas dapatan.[3]

Pada tahun 1000 M, bangsa Cina dilapurakan sudah mampraktikakan bantuk imunisasi ngini lawan mahirup bubuk karing nang asalnya tumatan kulimbit lesi cacar. Pada awal abad ka-18 mancungul minat hanyar pada imunitas dapatan malalui pamakaian variolasi sabagai tindakan pancagahan, yaitu lawan mamasukakan sapalih matan lesi pandarita cacar ka dalam tubuh urang nang wagas. Praktik variolasi gin magin umum dilakukan Inggris pada tahun 1720-an maraga usaha Mary Wortley Montagu, bininya duta basar Inggris gasan Konstantinopel (sakarang Istanbul), nang maamati akibat positifnya wan manggawiakannya ka kakanakannya. Pada tahun 1798 Edward Jenner mampublikasiakan hasil vaksinasinya nang panambaian, mamakai nanah matan pandarita cacar sapi (cowpox) wan disuntikakan ka saurang kanak bangaran James Phipps.[3]

Pangamatan imunitas dapatan salanjutnya ditaliti ulih Louis Pasteur pada tahun 1880 pasal vaksinasi wan pambuktian teori kuman panyakit.[4] Teori itu baujar lamun panyakit disababakan ulih mikroorganisme, wan teori ngini marupakan parlawanan matan teori panyakit wayah itu, nangkaya teori miasma nang baujar panyakit disababakan ulih uap atawa kabut baracun nang diyakini tadiri matan partikal-partikal matan bahan pambusuk wan kawa diidentifikasi lawan baunya nang busuk.[5] Labih lanjut, Robert Koch mambuktiakan teori kuman ngini pada 1891, gasan itu inya diberikan pangharagaan Nobel pada 1905. Inya mambuktiakan amun mikroorganisme marupakan panyebab matan panyakit infeksi.[6] Virus dikonfirmasi sabagai patogen manusia pada 1901 lawan panamuan virus garing kuning ulih Walter Reed.[7]

Imunologi maalami parkambangan luar biasa pada uncit abad ka-19 pada panalitian imunitas humoral wan imunitas diparantarai sel.[8] Paul Ehrlich mausulakan teori rantai higa nang manjelasakan spesifisitas interaksi antigen-antibodi. Sumbangannya dalam mamahami imunitas humoral diakui lawan pangharagaan Nobel pada 1908, nang baimbaian lawan pangharagaan gasan pandiri imunologi seluler, Elie Metchnikoff.[9]

Palindungan balapis[babak | babak asal mulanya]

Sistim imun awak malindungi organisme matan infeksi lawan palindungan balapis nang sasain dalam sasain tinggi spesifisitasnya (kakhususannya ka janis infeksi). Palindung fisik mancagah patogen nangkara bakteri dan virus mamasuki awak. Amun patogen maliwati palindung itu, sistim imun bawaan manyediaakan palindungan dengan segera dalam hitungan menit hingga jam. Sistim imun bawaan didapati pada samua janis tumbuhan wan binatang.[10] Lamun patogen kawa maliwati réspons bawaan, vértébrata baisi lapisan palindungan salanjutnya yaitu sistim imun adaptif nang diaktifakan ulih réspons imun bawaan. Di sini, sistim imun maadaptasi réspons itu salawas inféksi gasan maningkatakan paminanduan patogén itu. Réspons ngini lalu dipartahanakan imbah patogén dimusnahakan dalam wujud mémori imunologis sahingga pada hari kaina sistim imun adaptif kawa malawan patogén nang sama wan labih lakas wan éféktif.[11]

Sistim imun bawaan wan sistim imun adaptif kaduanya baisi komponén sélulér wan humoral, wan masing-masing mambariakan imunitas diparantarai sél wan imunitas humoral. Imunitas diparantarai sél digawi ulih sél-sél imun nangkaya neutrofil, makrofag, sél NK, wan limfosit, walau imunitas humoral digawi ulh komponen talarut nangkaya antibodi wan protéin komplémén. Antibodi adalah protéin nang marupakan produk matan sel B nang taaktivasi nang gawiannya dalam manétralakan patogén wan ma-inisiasi prosés imunologi nang lain nangkaya paaktifan sistim komplémén, paaktifan pambunuhan sél NK, sél T sitotoksik, wan sél-sél éféktor lainnya.[12]

Bahan acuan[babak | babak asal mulanya]

  1. ^ O'Byrne KJ, Dalgleish AG (Aug 2001). "Chronic immune activation and inflammation as the cause of malignancy". British Journal of Cancer. 85 (4): 473–83. doi:10.1054/bjoc.2001.1943. PMC 2364095alt=Dapat diakses gratis. PMID 11506482. 
  2. ^ Retief F, Cilliers L (1998). "The epidemic of Athens, 430-426 BC". S Afr Med J. 88 (1): 50–3. PMID 9539938. 
  3. ^ Plotkin S (2005). "Vaccines: past, present and future". Nat Med. 11 (4 Suppl): S5–11. PMID 15812490. 
  4. ^ Karamanou, Marianna; Panayiotakopoulos, George; Tsoucalas, Gregory; Kousoulis, Antonis A.; Androutsos, George (2012-3). "From miasmas to germs: a historical approach to theories of infectious disease transmission". Le Infezioni in Medicina: Rivista Periodica Di Eziologia, Epidemiologia, Diagnostica, Clinica E Terapia Delle Patologie Infettive. 20 (1): 58–62. ISSN 1124-9390. PMID 22475662. 
  5. ^ The Nobel Prize in Physiology or Medicine 1905 Nobelprize.org, Diakses 8 Januari 2007.
  6. ^ Major Walter Reed, Medical Corps, U.S. Army Walter Reed Army Medical Center. Diakses 8 Januari 2007.
  7. ^ Doherty, Michelle; Robertson, Morag J. (2004-12). "Some early Trends in Immunology". Trends in Immunology. 25 (12): 623–631. doi:10.1016/j.it.2004.10.008. ISSN 1471-4906. PMID 15530829. 
  8. ^ The Nobel Prize in Physiology or Medicine 1908 Nobelprize.org, Diakses 8 Januari 2007.
  9. ^ Litman G, Cannon J, Dishaw L (2005). "Reconstructing immune phylogeny: new perspectives". Nat Rev Immunol. 5 (11): 866–79. PMID 16261174. 
  10. ^ Kurosaki T, Kometani K, Ise W (Maret 2015). "Memory B cells". Nature Reviews. Immunology. 15 (3): 149–59. doi:10.1038/nri3802. PMID 25677494. 
  11. ^ Forthal, Donald N. (2014-08-15). "Functions of Antibodies". Microbiology Spectrum. 2 (4): 1–17. ISSN 2165-0497. PMC 4159104alt=Dapat diakses gratis. PMID 25215264.