Lompat ke isi

Pulantan

Tumatan Wikipidia Banjar, kindai pangatahuan

Pulantan atawa dalam bahasa Indunisia dingarani Pulai baisian ngaran ilmiah Alstonia spp. Manurut ahli Botani, ada anam macam kayu Pulantan nang kaanamnya bangaran A. angustifolia Wall., A. angustiloba Miq., A. macrophylla Wall., A. pneumatophora Backer,  A. scholaris (L.) R. Br. lawan A. spathulata Blume. Diantara anam macam tanaman kayu Pulantan ini, A. scholaris (L.) R.Br tamasuk kayu Pulantan nang paling larang haraganya, marganya baisian balang putih polos, kada karas, ringan, biarpun kada tahan lawas kawa digunaakan gasan baulah pati, acuan beton, atawa bilah kurik api.[1]

Morfologi[babak | babak asal-mulanya]

Rujukan nang lain mamadahakan bahwa Pulantan nang baasal matan genus Alstonia baisian 40 macam spesies, dua macam baasal matan dairah tropis Afrika, ampat macam di Australia, lima walas macam di dairah Pasifik, dua walas macam di dairah Malesiana, sisanya di banua Asia.[2]

Marga ada banyak macam kayu Pulantan di dunia, di dalam tulisan ini wara mambahas morfologi Pulantan dalam wilayah genus, kada dalam wilayah spesies nang bamacam-macam. Pulantan manurut kabanyakannya baisian kayu nang babalang putih kakuningan, serat kayunya rata, batikstur halus, sadikit mangkilap, dijapai tarasa licin, kada talalu karas.[2]

Tinggi rapun Pulantan kawa hingkat 40 m. Batang luarnya babalang hijau tuha, kulit batangnya kada babau tagal baisian rasa nang liwar pahit lawan banyak bagatah. Akarnya tamasuk janis akar tunggang nang babalang habuk. Daunnya babalang hijau mangkilap nang intangan bawahnya babalang hijau anum, tamasuk janis daun manjari. Kambangnya tipe majemuk, kalupaknya bulat hintalu, babalang putih kakuningan, malarak di bulan Oktober, baisian bau nang harum. Buahnya babantuk nang kaya kacang polong, babalang putih, baisian banyak bigi nang halus-halus.[3]

Habitat[babak | babak asal-mulanya]

Manurut Kabiasaan, Pulantan tamasuk tanaman nang kawa manyasuaiakan diri lawan kaadaan alam nang bamacam-macam. Pulantan tumbuh di tanah nang baisi katinggan 0-1000 mdpl, kawa jua tumbuh di atas batu karang, di dataran nang randah atau di dairah pesisir nang baisian curah hujan antara 1000-3800 mm/tahun.[4] Kawa jua tumbuh di dairah rawa gambut, dairah nang banyunya pasang-surut, sampai di dairah nang tanahnya karing.[3] Rapun kayu Pulantan sabujurnya tumbuh di banyak dairah, parak di samunyaan pulau nang ada di Indunisia kawa ditamuakan tanaman ini.[5]

Manpaat[babak | babak asal-mulanya]

Kayu Pulantan kada talalu dikatujui dimanpaatakan gasan bahan bangunan, marganya kada talalu kuat lawan capat baubah bantuk amun kalambaban udara baubah. Biarpun kaya itu, Pulantan banyak dimanpaatakan asan bahan pakakas rumah tangga, ukiran atawa patung.[3]

Daun Pulantan kawa dimanpaatakan gasan bahan baulah nginuman Nutraceutical atawa nginuman kasihatan. Daun Pulantan mangandung karbohidrat, lemak, habu, banyu, lawan protein. Samunyaan kandungan nang tadapat dalam daun Pulantan tadi bamanpaat gasan awak manusia. Kandungan Protein nang banyak dalam Pulantan kawa dijadiakan suplemen gasan mancukupi protein harian manusia, Lemak bapungsi gasan sumbar energi lawan malindungi awak matan hawa nang dingin, kandungan habu nang dimaksud ialah unsur kalsium, kalium, fosfor, besi lawan magnesium, samunyaan baik gasan kasihatan, karbohidrat bapungsi gasan sumbar energi awak manusia.[4]

Kulipak kayu Pulantan kawa dimanpaatakan gasan bahan baku ubat nang bahasiat maampihi sakit rakungan, panas awak lawan darah tinggi. Gatah Pulantan kawa dimanpaatakan gasan bahan baulah gulaan karit tagal kualitasnya randah.[3]

Catatan Batis[babak | babak asal-mulanya]

  1. ^ admin. "Pulai (Alstonia spp) – BPDAS Barito" (dalam bahasa Inggris). Diarsipkan dari versi asli tanggal 2023-03-13. Diakses tanggal 2023-03-13. 
  2. ^ a b Andianto, Andianto (2011). "Perbandingan Ciri Anatomi Kayu Dan Kulit 3 Jenis Pulai (Alstonia SP.)". Jurnal Penelitian Hasil Hutan (dalam bahasa Indonesia). 29 (4): 356–368. doi:10.20886/jphh.2011.29.4.356-368. ISSN 0216-4329. 
  3. ^ a b c d "Pulai Si Eksotis | Dinas Lingkungan Hidup dan Kehutanan DIY". dlhk.jogjaprov.go.id. Diarsipkan dari versi asli tanggal 2023-03-14. Diakses tanggal 2023-03-14. 
  4. ^ a b Batlayeri, Sentia; Kaihena, Martha; Nindatu, Maria; Jotlely, Hery (2022-06-01). "PERBANDINGAN MAKRONUTRIEN DAUN Alstonia sp. DI DESA NYAMA PULAU MOA DAN DESA LATUHALAT PULAU AMBON". Biofaal Journal (dalam bahasa Inggris). 3 (1): 33–42. doi:10.30598/biofaal.v3i1pp33-42. ISSN 2723-4959. 
  5. ^ Hidayat, S.; Juhaeti, T. (2013-03-03). "Asosiasi Alstonia Spp Di Taman Nasional Ujung Kulon". Bionatura (dalam bahasa Indonesia). 15 (1): 218271. ISSN 2443-2679.