Nasi Astakona

Astakona adalah istilah tumatan sastra Indonesia lawas nang baarti sagi banyak. Nasi astakona baarti gambaran dari banyaknya sasajian nang dihidangakan di wadah, talam nang batumpang ‘banyak’ tiga atawa lima susun. Banyaknya sasajian nitu manjadi kasatuan hidangan nang tadiri matan tiga kumpunin pukuk kudapan, yaitu nasi, lauk pauk, wan buah-buahan. Hidangan nasi astakona asalnya tumatan tradisi kasultanan Banjar gasan karasmin tartantu atawa bamakanan lawan tamu kahurmatan. Tagal sasain hari nasi astakona dipakai jua gasan karasmin ‘badadapatan’, yaitu bamakanan gasan pangantin imbah batatai di palaminan.

Manyinduk pamulaan nasi astakona lawan sinduk kayu ulih tukuh binian tuha wan dijulung ka tamu kahurmatan. Pabila di karasmin pengantin, nasi nitu dijulung ka badudua pangantin, imbah nitu diumpati ulih urang-urang sasuai wan kadudukan. Astakona dasarnya kada mamakai pakakas makan nangkaya sinduk wan garpu, lantaran di situ basadia banyu gasan mambasuh tangan wan sarbit kain.