Mitologi Yunani

Tumatan Wikipidia Banjar, kindai pangatahuan
Lukisan nang manggambarakan Buhan dewa Yunani batamuan nang diulah ulih Jacopo Zucchi

Mitologi Yunani adalah sakumpulan mitus wan legenda nang baasal matan Yunani Bahari wan baisi kisah-kisah buhan dewa wan pahlawan, sifat dunia, asal-usul lawan makna matan paraktik ritual wan kultus urang Yunani Bahari. Mitologi Yunani marupakan bagian matan agama di Yunani Kuno. Mitologi Yunani banyak baisi kisah dewa wan manusia katurunan dewa nang disambat hero. Mitologi Yunani banyak banar mampangaruhi budaya, sani, wan sastra dunia Barat wan jadi bagian warisan wan bahasa Barat. Mitologi marupakan aspek panting dalam kahidupan sahari-hari masyarakat Yunani Bahari. Urang Yunani bahari mamandang mitologi ngini sabagai bagian matan sajarah buhannya. Buhannya mamakai mitologi ngini gasan manjalasakan pinumina alam, bamacam budaya, kunflik, wan parsahabatan.[1] Buhan sajarawan mudirin mampalajari mitologi Yunani sakira tahu kaya apa kaadaan politik, agama, wan paradaban di Yunani Kuno, lawan gasan mandapatakan pamahaman kisah pambantukan mitos ngitu sorang.[2]


Mitologi Yunani dibagi jadi talu pariudi yaitu:

  1. Zaman buhan Dewa (Theogonia atawa karanakan buhan dewa) nang baisi mitos kisah asal mula dunia, buhan dewa, wan umat manusia.
  2. Zaman pas dewa wan manusia hidup baimbaian nang baisi kisah-kisah interaksi awal antara buhan dewa, satangah dewa, wan manusia.
  3. Zaman buhan pahlawan, nang baisi zaman dimana intervensi buhan dewa mulai bakurang wan labih diduminasi ulin paran pahlawan nang kaya misalnya kisah perang Troya.[3]

Mitologi[babak | babak asal-mulanya]

Pangabirian Uranus: lukisan dinding ulih Vasari & Cristofano Gherardi (c. 1560, Sala di Cosimo I, Palazzo Vecchio, Firenze).

Zaman buhan Dewa dimulai matan Khaos, sabuting entitas nang kada babantuk wan mistirius. Matan Khaos ngini cungul lah Gaia (Dewi Bumi) lawan sapalihan makhluk dewata nang lainnya nang kaya Eros (Cinta), Tartaros (Parut Bumi), Erebos (Kakadapan), wan Niks (Malam). Matan Niks wan Erebos ngini imbahtu maranakakan Aither (Langit Atas), wan Hemera (Siang). Imbahtu Gaia maranakakan Uranus (Dewa Langit) wan Pontus (Dewa Laut) biar kada baisi laki, imbah ngitu Uranus jadi laki Gaia. Matan Uranus wan Gaia diranakakanlah buhan Titan nang tadiri matan anam titan lakian, yaitu Koios, Krios, Kronos, Hiperion, Lapetos, wan Okeanos, imbah ngitu anam Titan babinian, yaitu Mnemosine, Foibe, Rea, Theia, Themis, wan Tethis. Imbah Kronos diranakakan, Gaia wan Uranus mamagatakan bahwa kada bulih ada lagi Titan nang diranakakan. Anak Gaia wan Uranus nang diranakakan imbah ngitu adalah buhan Kiklops (raksasa bamata sabuting) wan Hekatonkheire (raksasa batangan saratus).[1]

Buhan Titan imbah ngitu mambaruntak lawan Uranus imbahtu Kronos kawa jadi raja buhan Dewa. Gara-gara takutan dikhianati ulih kakanakannya maka Kronos managuk hidup-hidup samunyaan anaknya kacuali Zeus nang kawa disalamatakan ulih Rea, bininya Kronos. Zeus imbah ngitu kawa mangalahakan Kronos wan jadi raja buhan Dewa. Kronos wan buhan Titan dikuring di Tartoros, kacuali atlas nang dapat hukuman gasan maangkat langit. Imbah kakuasaan buhan Titan gugur, Pantheon dewa wan dewi hanyar pun cungul. Salah sabuting kalumpuk dewa Yunani nang paling penting adalah buhan dewa Olimpus, nang badiam di puncak Gunung Olimpus di bawah kapamimpinan Zeus.[1]

Catatan Batis[babak | babak asal-mulanya]

  1. ^ a b c Mohammad Zazuli, Sejarah Agama Manusia, (Jakarta: Buku Seru, 2019), cet.II
  2. ^ "Volume: Hellas, Article: Greek Mythology".Encyclopaedia The Helios.(1952). 
  3. ^ G. Miles, Classical Mythology in English Literature, hlm. 35