Gangan Garih Batanak
Gangan Garih Batanak merupakan masakan khas Kalimantan Selatan. Garih bararti iwak nang dikaringakan atawa dijamur, biasanya mamakai iwak haruan (gabus), iwak tauman, atawa bisa jua iwak telang (tenggiri). Batanak bararti bajarang. Garih Batanak nang bararti iwak karing nang dijarang, biasanya ditambahi hintalu (hayam/itik) wan bakuah santan (parahan lamak nyiur). Gangan ngini banyak didapati wadah urang nang ada hajatan (tarutama daerah hulu sungai), atawa di pasar wadai (bulan puasa/ ramadhan).
Rasanya nang khas wan nyaman maulah urang banafsu makan, nang kayapa kada manggugah salira, gangan ngini salain nyaman rasa khas nya iwak karing wan gurihnya santan ditambah sigarnya asam dari balimbing wuluh wan bumbu-bumbu dapur. Gangan ngini pas banar mun dikawani wan nasi nang panas.
Bahan:
- iwak garih (haruan, tauman,telang)
- hintalu (hayam/itik)
- santan
- bawang habang
- bawang putih
- kaminting
- janar
- sahang
- lumbuk habang
- lumbuk hijau
- balimbing wuluh
- uyah
- banyu asam kamal
Cara maulah:
- barasihi garih lalu ditatak-tatak, randam satumat dalam banyu panas supaya kada masin banar. tiisakan.
- buati banyu asam kamal haru sampai rata wan kapinggirakan satumat gasan mamirik bawang putih, kaminting, janar, wan sahang.
- bawang habang, lumbuk habang, lumbuk hijau, balimbing wuluh ditatak-tatak. kapinggirakan.
- jarang santan satangah likat sampai manggurak. imbah itu buati bumbu nang dipirik wan bahan nang ditatak, wan tambahi uyah sadang salira.
- masak sampai manggurak lagi hanyar buati iwak garih. diharu sampai bacampur bumbu.
- kada lawas buati hintalu, haru bagamat, supaya hintalunya kada pacah.
- lamun sudah masak hintalunya, bangkit siapkan di piring atawa mangkuk.