Gabriel García Márquez
| Gabriel García Márquez | |
|---|---|
 | |
| Ranak | Gabriel José de la Concordia García Márquez 6 Marat 1927 Aracataca, Kolombia |
| Habis umur | 17 April 2014 (umur 87) Ciudad de Mexico, Meksiko |
| Kabangsaan | Kolombia |
| Pandidikan | Universitas Cartagena |
| Aliran sastra | Novel, Kisah Handap |
| Angkatan | Boom Amerika Latin, realisme magis |
| Karya nang dipinandui | Saratus Tahun Kasunyian, Tumbangnya Seorang Diktator, Cinta di Tengah Wabah Kolera |
| Pangharagaan | Hadiah Nobel Sastra 1982, Rómulo Gallegos |
| Pasangan | Mercedes Barcha Pardo |
| Anak | Rodrigo García Barcha, Gonzalo García Barcha |
| Tanda tangan |  |
| Situs web | |
| https://www.gabomarquez.com/ | |
Gabriel García Márquez (6 Marit 1927 – 17 April 2014) yaitu saikung panulis wan aktipis pulitik matan Kolombia. Sidin diranakakan di kuta Aracataca di dapartimin Magdalena, tagal hidupnya lawas dihabisakan di Meksiko wan Irupa. Inya suah dibarii panghargaan-panghargaan nang bagingsi kaya Rómulo Gallegos wan Nobel Sastra maraga karya-karyanya nang harat. Inya dianggap sabagai salah sabuting panulis ganal dalam sastra babasa Spanyol wan jadi tukuh kunci dalam garakan Latin American Boom pas tahun 1960-an wan 1970-an. Inya dipinandui maraga gaya khasnya nang disambat realismo mágico atawa realisme magis, nang manggabungakan gaya fantastis wan kahidupan sahari-hari.
Karya Gabriel García Márquez Cien años de soledad (Saratus Tahun Kasunyian), nang ditarbitakan tahun 1967 wan sudah ditarjamahakan ka dalam puluhan bahasa. Karya-karyanya manyual tima nang kaya kasunyian, kakuasaan, cinta, wan realitas susial wan pulitik Amerika Latin.[1][2]
 |
Wikiquote baisi kuliksi kutipan nang bakaitan lawan: |
Kahidupan
[babak | babak asal-mulanya]Gabriel García Márquez diganalakan ulih kai wan nini matan subalah uma, nang baisi banyak pangaruh lawan gaya bakisah wan panulisannya. Kainya saurang pinsiunan tantara maisi masa kakanakan García Márquez lawan kisah-kisah perang wan pulitik, amun nang nini banyak bakisah-kisah sual mitos wan supranatural—campuran nang kainanya jadi dasar gaya realisme magisnya.
Inya bakuliah hukum di Universitas Nasional Kolombia di Bogotá, tapi kada tuntung maraga inya labih katuju lawan jurnalisme wan sastra.
Inya kawin lawan Mercedes Barcha wan memiliki dua ikung anak. García Márquez tinggal di banyak nagara pas inya masih hidup, tamasuk Meksiko, Kuba, wan Spanyol. Inya jua dikanal parak lawan tukuh tarkanal lain nang kaya Fidel Castro wan panyair Pablo Neruda.[3][2]
Batajun ka Dunia Jurnalistik wan Sastra
[babak | babak asal-mulanya]García Márquez mamulai gawiannya jadi jurnalis di babagai kuran di Kolombia wan nagara lain di Amerika Latin. Inya jua suah jadi koresponden luar nagri. Gawian jurnalistiknya bapangaruh banar lawan gaya panulisannya—bahasa nang lugas, tajam, tapi tatap puitis.
Pas tahun 1967, inya maulah Cien años de soledad, nang jadi karya magnum opus-nya. Novel ngini mangisahi kisah tujuh turunan kaluarga Buendía di kuta incaan nang bangaran Macondo, nang tainspirasi matan kampung inya jua. Buku ngini langsung dapat pujian internasiunal wan manjadiakan García Márquez tukuh sastra dunia.[4]
Karya panting lainnya nang kaya:
- El otoño del patriarca (1975)
- Crónica de una muerte anunciada (1981)
- El amor en los tiempos del cólera (1985)
- El general en su laberinto (1989)
- Del amor y otros demonios (1994)
Panghargaan wan Pangaruh
[babak | babak asal-mulanya]Pas tahun 1982, García Márquez dapat Panghargaan Nobel Sastra maraga novel wan kisah handapnya. Inya jadi panulis Kolombia panambaian wan salah satu matan sadikit panulis Amerika Latin nang manarima panghargaan ngini.
García Márquez baisi pangaruh ganal gasan sastra dunia, hususnya dalam maminanduiakan realisme magis ka sastra dunia. Gaya wan tima kisahnya mainspirasi banyak panulis di Amerika Latin wan dunia.[5]
Kamatian
[babak | babak asal-mulanya]Gabriel García Márquez jiun tanggal 17 April 2014 di Mexico City maraga kumplikasi panyakit kanker wan infeksi paru-paru. Kamatiannya jadi kasadihan gasan dunia sastra.
Warisan García Márquez tatap hidup dalam karya-karyanya nang abadi. Banyak universitas nang mampalajari karyanya, wan pangaruh karyanya nang luas gasan parkambangan sastra kontemporer. Kuta Aracataca sudah jadi tujuan wisata sastra, wan Macondo sudah jadi simbul dunia magis wan penuh makna gasan pambaca karyanya.[6]
Jujuhutan
[babak | babak asal-mulanya]- ↑ "Gabriel Garcia Marquez | Books, Short Stories, Magical Realism, Nobel Prize, & Facts | Britannica". www.britannica.com (dalam bahasa Inggris). 2025-04-14. Diakses tanggal 2025-05-15.
- 1 2 Green, Penelope (2020-08-23). "Mercedes Barcha, Gabriel García Márquez's Wife and Muse, Dies at 87". The New York Times (dalam bahasa Inggris). ISSN 0362-4331. Diakses tanggal 2025-05-15.
- ↑ CakraDunia.co (2024-12-27). "Kutukan yang Diwariskan Turun Temurun - Esai - Cakra Dunia - Media Online". CakraDunia.co (dalam bahasa Indonesia). Diakses tanggal 2025-05-15.
- ↑ "Where to Start With Gabriel García Márquez". The New York Public Library (dalam bahasa Inggris). Diakses tanggal 2025-05-15.
- ↑ "Gabriel García Márquez – Biographical". NobelPrize.org (dalam bahasa Inggris). Diakses tanggal 2025-05-15.
- ↑ Beggs, Alex (2014-04-17). "Gabriel García Márquez, the Master of Magic Realism, Has Died". Vanity Fair (dalam bahasa Inggris). Diakses tanggal 2025-05-15.