Annemarie Schimmel

Tumatan Wikipidia basa Banjar, insiklupidia bibas
Loncat ke navigasi Loncat ke pencarian
Annemarie Schimmel
Schimmel bonngasse.jpg
Pelat gelas di Bonngasse; Bonn, Jerman
Lahir 7 April 1922
Erfurt, Jerman
Maninggal 26 Januari 2003 (umur 80)
Bonn, Jerman
Pandidikan Doktor dalam kajian peradaban Islam dan bahasa, doktor sejarah agama-agama.
Gawian Iranologis, Sindhologis, Orientalis, Islamolog, pengkaji Sufisme, pengkaji Iqbal
Kuburan Annemarie Schimmel lawan kutipan matan Ali bin Abi Thalib, "Sabujurnya manusia ngitu taguring. Imbah inya mati, maka inya tabangun."

Annemarie Schimmel adalah saurang Orientalis asal Jerman nang banyak manulis kisah Islam wan Sufisme. Dunia Internasional manganal inya sabagai saurang profesor mang mangajar di Universitas Harvard.[1] Pas tahun 1995, Schimmel mandapatakan panghargaan Hadiah Pardamaian oleh Pardagangan Buku Jerman (bahasa Inggris: Peace Prize of The German Book Trade), karena kuntribusinya dalam maulah sintesis Islam wan modern, lawan jua kawa manulis 105 judul buku batima Islam. Inya fasih bapandir dalam basa Farsi, Turki wan Urdu.[2]

Schimmel diranakakan mata kula kalas manangah Protestan, di Erfurt, Jerman.[3] Abahnya adalah saurang pagawai pos, wan mamanya ba'asal matan katurunan kula palayaran wan pardagangan Internasional.[4] Waktu inya lagi halus, hidup inya hibak lawan puisi wan literatur, walaupun kulanya lain bubuhan akademisi. Imbah manuntungakan sakulah manangah di umur 15 tahun, Schimmel bagawi sabagai rilawan di Lambaga Panggawian Jerman (Reichsarbeitsdienst; RAD) salawas anam bulan.[5] Inya mulai manarusakan studinya di Universitas Berlin pas umur 17 tahun, pas Jerman ba'andak di bawah rizim Nazi. Inya banyak dipangaruhi oleh Hans Heinrich Schaeder, saurang pangajar nang manyaranakan inya gasan mangkaji Diwani Shamsi Tabriz; salah sabuting karya Jalaluddin Rumi. Schimmel manjadi sa'i'ikungannya mahasiswi paling anum nang manuntungakan studi doktoral di umur 19 tahun. Pas tahun 1946 di umur 23 tahun, inya manjadi profesor Kajian Arab wan Islam di Universitas Marburg. Schimmel manikah pas tahun 1950-an, imbah ngitu pas tahun 1954 inya manarima gelar doktor kaduanya, kisah Sejarah Agama-agama (Religionswissenschaft) di kota Marburg.

Schimmel diangkat mnjadi profesor Sajarah Agama di Universitas Ankara. Inya mangajar wan mampalajari budaya wan tradisi mistisisme bubuhan urang Turki salawas lima tahun. Inya adalah binian non-muslim pamulaan nang mangajar teologi di Universitas. Pas tahun 1967, Schimmel marasmiakan program kajian Indo-Muslim di Universitas Harvard; wan bagan di fakultas ngitu salawas 25 tahun. Inya dikanal baisi ka'ahlian ingatan fotografi (bahasa Inggris: photographic memory);[1] wan bagawi sabagai konsultan di Museum Seni Metropolitan dalam maidintifikasi potongan manuskrip-manuskrip wan banda-banda nang bahari banar. Sabagai akademisi, inya banyak mambaiki pamahaman masyarakat Barat akan Islam. Salain ngitu, lawan analisis mandalamnya, inya rancak banar manyampaiakan sisi-sisi artistik wan ideologis matan budaya Islam gasan pambaca Eropa wan Amerika.[4] Inya baisi jua perhatian nang tinggi kisah masalah-masalah kesetaraan gender.[6]

Schimmel maninggal di Bonn pas tahun 2003. Sabalum maninggal, inya minta dibaca'akan Surah Al-Fatihah pas inya dikuburakan.[4] Kakawanannya maukir motto hidupnya di atas batu nisannya dalam basa Farsi wan Jerman nang artinya, "Sabujurnya manusia ngitu taguring, wan imbah inya mati, maka inya tabangun."

Referensi[babak | babak asal mulanya]

  1. ^ a b Kinzer, Stephen (2003-02-02). "Annemarie Schimmel, Influential Scholar of Islam, Dies at 80". The New York Times (dalam bahasa Inggris). ISSN 0362-4331. Diakses tanggal 2017-10-06. 
  2. ^ "German scholar on Islam, Dr. Annemarie Schimmel dies - IslamiCity". www.islamicity.org (dalam bahasa Inggris). Diakses tanggal 2017-10-06. 
  3. ^ "Schimmel, Annemarie - Dictionary definition of Schimmel, Annemarie | Encyclopedia.com: FREE online dictionary". www.encyclopedia.com (dalam bahasa Inggris). Diakses tanggal 2017-10-07. 
  4. ^ a b c "The Fountain Magazine - Issue - Annemarie Schimmel Building Bridges between East and West". www.fountainmagazine.com (dalam bahasa Inggris). Diakses tanggal 2017-10-06. 
  5. ^ "Annemarie Schimmel". Harvard Gazette (dalam bahasa Inggris). 2004-12-16. Diakses tanggal 2017-10-07. 
  6. ^ "Gender and Islam". Muslim Social Services Kitchener Waterloo (dalam bahasa Inggris). 2016-07-18. Diakses tanggal 2017-10-06.