Ajak tukup

Tumatan Wikipidia Banjar, kindai pangatahuan
Kakanakan rahatan bakuncang numur manantuakan siapa nang ajak imbahnya pulang.

Ajak tukup adalah ngaran ajakan bacari wan batabun nang biasanya dimainakan ulih panyadikitnya 2 urang.

Cara mamainakan[babak | babak asal-mulanya]

Saikung pamain nang kalah pacangan batukup mata di sabuting tampat nang dianggap sawagai binting, samantara nang lain bacari tampat gasan batabun. Imbah tuntung barikin, maka hanyar pamain nang batukup tadi mancari'i tunggal ikungan urang nang batabun.

Bila sampai tadapat urang nang batabun, nang ajak harus balajuan bukah ka binting sambil manyambat ngaran urang nang katahuan wadah batabunannya. Amun tadahulu nang ajak manjapai binting, maka imbahnya kada pacangan ajak lagi. Kakanakan lain nang masih batabun kawa jua manjapai binting supaya kada jaga jua imbahnya, asal kada katahuan lawan nang ajak.

Imbah sabarataan sudah katahuan tampat batabunannya, maka nang ajak manukup matanya pulang di binting wan kakawanannya maulah barisan di balakangnya. Nang ajak cagar manyambat angka, kakanakan nang ada di urutan angka nang disambat cagar jadi nang ajak amun sabalumnya inya kada bahasil manjapai binting. Amun urutan nang disambat sakalinya adalah kakanakan nang bahasil tadahulu manjapai binting pas katahuan tampat patabunannya, maka si ajak cagaran ajak pulang wan pamainan disambung.