Kasisiur

Kasisiur atawa Capung dalam bahasa Indunisia adalah salah sabuting binatang nang masuk ka dalam kingdom animalia, filum artrophoda, kelas insecta wan ordo odonata.^[1]

Morfologi

Morfologi atawa panampakan awak kasisiur tardiri atas tiga bagian nang utama yaitu kapala, thorax atawa dada, lawan abdomen atawa parut. salihan kasisisur ada jua baisian organ tambahan nang kaya halar, batis, antina, wan bagian awaknya nang lain.^[2]

Habitat

Habitat atawa tampat hidup kasisiur kawa kita itihi di sakitaran lingkungan manusia nang kaya parak rumah atawa di taman-taman, kasisiur kawa jua hidup di alam liar nang kaya hutanan, rawa wan lainnya.^[3]

Jenis

Sacara umum, kasisiur nang rancak kita itihi ada dua macam yaitu kasisiur ganal wan kasisiur jarum. kasisiur ganal (subordo Anisoptera) rilatip nyaman dibida'akan matan kasisiur jarum (subordo Zygoptera). Kasisiur ganal umumnya ba'awak rilatip ganal wan hinggap lawan halar tabuka atawa tabantang ka higa. Sadangakan kasisiur jarum umumnya ba'awak halus (tapi ada jua babarapa janis nang lumayan ganal), ba'isi abdumin nang kurus ramping mirip jarum, wan hinggap lawan halar-halar tatukup, tagak manyatu di atas balukuknya.^[4]

Salihan dua janis nang di atas, kasisiur sabujurnya ada 13 Janis. ka-13 janis kasisiur nintu kada saban musim kawa kita itihi. Kasisiur kembara Pantala flavescent, misalnya, cangul rahatan paparakan musim kumarau di Bulan Juni – Juli. Kasisiur lebah garis kuning Rhyothemis phyllis wan Gynacantha subinterrupta cangul rahatan awal wan sapanjang musim panghujan, Bulan September – Oktober. Kasisiur lebah Orthetrum glaucum kawa di'itihi rahatan curah hujan tinggi. Kasisiur parut gipih Potamarcha congener kawa di'itihi rahatan musim kumarau. Kasisiur jala halus Neurothemis fluctuan wan kasisiur baret biru Aethriamanta aetra kawa dlihat sapanjang musim. Kasisiur nang rancak cangul wayah ari kamarian adalah Zyxoma obtusum. Kasisiur ampai kampung Epophthalmia vittaata sundana wan Kasisiur tengger biru Diplacodes trivialis jarang kawa di'itihi wan hidupnya jauh matan kulam atawa dairah nang banyak banyu.^[5]

Daur Hidup

Siklus hidup Kasisiur, mulai hintalu sampai mati imbah matang, balain-lain salawas anam bulan sampai maksimal anam atau tujuh tahun. Kasisiur maandak hintalunya di tatanaman nang ada di parak banyu. Kasisiur ada nang katuju maandak hintalunya di banyu nang tatandak, tapi ada jua Kasisiur nang katuju maandak hintalunya di banyu nang mangalir kada talalu daras. Imbah mamacah, tempayak (larva) Kasisiur hidup wan bakambang di dasar banyu, imbah nintu bamitamurpusis manjadi nimfa, imbahnya kaluar matan banyu babantuk Kasisiur tuha. Kabanyakannya siklus hidup Kasisiur dituntungakan dalam bantuk nimfa, di dalam banyu, inya bahinak mamakai insang internal. Tempayak wan nimfa Kasisiur hidup manjadi binatang karnivora atawa pamakan sarabanya nang ganas. Nimfa Kasisiur nang ukuran awaknya ganal bahkan bakamampuan mamburu dan mamangsa birudu wan anak iwak. Imbah matang atawa diwasa, Kasisiur paling hingkat hidup maksimal salawas ampat bulan.^[6]

Daptar Jujuhutan

^ Tanaman, Proteksi. "Sepasang Capung Berusaha Menyelamatkan Nyawa dari Kepunahan – PROTEKSI TANAMAN" (dalam bahasa Inggris). Diakses tanggal 2023-02-22. ^{[permanent dead link]}
^ "MENGENAL CAPUNG LEBIH DEKAT – Himabio FMIPA UNY". himabio.student.uny.ac.id. Diakses tanggal 2023-02-22.
^ "Capung ( Orthetrum sabina ) - Direktorat Kampus ITB". Direktorat Kampus ITB (dalam bahasa Inggris). Diakses tanggal 2023-02-22.
^ Rizal, Samsul; Hadi, Mochamad (2015-06-17). "Inventarisasi Jenis Capung (Odonata) Pada Areal Persawahan Di Desa Pundenarum Kecamatan Karangawen Kabupaten Demak". Bioma : Berkala Ilmiah Biologi. 17 (1): 16. doi:10.14710/bioma.17.1.16-20. ISSN 2598-2370.
^ "Capung Di Lingkungan B2P2VRP: Serangga Cantik Pengendali Hayati Dan Penunjuk Air Bersih". www.b2p2vrp.litbang.kemkes.go.id. Diarsipkan dari versi asli tanggal 2023-04-25. Diakses tanggal 2023-02-22.
^ "Capung | UNKRIS | Center of Studies". p2k.unkris.ac.id. Diakses tanggal 2023-02-22.

[1] Tanaman, Proteksi. "Sepasang Capung Berusaha Menyelamatkan Nyawa dari Kepunahan – PROTEKSI TANAMAN" (dalam bahasa Inggris). Diakses tanggal 2023-02-22. ^{[permanent dead link]}

[2] "MENGENAL CAPUNG LEBIH DEKAT – Himabio FMIPA UNY". himabio.student.uny.ac.id. Diakses tanggal 2023-02-22.

[3] "Capung ( Orthetrum sabina ) - Direktorat Kampus ITB". Direktorat Kampus ITB (dalam bahasa Inggris). Diakses tanggal 2023-02-22.

[4] Rizal, Samsul; Hadi, Mochamad (2015-06-17). "Inventarisasi Jenis Capung (Odonata) Pada Areal Persawahan Di Desa Pundenarum Kecamatan Karangawen Kabupaten Demak". Bioma : Berkala Ilmiah Biologi. 17 (1): 16. doi:10.14710/bioma.17.1.16-20. ISSN 2598-2370.

[5] "Capung Di Lingkungan B2P2VRP: Serangga Cantik Pengendali Hayati Dan Penunjuk Air Bersih". www.b2p2vrp.litbang.kemkes.go.id. Diarsipkan dari versi asli tanggal 2023-04-25. Diakses tanggal 2023-02-22.

[6] "Capung | UNKRIS | Center of Studies". p2k.unkris.ac.id. Diakses tanggal 2023-02-22.

[1]

[2]

[3]

[4]

[5]

[6]