Hemodialisis
Hemodialisis atau istilahnya cuci darah asalnya dari kata "hemo" artinya darah, wan "dialisis" artinya pamisahan zat-zat talarut. Bararti hemodialisis ini prusis pambarsihan darah dari zat-zat nang kada tapakai. Hemodialisis marupakan tarapi pangganti ginjal nang mamakai mesin gasan maubati gajala wan tanda gegara laju panyaringan glomerulus talalu randah. Cuci darah ini kawa mangaluarakan racun-racun di darah nang biasanya kajadian di urang karacunan ubat atawa zat baracun nang kada kawa diikat albumin. Salain gasan urang nang karacunan darah, cuci darah ini digawi jua hagan urang nang gagal ginjal. Harapannya mun sudah cuci darah ngini umur kawa talawas wan hidup bakualitas dalam artian masih kawa haja bagawian.[1][2]
Jenis Gagal Ginjal[babak | babak asal-mulanya]
Gagal ginjal ini ada dua macam, yaitu:[1]
- Gagal Ginjal Akut marupakan panurunan fungsi ginjal dadakan padahal asalnya ginjalnya nurmal haja.
- Gagal Ginjal Krunis marupakan panurunan fungsi ginjal nang laju panyaringan glomerulusnya kada sampai 15 mL/manit paling kada sudah 3 bulan atau labih. Mun sudah kayaini kamungkinan racun-racun sudah tatumpuk di awak, lalu muncul gajala
Idialnya sabarataan pasien nang laju panyaringan glomerulusnya kada sampai 15 mL/manit kawa dicuci darah. Tapi dipalaksanaan klinis di rumah sakit ada lagi paduman yang dipakai sabagai barikut:[1]
- Laju panyaringan glomerulus kada sampai 10 mL/manit wan ada gajala uremia atawa ada kurang gizi
- Laju panyaringan glomerulus kada sampai 5 mL/manit tanpa gajala
- Kundisi khusus nang kaya paru-paru bangkak, kalium katinggian, atau asidosis metabolik taulang-ulang
Idukasi Cuci Darah[babak | babak asal-mulanya]
Cuci darah ini parlu jalur pambuluh darah hagan maalirakan darah nang cukup salama cuci darah. Jalur nang bagus tu minimal kawa dialiri 200-300 mL darah per manit. Jalur ini ada dua macam, yaitu:[2]
- Jalur samantara liwat pambuluh darah ganal, biasanya di paha (vena femoralis), di gulu (vena jugularis interna), atawa di bawah tulang salangka (vena subclavia).
- Jalur nang parmanen itu liwat AV Shunt, maulah jalurnya harus dioperasi ulih duktur bedah
Cuci darah ini targantung kaparluan masing-masing. jadi satiap urang baisi risip. Risip cuci darah ini isinya langkap, mulai dari targit banyu nang handak dibuang, barapa laju aliran darahnya, laju aliran masin panyaringnya, dusis hiparin (ubat antibaku) supaya darah kada baku, wan satiap cuci darah barapa jam. Kabanyakan cuci darah mintu parlu 9 sampai 12 jam saminggu hagan manyaring sabarataan darah di awak. Tapi biasanya dibagi jadi babarapa kali dalam saminggu. Sakali cuci sakitar 4-5 jam, ada nang dua kali saminggu, talu kali saminggu, ada jua nang sabulan sakali targantung tingkat karusakan ginjal.[2]
Kada sabarataan pasien kawa cuci darah, ada jua nang kuntraindikasi, contohnya urang nangkada kawa jalur pambuluh darah, darahnya baku tarus, panyakikt Alzheimer, diminsia, sindrum hipaturinal, sirusis hati, wan kaganasan.Prugram cuci darah ngini dipadahakan barhasil mun pasien kawa manjalani hidup nurmal lagi, kawa bamamakan nurmal, sel darah merahnya cukup, tensi nurmal, wan kadada karusakan saraf.[3]
Paralatan Cuci Darah[babak | babak asal-mulanya]
Ada lima paralatan nang musti ada mun handak cuci darah, yaitu:[3]
- AVBL (Arterial-Venous Blood Line) yaitu selang plastik nang manyambungakan darah matan selang pambuluh darah ka dialiser, wan mangambungakan darah matan dialiser ka awak pasien
- Dializer (ginjal ulahan) yaitu wadah prusis cuci
- Air Water Treatment, banyu hagan cuci darah dipakai sabagai pancampur dialisat. Banyu ngini bisa banyu PAM atau banyu sumur nang sudah dimurniakan pakai cara Water Treatment. Banyu nang diparluakan hagan sakali cuci kira-kira 120 litar
- Larutan Dialisat yaitu larutan nang didalamnya ada iliktrulit. Ada dialisat asetat, adda dialisat bikarbonat.
- Mesin Hemodialisis, yaitu sabagai pamumpua darah, sistim paaturan larutan dialisat, sistim pamantau mesin, wan munitor hagan manditiksi sabilanya ada kasalahan
Prusis Cuci Darah[babak | babak asal-mulanya]
Pamulaan handak cuci darah, pasien batimbang dahulu hagan manantuakan barapa cairan nang handak ditarik. Lalu parawat mamasang jalur pambuluh darah ka pasien. Darah dialirakan matan jalur pambuluh darah ka selang wan dializer. Imbah darah dibarsihakan ulih dializer, darah tadi dibulikakan pulang liwat jalur pambuluh darah.[3]
Kumplikasi[babak | babak asal-mulanya]
Salama cuci darah, kadang ada kumplikasi misalnya tensi turun, tensi naik, mual muntah karna gula darah randah, sakit kapala, kasamutan karna cairan nang ditarik kabanyakan, manggigil, gatal, sakit dada, kakurangan uksigen, pandarahan, atawa pambakuan darah.[2]
Referensi[babak | babak asal-mulanya]
- ^ a b c Prodjo, Sudjadi dkk. Konsensus Dialisis. Pernefri. 2003.https://www.pernefri.org/konsensus/Konsensus%20Dialisis.pdf
- ^ a b c d Suhardjono, dkk. Pedoman Pelayanan Hemodialisis di Sarana Pelayanan Kesehatan. Departemen Kesehatan RI. 2008.https://www.pernefri.org/konsensus/PEDOMAN%20Pelayanan%20HD.pdf
- ^ a b c RSK Ngestiwaluyo. Hemodialisis/Cuci Darah. 2018. http://www.ngestiwaluyo.com/read/132/hemodialisis--cuci-darah.html Archived 2021-04-29 at the Wayback Machine