Truth in Numbers?

Tumatan Wikipidia basa Banjar, insiklupidia bibas
Malacung ka napigasi, gagai
Truth in Numbers?
Barakas:Truth in Numbers film poster.jpg
Poster film
Sutradara Scott Glosserman
Nic Hill
Produser Michael Ferris Gibson
Scott Glosserman
Nic Hill
Gabriel London
Zackary Rice
Craig Shapiro
Musik Jeff MacDonald
Sinematografi Eric Koretz
John Murillo
Editing Madeleine Gavin
Nic Hill
John Murillo
Studio Underdog Pictures
Distribusi GlenEcho Entertainment
Tanggal rilis Citakan:Film date
Durasi 85 menit
Nagara Amérika Sarikat
Basa Inggris
Anggaran US$ 55.134

Truth in Numbers? Everything, According to Wikipedia (bahasa Banjar: Kanyataan dalam Satuan Angka? Sagalanya, Manurut Wikipidia) adalah sabuting pélém dokuménter Amérika Sarikat tahun 2010[1] nang ma-ambahi sajarah wan dampak budaya matan Wikipidia[2], sabuting insiklupidia dalam jaringan nang kawa dibabak atawa disunting ulih pamakai. Pélém ngini manarai manjawab patakunan apakah wastu para pakar nang saharusnya ditugasakan manyunting insiklupidia atawa sabarataan urang sabujurnya gin kawa manggawinya. Dalam pélém ngini dijalasakan sajarah wan latar balakang matan Wikipidia disartai kumintar matan pandiri Wikipidia Jimmy Wales wan Larry Sanger. Babarapa pangumintar lain gin mancungul dalam pélém ngini, nangkaya éditor The Washington Post Len Downie, jurnalis CBS Bob Schieffer, bakas pamimpin éditor Encyclopædia Britannica Robert McHenry, wan bakas diréktur Badan Intélijén Pusat James Woolsey. Pélém dokuménter ngini gin jua mambahas paristiwa nang badampak kada baik hagan Wikipidia, maliputi kontrovérsi Essjay wan kontrovérsi biografi Wikipidia.

Gagasan pélém dokuménter ngini disusun didasari pada saran matan produser pélém Michael Ferris Gibson, nang ma-ulah pélém 24 Hours on Craigslist[3]. Gibson mahubungi sutradara Nic Hill, wan mambiayai parjalanannya hagan maumpati Jimmy Wales ka saluruh dunia. Paulahan pélém dimulai pada bulan Agustus 2006 sawayah konférénsi Wikimania 2006. Hill malakukan parjalanan ka Cina, Indunisia, India, Afrika Salatan, Australia, wan Eropa hagan mawawancarai panyumbang/kontributor Wikipidia. Scott Glosserman gin umpat dalam paulahan pélém ngini dalam mambariakan ampahan kréatif. Tim produksi mamusatakan gawian buhannya hagan manjawab bagaimana cara Wikipidia manampaiakan kanyataan.

Pélém ngini panambaian diulai pada konférénsi Wikimania 2010 di Gdańsk pada bulan Juli 2010. Limbah nintu, pélém ngini diulai di Musium Télévisi wan Radio New York City pada bulan Uktubir 2010, wan di Teater Trutees Uniparsitas Sani wan Disain Savannah sabagai hagian matan Féstival Pélém Savannah pada 3 Nupimbir 2010. Di Indunisia, pélém ngini jua diulai di Pasific Place Jakarta pada 28 Juli 2012 ulih Wikimédia Indunisia.

Truth in Numbers? mahaga sambutan positif matan panulis Ted Leonsis dalam blognya, Daniel D'Addario liwat ulasannya dalam publikasi AOL Urlesque, wan Carlos Serrano dalam liputan Féstival Pélém Savannah.

Isi[babak | sunting sumber]

Truth in Numbers? Everything, According to Wikipedia ma-ambahi sajarah wan dampak budaya matan Wikipidia.[2] Dalam pélém dokuménter ngini, Wikipidia disajiakan sabagai sabuting wujud wastur dalam bakomunikasi wan badialog budaya.[4] Sutradara pélém ngini manarai manjawab patakunan, "Haruskah aku wan ikam umpat batugas dalam malakukan standardisasi kapada sajumlah pangatahuan manusia bagi sabarataan urang, atawa sebaiknya kita sarahakan tugas itu ka para pakarnya?"[5] Pélém ngini mambariakan gambaran sual sajarah situs wéb Wikipidia, damintu jua lawan maklumat biografi pandirinya, Jimmy Wales.[6] Wales kalihatan bapandir sual Wikipidia lawan saurang pambaca matan India nang manunjukakan kakadaakuratan pada sabuting artikal. Wales mananggapi, "Ubahi lamun kaitu," wan dilanjutakan lawan manunjukakan sang pambaca itu bagaimana mangklik tab "babak" di Wikipidia.[7] Pandiri Wikipidia lainnya Larry Sanger gin mancungul dalam pélém dokuménter ngini dan mamandirakan sacara karitis sual bagaimana Wikipidia bausaha mahimpun pambabak atawa panyunting matan masyarakat umum daripada para kontributor pakar.[8]

Para pangumintar média wan jurnalis nang muncul wan jua diwawancarai dalam pélém ngini adalah panulis Howard Zinn, éditor The Washington Post Len Downie, jurnalis CBS Bob Schieffer, katua Encyclopædia Britannica Robert McHenry, bakas diréktur Badan Intélijén Pusat James Woolsey, réporter Slate Magazine Chris Wilson,[6] jurnalis The Register Cade Metz nang hudah manulis karitik sual Wikipidia, Richard Branson,[5] wan Noam Chomsky.[9] Pélém ngini mandokuméntasiakan sabuting inisiatif di India dan Afrika nang disambat sabagai "Akademi Wikipidia".[10] Kontrovérsi nang dibahas dalam pélém ngini maliputi jua kontrovérsi Essjay di mana saurang angguta Wikipidia manulisakan parnyataan palsu sual latar balakang akademisnya,[11] wan kontrovérsi biografi Wikipidia di mana parnyataan palsu sual jurnalis John Seigenthaler disisipakan ka dalam artikel Wikipidia.[12] Musisi rap KRS-One gin mancungul dalam pélém ngini wan basurah sual panilaiannya kapada Wikipidia, "Ulun ujarakan lawan Pian, hal-hal nangkaya ngini adalah fakta, lamun [hal-hal ngini] kada jua bujur."[8]

Produksi[babak | sunting sumber]

Konsép[babak | sunting sumber]

Tim produksi film dokumenter ini di Indonesia (Februari 2007)

Gagasan pélém ngini barasal matan saran Michael Ferris Gibson nang hudah maulah pélém dokuménter 24 Hours on Craigslist pada tahun 2005.[3] Gibson mahubungi sutradara Nic Hill, wan mambiayai parjalanannya hagan mampélémakan babagai kagiatan nang bahubungan lawan Wikipidia.[2] Pada wayah paulahan, pélém ngini dibari judul Truth in Numbers: The Wikipedia Story. Gibson mamilih mandanai paulahan pélém ngini malalui parmintaan dana kapada para pa-ilang Internét; di mana dalam parmintaan panambaiannya bakulih didapatakan US$ 20.000 nang limbah nintu diguna'akan sabagai invéstasi awal.[1] Tim produksi mamulai lingkang awal dalam rangka gawian nang dikanal pamakai Internét ngini malalui situs wéb www.wikidocumentary.org.[1] Situs wéb kolaborasi lain nang bapusat pada pélém dokuménter ngini gin dibantuk di Wikia,[13] tapatnya di wikidocumentary.wikia.com.[14][15] Sual stratégi pandanaan pélém ngini, dalam San Francisco Chronicle, Gibson bakumintar, "Urang-urang hudah mambariakan sumbangan $50 di sini, wan $20 di sana. Panggalangan dana samacam ngini adalah bukti nang manunjukakan kalu masyarakat tatarik lawan rangka gawian ngini, wan katatarikan buhannya tu nang maulah pélém ngini."[1]

Paulahan pélém[babak | sunting sumber]

Paulahan pélém dimulai pada bulan Agustus 2006 sawayah konferénsi Wikimania 2006, wan par April 2007 tim produksi hudah mangumpulakan liputan sapanjang 100 jam.[3] Sutradara Nic Hill mandampingi Jimmy Wales sapanjang tahun 2007, wan mampélémkannya wayah Jimmy Wales bakuliling dunia.[16] Hill mambawa dua urang kru pélém baimbai inya wan malakukan parjalanan ka Cina, Indunisia, India, Afrika Salatan, Australia wan Eropa dalam rangka mawawancarai éditor wan kontributor Wikipidia.[1] Hill marupakan saurang éditor Wikipidia nang hudah manulis artikal sual saniman graffiti.[16] Gibson dan Hill mamarluakan kaahlian matan individu nang bapangalaman dalam aspék pandanaan jua labih kréatif dalam paulahan pélém. Buhannya mahubungi Scott Glosserman hagan bagabung wan malakukan kadua hal itu.[2] Katarlibatan Glosserman dalam paulahan pélém dimulai tumatan tajadinya Mogok Parsatuan Panulis Amérika pada tahun 2007-2008.[17] Limbah katarlibatannya, usaha parpéléman ngini manjadi labih luas. Diparluakan talu tahun tambahan tumatan Glosserman bagabung lawan tim produksi hagan manuntungakan pélém ngini.[2]

Eric Koretz baparan sabagai sinematografer pélém ngini; inya bagabung lawan tim produksi pélém salawas pagisiran pusat pada bulan Januari 2008.[6] Koretz mangguna'akan kamira Panasonic salawas parosés produksi, sabuting kamira parakam HD lawan média rakaman P2 tipe AG-HPX500.[6] Inya bakumintar kapada publikasi industri Videography sual pamilihan téknik pélémnya, "Kami hudah malakukan parjalanan hingga ka lima kuta saban minggunya salawas labih matan anam bulan, wan [média rakaman babantuk] pita kada akan bafungsi. Ulun kada handak manukui maupun mamindahakan pita-pita itu, dan pita sangat mudah rakainya. Kartu P2 nahap, andal, dan Pian kawa maniring hasilnya wayah itu jua. Ulun labih katuju P2 dibandingakan sistim babasis HDD lainnya nang ulun kada talalu yakin apakah samua liputan ngini akan masih ada di sana pada hari pahabisan parosés paulahan pélém ngini."[6] Salawas parosés panyuntingan, Glen Echo Entertainment mangguna'akan walu komputer Macintosh Apple lawan prosésor Intel, dilangkapi lawan parangkat lunak panyunting video Final Cut Pro matan Apple.[6]

Pamusatan ulang[babak | sunting sumber]

Nic Hill rahatan manyunting pélém ngini.

Glosserman wan tim produksi nang lainnya bakumpul baimbai mamusatakan pélém ngini; bubuhannya banahap manjawapi: "Dimapa sakira Wikipidia baulih hasil nang nyata?" Bubuhannya jua bapusat pada panyajian maklumat hagan para panuntun nang buhannya anggap sabagai individu biasa nang akan batakun sual latar balakang matan Wikipidia wan dimapa cara gawinya. Para pakar mancari jawaban ngini, tamasuk panulis The Age of American Unreason Susan Jacoby, mambahas pandakatan Wikipidia dalam hal ilmu pangatahuan sual subjék tartantu. Glosserman bakumintar wayah diwawancarai IndieWire, "Kami mancubai cagar urang-urang mambariakan alasan matan babagai sisi sual tupik tartantu marga niat kami adalah hagan manjadi objéktif dan maulah para panuntun mampu mambangun pamikiran buhannya sorang sual manfaat wan dampak matan Wikipidia. Struktur narasi matan pélém What the Bleep Do We Know!? manjadi inspirasi bagi Glosserman salawas paulahan.[2] Sabagai rangka gawian nirlaba, pélém ngini hudah manarima sumbangan labih matan US$ 55.000 par Maret 2009.[18]

Rilis[babak | sunting sumber]

Matan kiwa ka kanan: Sutradara Nic Hill dan Scott Glosserman baimbai Jimmy Wales di Gdańsk (10 Juli 2010)
(Bahasa Inggris) Wawancara dengan Nic Hill mengenai film dokumenter ini

Awalnya pélém ngini dirancanakan gasan dirilis pada tahun 2007, limbah itu 2008, dan 2009.[19] Babarapa klip matan pélém ngini dilihatakan wayah konferénsi Wikimania 2007 di Taipéi walaupun baluman tuntung.[16] Cuplikan pélém ngini gin ditampaiakan di Red House Theater.[16] Panuntun nang jua marupakan éditor Wikipidia baisi pandangan bamacam kapada pélém ngini, manimbulakan tanggapan positif maupun négatif dalam babagai hal.[16] Pada tahun 2008, liputan matan pélém ngini diguna'akan sabagai video panggalangan dana rasmi ulih Wikimedia Foundation.[20] Pélém ngini panambaian diulai wayah konferénsi Wikimania 2010 di Gdańsk pada bulan Juli 2010,[21] di hadapan panuntun nang bajumlah sakira 300 urang.[7][22] Sabuting trailer gasan pélém ngini dirilis pada bulan Oktober 2010.[23]

Pélém ngini ditayangakan di Paley Center for Media, atawa nang baari dikanal lawan ngaran Museum Televisi dan Radio, New York City pada 20 Oktober 2010.[11][24] Pélém ngini ditampaiakan baimbaian lawan Seri Seminar Universitas Robert M. Batscha.[11] Paulaian di The Paley Center for Media manyartakan panyiaran streaming dalam jaringan sacara langsung matan acara ini—ini adalah panambaiannya sabuting paulaian pélém wan diskusi takun-jawab tasadia di Internét sacara baimbaian lawan panuntun di wadah.[25][26] Diskusi di Paley Center for Media dibawakan ulih saurang jurnalis The New York Times Noam Cohen, dan disartai kadua sutradara pélém, sarta pawakilan matan Wikimedia Foundation Samuel Klein, dan Wikipidiawan di Kawasan British Museum Liam Wyatt.[25] Limbah acara paulaian pélém tuntung, SnagFilms manjadiakan pélém itu tasadia sacara gratis salawas anam hari bagi para panuntun di Amérika Serikat.[25][27]

Pélém ngini ditampaiakan di Féstival Film Savannah pada 3 November 2010,[28] di Teater Trutees Universitas Seni dan Desain Savannah.[29][30] Pélém ngini dijadwalakan dirilis di bioskop tartantu di Amérika Serikat pada 30 November 2010, sarta tasadia dalam format DVD tumatan 11 Januari 2011.[31] Di Indunisia, pélém ngini gin diulai jua di Pasific Place Jakarta pada 28 Juli 2012 ulih Wikimedia Indonesia.[32] Limbah acara paulaian pélém tuntung, hudah dirancanakan kagiatan diskusi basama Nic Hill nang bagabung malalui konferénsi video digital. Tagal diskusi ngini diwalangakan marga ada kandala internét. Sabagai gantinya, diadakan diskusi sual Wikipidia, Wikimédia, wan lisénsi Creative Commons.

Panarimaan[babak | sunting sumber]

Jimmy Wales manulis kumintar positif sual pélém ngini pada tahun 2007 salawas masa paulahan, "Sutradara Nic Hill maulah karya nang talihat nangkaya pélém luar biasa sual Wikipidia wan Wikipidiawan di saluruh dunia."[13] Tagal Wales mambariakan kumintar negatif sual waktu rilis pélém itu dalam sabuting parnyataan ka PRNewser.[33] Wales menyatakan, "Pélém ngini hudah katinggalan jaman dan harusnya hudah dirilis talu atawa ampat tahun nang halam."[33] Sidin bakumintar kalu pélém dokumenter ngini tadiri matan "damintu banyak urang nang bapandir, wan kada manunjukakan aspék komunitas Wikipidia."[33] Wales mangirimakan tulisan ka milis Wikimedia Foundation bahwa "Pélém ngini kurang ditarima di Polandia, wan sarius pélém ngini katinggalan jaman."[34] Larry Sanger bakumintar bahwa manurutnya, "Tumatan apa nang ulun lihat, [pélém ngini] kada talalu buruk."[35] Angguta diwan Wikimedia Foundation Samuel Klein bakumintar, "Sacara umum, ulun labih katuju pélém ngini sawayah ulun manuntunnya gasan kadua kalinya, lawan para pamirsa nang sangat babida (dan malihat tanggapan bubuhannya sacara langsung)."[36] Sage Ross, saurang pasarta konférensi Wikimania 2010, bakumintar bahwa pélém ngini tampak wastu ma-ambil buncu pandang négatif kapada Wikipidia, "Pélém ngini banyak bapusat pada kritik nang dangkal maupun manyasatakan, dan pada tingkat intéléktual, pélém ngini talihat nangkaya anti-Wikipidia nang manunjulakan kritik alasan barisi nang kadangarannya masuk akal lawan optimisma nang naif matan para Wikipidiawan anum."[5] Panulis Ted Leonsis mambariakan kumintar positif sual pélém dokuménter ngini di blog-nya, Ted's Take.[37] Leonsis mancitra'akan pélém dokuménter ngini sabagai "Sabuting pélém nang bagus sual garakan Wikipidia."[37] Sidin manyimpulakan, "Ngini adalah sabuting pélém nang wajib dilihat, pélém prémiér. Kalian harus manuntunnya cagar tatap baraitan dalam dunia sosial!"[37]

"Ngini jalas sabuting pélém nang solid.... Manarik, diulah baik, wan manyajiakan babagai buncu pandang kapada Wikipidia nang manggani'i narasinya tatap manarik."

 —District, Universitas Seni dan Desain Savannah[38]

Daniel D'Addario mangulas Truth in Numbers? Everything, According to Wikipedia hagan publikasi AOL Inc., Urlesque.[39] D'Addario bakumintar, "pélém ngini ma-angkat patakunan nang manarik sual kakuasaan, wastu haja talihat agak disangaja."[39] Sidin mamparhatikan sual hubungan antara sifat pélém sahubungan lawan bahan nang disajiakan dan dibahas lawan tanggal rilis nang sabujurnya, wan bakumintar, "Parilisan Truth in Numbers? mungkin talalu lambat."[39] D'Addario manyimpulakan panilaiannya lawan mamparhatikan kalu pada wayah sidin parhatan mangulas, artikal Wikipidia bahasa Inggris gasan pélém ngini soran rahatan tarancam hagan dihapus: "Manurut Wikipidia, éntri artikal gasan Truth in Numbers? rahat dipartimbangkan gasan dihapus – marga talalu sadikit tautan ka artikal lainnya pada situs itu, dan jua marupakan artikal 'yatim'. Truth in Numbers? dibariakan jangka waktu pahapusan disartai babagai kapantingan kakatujuan di Wikipidia lawan mata tabunciling nang mancamasakan banyak hal khusus, ngini mungkin sangat mangajutakan atawa kada tapi mangajutakan sama sakali."[39]

Dalam ulasannya wayah paliputan Féstival Film Savannah, Carlos Serrano dalam District manulis bahwa walaupun subjék matan pélém ngini maliputi banyak pijakan wan mancakup pangaruh situs wéb ngini di dunia, pélém ngini mamanfaatkan préséntasi nang imit: "Tampak nangkaya banyak hal nang dikajalakan ka dalam satu pélém, tagal pélém ngini bakulih mangalula durasi 85 menit waktu tayangnya sacara baik." Serrano bakumintar sual préséntasi Jimmy Wales di dalam pélém, "Pada akhirnya, ulun kaluar matan téater mamikirakan sidin sabagai figur talu diménsi, saurang lalakian nang banyak sumangat tagal kada sahibaknya baik maupun jahat. Sajujurnya, hal ngini panting banar dalam pélém samacam ngini dan jalas marupakan plus bagi pélém ngini." Serrano manyaranakan pélém dokuménter ngini, wan manyimpulakan, "Ngini jalas marupakan sabuting pélém nang solid. Pélém ngini jalas layak hagan dituntun. Manarik, diulah sacara baik, dan manyajiakan babagai buncu pandang kapada Wikipidia nang manggani'i narasinya tatap manarik."[38]

Tiringi jua[babak | sunting sumber]

Diambil matan[babak | sunting sumber]

  1. ^ a b c d e Hart, Hugh, "Industry Buzz", San Francisco Chronicle, www.sfgate.com, 11 Marit 2007. Diakses pada 19 Siptimbir 2010.
  2. ^ a b c d e f "Midterm Madness. Wikipedia Exposed: Scott Glosserman on his Provocative Documentary", IndieWire, www.indiewire.com, 21 Uktubir 2010. Diakses pada 27 Uktubir 2010.
  3. ^ a b c "LunchMeet: Truth In Numbers, the Wikipedia Story", Podtech.net, www.podtech.net; Interview with Nic Hill, 5 April 2007.
  4. ^ "Wikipedia, le film", Premiere.fr, www.premiere.fr, 5 Pibuari 2009. Diakses pada 10 Nupimbir 2010.
  5. ^ a b c Haines, Lester, "Reg hack gives forth in Wikipedia doco", The Register, www.theregister.co.uk, 16 Juli 2010. Diakses pada 10 Nupimbir 2010.
  6. ^ a b c d e f Staff, , "Wikipedia Documentary "Truth in Numbers?" Shot with Panasonic P2", Videography, www.videography.com, 25 Siptimbir 2008. Diakses pada 10 Nupimbir 2010. alternate link
  7. ^ a b Hamann, Mathias, "Woodstock im Schatten der Zensur", Süddeutsche Zeitung, Südwestdeutsche Medienholding, 12 Juli 2010.
  8. ^ a b "Wiki movie stirs geeky trouser worms", The Inquirer, www.theinquirer.net, 6 Agustus 2007. Diakses pada 10 Nupimbir 2010.
  9. ^ Underdog Pictures. "Synopsis", Website: Truth in Numbers – The Wikipedia Story. Diakses pada 11 Nupimbir 2010.
  10. ^ McIntosh, Ewan, "The truth in numbers: creating communities", Ewan McIntosh's edu.blogs.com, edu.blogs.com, 4 Disimbir 2007. Diakses pada 10 Nupimbir 2010.
  11. ^ a b c "Truth in Numbers? Everything, According to Wikipedia", The Paley Center for Media, www.paleycenter.org.
  12. ^ Foglia, Marc, "Scott Glosserman fait tout un cinéma sur Wikipédia", Rue89, www.rue89.com, 11 Marit 2009. Diakses pada 10 Nupimbir 2010.
  13. ^ a b Wales, Jimmy, "Truth in Numbers", Jimmy Wales: Free knowledge for free minds, jimmywales.com, 16 Pibuari 2007. Diakses pada 16 Nupimbir 2010.
  14. ^ Okoli, Chitu(2008)."A Brief Review of Studies on Open Source Software in Developing Countries in Peer-Reviewed Journals". Sprouts: Working Papers on Information Systems8(45)Diakses pada 11 Nupimbir 2010.
  15. ^ Okoli, Chitu(2009)."Beyond Open Source Software: An Introduction to Researching Open Content and Wikipedia". Sprouts: Working Papers on Information Systems9(64)Diakses pada 11 Nupimbir 2010.
  16. ^ a b c d e Cohen, Noam, "Cheers and Boos as Wikipedians See Themselves on Film", The New York Times, The New York Times Company, 4 Agustus 2007. Diakses pada 26 Uktubir 2010.
  17. ^ Brown, Todd, "News: Scott Glosserman adds to the Wiki...", Twitch, twitchfilm.com, 4 Pibuari 2009. Diakses pada 10 Nupimbir 2010.
  18. ^ Devillard, Arnaud, "Wikipedia, le film", 01.net.com, www.01net.com, 12 Marit 2009.
  19. ^ "Chérie, je t'emmène voir Wikipedia au ciné !", Les news cinéma de fluctuat.net, cinema.fluctuat.net, 5 Pibuari 2009. Diakses pada 10 Nupimbir 2010.
  20. ^ Wikimedia Foundation. "Free Access To All Human Knowledge, A Video Appeal From Wikipedia Founder Jimmy Wales", YouTube, 1 Uktubir 2008. Diakses pada 28 Nupimbir 2010.
  21. ^ Jopkiewicz, Izabela, "Gdańsk. Rusza światowy zjazd Wikipedystów", Gazeta Wyborcza, trojmiasto.gazeta.pl/, 8 Juli 2010. Diakses pada 10 Nupimbir 2010.
  22. ^ "Truth in Numbers?", Wikimania 2010, wikimania2010.wikimedia.org. Diakses pada 27 Uktubir 2010.
  23. ^ "Truth in numbers trailer", Trailerdownload.net, www.trailerdownload.net. Diakses pada 29 Uktubir 2010.
  24. ^ "Release info", Internet Movie Database, www.imdb.com.
  25. ^ a b c Spiers, Katherine, "American Premiere of 'Wikipedia' Movie Will Also Stream Online", The Wrap, www.thewrap.com, 19 Uktubir 2010. Diakses pada 10 Nupimbir 2010.
  26. ^ Thompson, Anne, "Paley Center and SnagFilms Stream Live Doc Debut", Digital Future, IndieWire, 20 Uktubir 2010. Diakses pada 10 Nupimbir 2010.
  27. ^ Merin, Jennifer, "Snag Truth By Numbers on October 21", Documentaries Guide, The New York Times Company, 20 Uktubir 2010. Diakses pada 11 Nupimbir 2010.
  28. ^ "Schedule", Savannah Film Festival, www.scad.edu. Diakses pada 28 Uktubir 2010.
  29. ^ "What to watch...", Savannah Morning News, 28 Uktubir 2010, p. 12E.
  30. ^ "Savannah Film Festival 2010", Savannah Morning News, 3 Nupimbir 2010, p. 1E.
  31. ^ "Truth in Numbers? (2010)", Moviefone, www.moviefone.com. Diakses pada 27 Uktubir 2010.
  32. ^ Wikimedia Indonesia(30 Juni 2012)."Pemutaran Film Truth in Numbers - Wikimedia Indonesia". http://wikimedia.or.id/wiki/Pemutaran_Film_Truth_in_Numbers. Diakses pada 2 July 2012. 
  33. ^ a b c Lazarus, Nancy, "Jimmy Wales: ‘Wikipedia Assumes Good Faith’", PRNewser, www.mediabistro.com, 15 Uktubir 2010. Diakses pada 10 Nupimbir 2010.
  34. ^ Wales, Jimmy, "Truth in numbers", WikiX-l, lists.wikimedia.org, 21 Uktubir 2010. Diakses pada 11 Nupimbir 2010.
  35. ^ Sanger, Larry, "Truth in Numbers", Twitter, twitter.com, 2 Nupimbir 2010. Diakses pada 11 Nupimbir 2010.
  36. ^ Klein, Samuel, "Truth in numbers", WikiX-l, lists.wikimedia.org, 21 Uktubir 2010. Diakses pada 11 Nupimbir 2010.
  37. ^ a b c Leonsis, Ted, "Truth in Numbers?", Ted's Take, www.tedstake.com, 22 Uktubir 2010. Diakses pada 10 Nupimbir 2010.
  38. ^ a b Serrano, Carlos, ""Truth in Numbers" raises insightful questions", District, www.scaddistrict.com; Savannah Film Festival Coverage; Savannah College of Art and Design, 3 Nupimbir 2010. Diakses pada 10 Nupimbir 2010.
  39. ^ a b c d D'Addario, Daniel, "'Truth in Numbers? Everything, According to Wikipedia' – The Documentary Reviewed", Urlesque, AOL Inc., 2 Nupimbir 2010. Diakses pada 10 Nupimbir 2010.

Bacaan labih lanjut[babak | sunting sumber]

Tautan luar[babak | sunting sumber]