Piala FA

Tumatan Wikipidia basa Banjar, insiklupidia bibas
Malacung ka napigasi, gagai

Piala FA adalah lumba dumistik main bal di Inggris. Mulai dilumbaakan matan tahun 1871-1872. Imbah 130 tahun labih, Piala FA diumpati ulih 600 labih klub, mulai matan klub Premiership sampai dipisi amatir.

Kompetisi panambayan[babak | sunting sumber]

Pas panambayan kalinya diadaakan di musim 1871-1872, lumba naya diumpati ulih 17 klub haja. Wanderers, klub nang didiriakan ulih urang-urang sakulah nagri wan dikuati ulih pamain-pamain universitas, manjadi juara gasan panambayannya. Di pinal, buhannya mangalahakan Kennington Oval, 1-0. Di partandingan nang disaksiakan kira-kira 2.000 urang nintu, gul kamanangan Wanderers dicitak ulih Morton Betts.

Piala[babak | sunting sumber]

Piala nang diangkat Betts wan kakawanannya tahalus matan piala nang wahini. Piala ninti diulah ulih Messrs, Martin and Hall Co, wan baharga 20 pondsterling haja.

Tahun 1895, pas Aston Villa manjuarai lumba naya, piala naya hilang pas diandak di sabuah wadah di Birmingham. Sampai wahini, piala asli nintu kada sudah ditamuakan pulang.

Stadiun Wembley[babak | sunting sumber]

Mulai tahun 1923, pinal Piala FA disalanggaraakan di Stadiun Wembley. Stadiun naya adalah gagasan Duke matan York, nang dudi hari cagar jadi Raja George VI. Stadiun nang imbah nintu jadi simbul main bal Inggris nintu dibangun lawan biaya kira-kira 750 ribu poundsterling.

Tim nang bauntung tampil gasan panambayan kalinya di pinal di Wembley adalah Bolton Wanderers wan West Ham United. Pinal naya imbah nintu dicatat dalam sajarah marga ditulaki kira-kira 200 ribu urang panuntun nang hibak banar sampai ka pinggir lapangan.

Tahun 2001-2006, Stadiun Wembley dibaiki, marganya pinal piala FA dipindahakan ka Stadiun Millenium, Cardiff. Mulai tahun 2007, Piala FA mulai disalanggaraakan pulang ka Stadiun Wembley nang sudah tuntung dibaiki wan ditandai lawan dipakainya Stadiun Wembley di pinal nang manamuakan Chelsea lawan Manchaster United.

Amun jumlah panuntun di pinal Stadiun Wembley tahun 1923 dianggap paling banyak, jumlah panuntun tasadikit dicatat klub gurem Aldershot di tahun 1986. Pas nintu, di putaran katiga, partandingan malawan Oxford United didatangi ulih 2.034 urang haja. Tagal, Aldershot nang datang matan Dipisi IV suksis mantam Oxford United nang di Dipisi I 3-0.

Rikur wan Pinal[babak | sunting sumber]

Sapanjang sajarahnya, rikur gul tabanyak nang dicitak dalam sabuting partandingan masih diinguti ulih Nottingham Forest. Rikur naya dicatatnya di musim 1890-1891 pas mangalahakan Clapton, 14-0.

Tagal amun rikur rata-rata pamain tatuha nang tampil di pinal diingkuti ulih Arsenal. The Gunners manurunakan pamain nang kira-kira baumur 31 tahunan di starting eleven-nya, pas mangalahakan Liverpool di pinal tahun 1950.

Sajauh naya, Manchester United bulih babangga sabagai klub nang paling banyak manjadi jawara nang manguliksi 11 galar.

Mulai pinal tahun 1872, ada 12 klub nang suksis tampil di partai puncak, tagal kada suah bisa mambawa piala ka markasnya. Inya adalah Queens Park Glasgow, Bristol City, Birmingham, Leicester, Luton Town, Fulham, QPR, Brighton and Hove Albion, Watford, Crystal Palace, Middlesbrough, wan Milwall. Biar Leicester mancatat ampat kali tampil di pinal (tahun 1949, 1961, 1963, wan 1969), wan bulik lawan tangan parai tarus.

Salah sabuting pinal nang paling rami adalah 3 gul di injury time. Naya suah tajadi di pinal tahun 1979 pas Arsenal mangalahakan Manchester United 3-2. Di babak panambayan Arsenal manang 1-0, imbah nintu manjadi 2-0 di tangah babak kadua. Tapi pas ada tambahan waktu 2 manit, Manchester United kawa manyamaakan nilai manjadi 2-2, sabalum gul matan Alan Sunderland samanit imbah nintu nang maulah Arsenal manang.

Pinal tahun 2006, pas Liverpool marabahakan West Ham United di adu pinalti, dianggap sabagai salah sabuting pinal nang tabaik. Pas nintu, Liverpool nang dipapuritakan tatinggal sabalum injury time babak kadua nang disamaakan kadudukannya ulih Steven Gerrard. Tagal The Reds (julukan gasan Liverpool) imbah nintu kawa mamaksaakan nilai imbang 3-3 wan akhirnya manang matan adu pinalti.

Pamanang Piala FA[babak | sunting sumber]

Jumlah juara Tim
11 Manchester United
10 Arsenal
8 Tottenham Hotspur
7 Liverpool, Aston Villa, Chelsea
6 Newcastle United, Blackburn Rovers
5 Manchester City, Everton, West Bromwich Albion, Wanderers
4 Bolton Wanderers, Sheffield United, Wolverhampton Wanderers,
3 Sheffield Wednesday, West Ham United
2 Bury, Nottingham Forrest, Old Etonians, Preston North End, Sunderland, Portsmouth
1 Barnsley, Blackburn Olympic, Blackpool, Bradford City, Burnley, Cardiff City, Charlton Athletic, Clapham Rovers, Coventry City, Derby County, Huddersfield Town, Ipswich Town, Leeds United, Notts County, Old Carthusians, Oxford University, Royal Engineers, Southampton, Wimbledon

Catatan: Tim nang dicitak miring sudah kada ada.

Pranala luar[babak | sunting sumber]