Lombok (tanaman)

Tumatan Wikipidia Banjar, kindai pangatahuan
?Lombok

Klasifikasi ilmiah
Karajaan: Plantae
Ordo: Solanales
Famili: Solanaceae
Genus: Capsicum
Lombok

Lombok (Capsicum) adalah tumbuhan pardu matan famili Solanaceae nang rancak dipakai banyak urang sagan bumbu atawa sayuran. Tumbuhan ngini asalanya matan banua Amirika. Lombok dikambangakan lawan manusia matan 5000 tahun SM di dalam gua di Tehuacan, Maksiku. Lombok batumbur ka banyak nagara di dunia, tamasuk Indunisia malalui bubuhan Irupa, nang kaya Supanyul wan Purtugis.[1]

Lombok baisi kapkaisin nang rancak dimanfaatkan sagan manangati darah manggumpal, maéncéri kahak, manangati radang, mamangar hurmun éndorfin nang kawa maningkatakan rasa nyaman, wan lainnya, walaupun kabanyakan mamakan lombok kawa maulah parut sakit atawa nang lainnya. Kapkaisin sorang andakannya di urat lombok nang dipakai sagan maandak bigi.[2]

Kaadaan tumbuh[babak | babak asal-mulanya]

Lombok kawa tumbuh baik di wilayah basuhu 20-30°C lawan bakatinggian 0-800 mdpl. Lombok kawa tumbuh wan batahan hidup di tanah nang bamacam-macam, walaupun tanah nang tabaik sagan mananam lombok adalah tanah aluvial atawa tanah ringan nang banyak unsur haranya.[1][3]

Kaadaan pH nang sadang sagan manaman lombok adalah pH 6-7, nang mana mun kurang pada ngitu kawa mahawar unsur hara wan maulah Rhizoctonia sp. wan Phytium sp. timbulan. Cara sakira kawa manaikakan pH tanah kawa dipakai kapur dulumit (CaCo3.MgCO3) wan mun handak manurunakan pH tanah nang katinggian kawa mamakai balirang.[4]

Sabujurnya, lombok kawa ditanam di bamacam-macam musim, walaupun manaman lombok di musim hujan kawa maulah tanaman rusak wan bapanyakitan maraga kawa maulah Fusarium sp. wan Pseudomonas solanacearum timbulan akibat kabanyakan banyu.[4]Wilayah nang tabagus sagan mananam lombok adalah nang rarata hujan tiap tahunnya kira-kira 600-1200 mm.[3]

Macam-macam lombok[babak | babak asal-mulanya]

Paritan 20 spesies lombok nang hidup di Amirika. Di Indunisia, ada macam-macam lombok nang rancak dikatujui wan dikambangakan, antara lain lombok habang ganal, lombok rawit, lombok setan, lombok jalapeno, lombok lamak wan paprika.[5]

Lombok habang[babak | babak asal-mulanya]

Lombok Habang

Lombok habang (Capsicum annuum L.) adalah tumbuhan lombok samusim nang tarna atawa satangah pardu. Lombok habang kawa tumbuh sampai antara 45-250 cm. Tumbuhannya baisi batang nang tagak, bakayu, babuku-buku, baisi cakang nang malébar, wan waktu anumnya baisi rambut nang lambut wan bawarna hijau. [5][6]

Daunnya tamasuk daun tunggal nang babantuk bulat atawa lonjong wan tumbuhnya tatumbar. Gatah daun anumnya kawa dipakai sagan urang nang handak baranak.[6]

Buahnya baisi bigi nang halus, pipih, wan bawarna putih kakuningan waktu anumnya tapi jadi warna cuklat waktu tuhanya. Buah ngini asalnya matan kambang nang rancak tagak atau manggantung di hujung cakang, nang mana kambangnya bakambang jadi buah nang lurus atawa bingkang, baisi kulit kandal wan babantuk runcing mangarucut atawa mambulat. Buahnya kawa dipakai sagan maobati sakit gigi, flu, sariawan, wan lainnya. [6]

Lombok ngini baisi kapadasan antara 30.000 – 50.000 SHU, nang artinya baisi rasa nang kada tapi padas.[7] Walaupun ngitu, lombok habang ganal rancak dipakai sagan maulah sambal atawa saus, maraga buahnya baisi kandungan kapsaisin, dihidrukapsaisin, vitamin A wan C, kapsantin, karotén, kapsarubin, zéasantin, kariptusantin, lutein, zat wasi, kalium, kalsium, fusfur, wan niasin.[5][6]

Lombok Rawit[babak | babak asal-mulanya]

Lombok Rawit

Lombok rawit (Capsicum frutescens L.) adalah tumbuhan pardu nang batangnya babuku-buku, atasnya basudut, cakang yang banyak, wan tingginya kawa sampai antara 50-100 cm. Daunnya tamasuk daun tunggal nang babantuk bulat, batangkai, bahujung nang tajam, pangkalnya nang kipit, wan tumbuhnya basulang kali.[6]

Lombok rawit baisi buah nang tajam mangarucut tagal tahalus.[5] Buahnya tamasuk buah buni bulat nang batagak atawa mabingkang wan baisi hujung nang tajam. Lain pada ngitu, buah lombok rawit baisi tangkai nang panjang. Kambang ngini asalnya matan kambangnya nang tunggal, nang mana kambang ini panjang 1-3 cm wan lébar 2,5-12 cm. Kambang ngini baisi mahkota babantuk bintang wan bawarna putih kahijauan atawa ungu. [6] Buahnya bawarna kahijaun waktu masih anum wan bawarna habang waktu sudah masak maraga ada zat likupén nang banyak.[2]

Lombok tapadas pada lombok habang maraga ini baisi kapadasan sampai 100.000 SHU.[7] Walaupun ngitu, buahnya rancak dipakai sagan maobati flu, awak lamas, awak singkal, makan nang kada banafsu, wan lainnya.[6]

Paprika[babak | babak asal-mulanya]

Paprika

Paprika (Capsicum annuum var.grossum) atawa lombok manis, marupakan tumbuhan nang baisi tinggi sampai 4 meter. Daun paprika lébar wan bawarna hijau tuha. Buah paprika ganal bakarungkung babantuk loncéng wan bawarna kuning, hijau, habang, wan orén. Buahnya kada tapi padas, walaupun bau pahangnya masih tacium.[8]

Paprika baisi karbuhidrat, sarat, vitamin A, B, C, K, béta karutén, fulat, antiuksidan, zat silikun, wan lainnya. Paprika kawa dipakai sagan maobati kasilahu, manangati darah manggumpal, manangati katarak, wan lainnya.[9] Paprika habang baisi kandungan gizi nang tatinggi pada paprika hijau maraga baisi likupén wan lutéin, nang kawa manangati kankar, manangati kulit kariput, marawat kasihatan jantung, wan lainnya. [10]

Jujuhutan[babak | babak asal-mulanya]

  1. ^ a b Harpenas, Asep; Dermawan, R. (2011). Budi Daya Cabai Unggul. Jakarta: Penebar Swadaya. ISBN 9789790024175. 
  2. ^ a b Astawan, Made (2008). Khasiat Warna-Warni Makanan. Jakarta: Gramedia Pustaka Utama. hlm. 74–76. ISBN 9789792236071. 
  3. ^ a b Sudirman (2022). PENGENALAN DESKRIPSI VARIETAS CABAI MERAH BESAR (Capsicum annuum L.). Pekalongan: Nasya Expanding Management. hlm. 7–8. ISBN 9786234235296. 
  4. ^ a b Wiryanta, Bernandius T. Wahyu (2002). Bertanam Cabai pada Musim Hujan. Jakarta: AgroMedia Pustaka. ISBN 9789793084350. 
  5. ^ a b c d Suroso, Arif Iman; Syukur, Muhammad; Hermadi, Irman; Rachmaniah, Meuthia (2022). Sistem Enterprise Komoditas Pangan Strategis. Bogor: IPB Press. hlm. 115–118. ISBN 9786234673098. 
  6. ^ a b c d e f g Redaksi Agromedia (2008). Buku Pintar Tanaman Obat: 431 Jenis Tanaman Penggempur Aneka Penyakit. Jakarta: Agromedia Pustaka. hlm. 49–50. ISBN 9789790061941. 
  7. ^ a b "Mengapa Cabai Rawit Lebih Pedas Daripada Cabai Merah Biasa? - Semua Halaman - National Geographic". nationalgeographic.grid.id (dalam bahasa Indonesia). Diakses tanggal 2023-03-02. 
  8. ^ Wahyudi (2011). Panen Cabai Sepanjang Tahun. Jakarta: Agromedia Pustaka. hlm. 4. ISBN 9789790063372. 
  9. ^ Adi, Lukas Tersono (2007). Terapi Herbal Berdasarkan Golongan Darah. Jakarta: AgroMedia Pustaka. hlm. 128–129. ISBN 9789790060999. 
  10. ^ Dalimartha, Setiawan; Adrian, Felix (2011). Khasiat Buah dan Sayur. Jakarta: Penebar Swadaya. hlm. 139–141. ISBN 9786028661515.