Kayapu

Tumatan Wikipidia basa Banjar, insiklupidia bibas
Malacung ka napigasi, gagai
Kayapu
Kayapu

Kayapu sabujurannya ngaran umum gasan paku banyu matan genus Salvinia. Tumbuhan naini rancak tahaga maapung di atas banyu nang calap, nangkaya kulam, pahumaan dan danau, atawa di batang banyu nang maalir tanang.

Kayapu baisi dua tipe daun nang bujur-bujur babeda. Daun nang tumbuh di atas muha banyu babentuk cuping pina balingkar, baklorofil makanya bawarna hijau, dan muhanya ditukupi rambut bawarna putih pina transparan. Rambut-rambut ini mahilah daun jadi basah dan jua kawa manulung kayapu maapung. Daun tipe kadua tumbuh di dalam banyu babentuk saling miripan lawan akar, kada baklorofil dan baguna manangkap hara matan banyu nangkaya akar tu pang jua. Urang awam maanggap naini adalah akar kayapu. Kayapu saurang akarnya (dalam pengertian anatomi) ta-eduksi. Kayapu kada mahasilakan kambang marga daritu masuk golongan paku-pakuan.

Nangkaya jua paku banyu (misalnya semanggi air dan azolla) lainnya, kayapu gin jua basifat heterospor, baisi dua tipe spora: makrospora nang pacang tumbuh jadi protalus betina dan mikrospora nang pacang tumbuh jadi protalus jantan.

Paku banyu naini kada baisi nilai ekonomi tinggi, kacawali sabagai sumber humus (lantaran tumbuhnya pesat dan urang mangumpulakannya gasan dijadiakan pupuk), bahanu dipakai sabagai bagian dalam dekorasi dalam ruang, atawa sabagai tanaman hias di kolam atawa akuarium. Lantaran kawa tumbuh rapat bangat sampai kawa manukupi muha atas sungai atawa danau, maka diulah pepatah Melayu "biduk berlalu, kiambang bertaut", nang artinya limbah gangguan baliwat, keadaan cagar babulik nangkaya asal pulang.