Asura

Tabuik dibawa ka laut. Parayaan Asura di Pariaman, Sumatra Barat.

Hari Asura (basa Arap: عَاشُورَاء) adalah sabuting hari raya umat Islam. Asura dalam basa Arap artinya sapuluh. Maksutnya, hari kasapuluh dalam pananggalan Islam, yaitu tanggal 10 Muharram.

Sajarah

Maumpat taradisi umat Islam, Nabi Muhammad saw. manggawi puasa Asura mulai di Makkah marga puasa Asura sudah jadi amalan masarakat nang ada di sana. Wayah sidin hijrah ka Madinah, sidin malihat kaum Yahudi umpat puasa jua di hari Asura (gasan kaum Yahudi, Yom Kippur nang hari kasapuluh jua). Wayah ngitu, sidin masahakan wan manyariatakannya. Ibn Hajar al-asqalani, dalam panyataan sidin gasan Sahih Bukhari manyambat sariat puasa sudah dijadiakan bulan Ramadan satahun imbah ngitu. Damini, umat Islam manggawi puasa wayah 10 Muharam gasan amalan sunah haja wan kada jadi kawajipan.

Umat Islam parcaya kajadian-kajadian panting tajadi tanggal 10 Muharam:

• Hari panambaian Allah manciptaakan alam.
• Hari panambaian Allah manurunakan rahmat.
• Hari panambaian Allah manurunakan hujan.
• Allah manciptaakan 'Arasy.
• Allah manciptaakan Luh Mahfuz.
• Allah manciptaakan Malaikat Jibril.
• Nabi Adam a.s. diciptaakan.
• Diampuni dusa Nabi Adam a.s. imbah sidin batahun-tahun mancatu ampun marga malanggar tangatan Allah.
• Nabi Idris a.s. diangkat darjahnya ulih Allah wan Malaikat Izrail mambawa sidin ka langit.
• Disalamatakan Nabi Nuh a.s. wan paumpat sidin matan ba'ah ganal salawas anam bulan wan bahtera sidin salamat balabuh di puncak pagunungan.
• Nabi Ibrahim AS diranakakan di kawasan padalaman wan salamat matan buruan Raja Namrud.
• Nabi Ibrahim AS disalamatakan Allah matan api Raja Namrud.
• Nabi Yusuf AS dibibasakan matan panjara imbah tujuh tahun.
• Nabi Yaakub AS sudah wigas picak matanya wayah anak sidin Yusuf bulik di hari ngitu.
• Nabi Ayub AS diwigasakan matan panyakit sidin.
• Nabi Musa AS sudah disalamatakan matan tantara Firaun wan kajadian Laut Habang balah.
• Allah manurunakan kitab Taurat gasan Nabi Musa a.s..
• Nabi Yunus AS salamat kaluar matan parut iwak paus imbah 40 hari 40 malam.
• Kasalahan Nabi Daud AS diampuni Allah.
• Nabi Sulaiman AS dikaruniaakan Allah karajaan nang ganal.
• Nabi Isa AS diangkat ka langit wayah diburu ulih tantara Rumawi nang handak manyalib sidin.
• Sayidina Hussein bin Ali sudah syahid marga dibunuh lawan kajam di Karbala ulih tantara khalifah Bani Umaiyyah, yaitu Khalifah Yazid.

Parayaan

Hari Asura dirayaakan lawan cara nang balain-lain di Indunisia. Di Bengkulu, bubuhannya manggawi arak-arakan Tabot (atawa "Tabuik" lamun di Sumatra Barat). Pahadangan di Kalimantan Salatan, urang bahandipan maulah bubur Asura nang diulah matan 10 bahan.