Yusuf
.png)
Yusuf ialah saurang tukuh nang disambatakan dalam kitab suci umat Islam, Al-Qur'an, sawagai Nabi jua Rasul. Salain ngitu, inya disambatakan jua dalam Alkitab wan Tanakh. Inya ialah putra Yakub bin Ishak bin Ibrahim.
Dalam kitab agama samawi manyambat, Yusuf ialah urang salih nang takanal lawan kabungasannya. Inya ditimbai ka dalam sumur ulih kaka-kakanya karana pairian lawan inya, lalu diambil bubuhan kapilah nang liwat wan dijadii budak. Inya ahirnya dijual lawan salah saurang pajabat Mesir. Sacara batahap, Yusuf ahirnya jadi salah saurang pajabat panting di Mesir imbah bahasil manapsirakan mimpi raja wayahitu. Al-Qur'an manyambatakan parjalanan hidup Yusuf sawagai "kisah nang tabaik banar".
Dalam basa Ibrani, Yusuf (Y-S-F) baisi arti batambah.[1][2] Ngaran ini dibarii ulih Rahel, uma Yusuf, nang badu'a supaya Allah mambarii saurang anak tambahan gasan inya saurang.
Dalam Al-Qur'an, ngaran Yusuf disambatakan sabanyak 27 kali.[3] Kisah Yusuf saurang labih takanal di surah Yusuf, surah kadua balas dalam kitab suci Islam. Hal ngini babida lawan bubuhan Nabi lain nang rancak kisahnya tasabar ka babarapa surah.
Janajah Yusuf hudah dipindahakan wan dikuburakan lagi di Palistina. Ada babarapa tampat nang takanal sawagai makamnya, yaitu:
- Dairah Sikhem, tampat Yakub bahari bagana imbah bulik matan Mesopotamia. Bubuhan rabbi bapandapat, Yusuf maminta dangsanak-dangsanaknya manguburakan inya di Sikhem, dikaranaakan bahari tampat ngitu inya dijual sawagai budak;
- Safed, ujar sapalih kitab Yahudi;
- Masigit Ibrahimi atawa Guwa Makhpela di Hebron nang jua marupakan makam Ibrahim, Sarah, Ishak, Ribka, Yakub, wan Lea.
Jujuhutan
[babak | babak asal-mulanya]- ↑ Friedman, R.E. (2003). The Bible with Sources Revealed. hlm. 80.
- ↑ "Kejadian 30:24". Alkitab Sabda. Diakses tanggal 2026-03-16.
- ↑ Ngaran Yusuf disambatakan 27 kali dalam surah-surah Al-Qur'an, yaitu: Al-An'am/6: 84; Yusuf/12: 4, 7, 8, 9, 10, 11, 17, 21, 29, 46, 51, 56, 58, 69, 76, 77, 80, 84, 85, 87, 89, 90 (2 kali), 94, 99; Ghafir/40: 34