Yakub
.png)
Yakub (Ya'qub) ialah saurang Nabi wan Rasul, jua marupakan putra Ishak wan cucu matan Ibrahim. Yakub ialah salah saurang tukuh nang disambatakan dalam Al-Qur'an, Alkitab, wan Tanakh. Yakub jua disambat lawan Israil (Israel) wan juriatnya disambat lawan Bani Israil.
Dalam kitab suci umat Islam, Al-Qur'an, ngaran Yakub disambatakan ada anam balas kali.[1][2] Inya jua disambat lawan Israil sabanyak dua kali. Kisahnya nang disambatakan dalam Al-Qur'an tarait inya saurang lawan Yusuf wan wasiatnya sabalum maninggal lawan kakanakannya, jaka danul kisahnya nang lain rancak dalam kitab suci Yahudi wan Karistin. Dalam kitab suci Yahudi, Tanakh, wan kitab suci Karistin, Alkitab, kisah Yakub disambatakan dalam Kitab Kajadian pasal 25-37 wan 42-50.
Yakub ialah putra Ishak. Ishak saurang ialah putra Ibrahim (disambat Abraham dalam Yahudi wan Karistin), salah sabuting tukuh panting dalam agama Islam. Uma Yakub ialah Ribka.
Yakub diitihi sawagai Nabi dalam Islam. Biar ngarannya cukup banyak disambatakan jaka lawan Nabi nang lain, kisahnya hudah ditulis dalam Al-Qur'an tarait kahidupan Yusuf wan wasiatnya haja. Danul kahidupannya nang lain didapat matan kitab Yahudi wan Karistin. Dalam Al-Qur'an, kada dikisahakan tarait Yakub dalam badakwah lawan kaum tartantu, tapi disambatakan, inya maingatakan tarus lawan manusia gasan kahidupan akhirat kina.[3]
Ngarannya dalam Al-Qur'an karancakan dirangkai lawan Ibrahim wan Ishak, jua lawan babarapa Nabi nang lain, managasakan kadudukannya sawagai Nabi, urang salih, wan saurang baiman nang dibarii wahyu wan patunjuk ulih Allah.[4][5][6][7][8][9] Yakub jua dinyataakan baisi kakuatan nang ganal wan ilmu nang tinggi.[10] Disambatakan jua, Allah maanugrahi kitab wan kanabian lawan juriatnya.[11] Umat Islam jua diparintahakan supaya baiman lawan wahyu Allah, baik nang diturunakan lawan Nabi Muhammad saw. atawa jua lawan bubuhan Nabi nang lain, di antaranya Yakub, jua diparintahakan supaya kada mambidaakan bubuhan Nabi wan basarah saurang lawan Allah.[12][13]
Jujuhutan
[babak | babak asal-mulanya]- ↑ Ngaran Yakub disambatakan anam balas kali dalam surah-surah Al-Qur'an, yaitu: Al-Baqarah/2: 132, 133, 136, 140; Ali 'Imran/3: 84; An-Nisa/4: 163; Al-An'am/6: 84; Hud/11: 71; Yusuf/12: 6, 38, 68; Maryam/19: 6, 49; Al-Anbiya'/21: 72; Al-'Ankabut/29: 27; Shad/38: 45
- ↑ A-Z of Prophets in Islam and Judaism, B. M. Wheeler, Jacob
- ↑ Shad/38: 46
- ↑ Al-Baqarah/2: 133
- ↑ Al-Baqarah/2: 140
- ↑ An-Nisa'/4: 163
- ↑ Al-An'am/6: 84
- ↑ Maryam/19: 49
- ↑ Al-Anbiya'/21: 72
- ↑ Shad/38: 45
- ↑ Al-'Ankabut/29: 27
- ↑ Al-Baqarah/2: 136
- ↑ Ali 'Imran/3: 84