Warung sakadup
 | Artikal ini kada baisi kategori/tumbung atawa baisi kategori/tumbung sadikit banar. Ganii lawan cara manambahi kategori/tumbung nang sasuai. Janaki artikal nang sahuaran gasan manantuakan apa kategori/tumbung nang sasuai. Tulung ganii Wikipidia gasan manambahakan kategori/tumbung. |
Warung Sakadup adalah warung makan nang buka wayah siang ari rahatan bulan Ramadan. Warung sakadup sabujurnya warung makan biasa nang buka hari-hari, tagal ditambah istilah 'sakadup' lantaran inya masih buka rahatan urang puasaan.[1]
Pabila urang lalu di muka warung sakadup, urang nang makan di dalamnya kalihatan batisnya haja, samantara awaknya kada kalihatan. Nang ampun warung dasarnya manutupi muka warung wan kain atawa tarpal sakira mahalangi panglihatan urang nang di luar. Pasalnya, bajualan makanan wan minuman wayah siang ari di bulan puasa dianggap pamali ulih urang Banjar, maginnya wahini ada jua paraturan pamarintah nang kada mambulihi bajualan atawa mambuka warung wayah siang ari, bila malanggar bisa kana sangsi (hukuman).[1]
Paraturan Pamarintah
[babak | babak asal-mulanya]Salah sauting paraturan pamarintah parihal warung sakadup misalnya Paraturan Dairah (Perda) Ramadhan Numur 5 Tahun 2004. Di dalam Perda nitu diatur waktu gasan bajualan makanan ulih warung, risturan, atawa nang lainnya gasan urang nang bapuasa, yaitu mulai jam 3 imbah tangah ari. Buhannya nang katahuan makan di warung sakadup wayah siang ari dibawa ka kantur Satpol PP gasan dimintai katarangan wan dibari pambinaan. Tagal bila katahuan lagi makan di warung sakadup sabalum jam buka, buhannya kana tindak pidana ringan.[2]
Pasal 2 Paraturan Dairah Kuta Banjarmasin Numur 13 Tahun 2003 parihal Larangan Kagiatan wayah Bulan Ramadhan dijalasakan bahuwa:
- Kada bulih mambuka kagiatan wadah hiburan; risturan, warung, rumbung wan samacamnya rahatan bulan Ramadhan;
- Kada bulih mambuka wadah hiburan rahatan bulan Ramadhan; wan
- Kada bulih makan minum wan/atawa baruku di risturan, warung, rumbung wan samacamnya wan di tampat-tampat umum tumatan imsak sampai rahat babuka puasa.
Tagal Perda Ramadhan ngini ada jua pangacualian nangkaya di bawah ini.
- Urang nang mambuka risturan, warung, rumbung wan samacamnya nang bamaksud handak manyadiaakan gasan urang babuka puasa dibulihakan tumatan jam 5 kamarian;
- Urang nang bajualan makanan wan minuman di pasar wadai atawa nang samacamnya bulih buka wan bajualan tumatan jam 3 imbah tangah ari;
- Hutil atawa risturan ang masuk tumbung sabagai hutil wan risturan nang malayani tamu asing, mandapat dispensasi husus tumatan Kapala Dairah malalui partimbangan DPRD; wan
- Pangacualian ngini kada asi gasan kagiatan wadah hiburan.[3]
Perda Ramadhan sampai wahini masih jadi pamandiran, lantaran masarakat jua manuntut adanya tuliransi gasan pangikut agama lain atawa urang nang bahalangan puasa. Ada jua katantuan nang balum masuk aturan, misalnya warung sakadup atawa urang nang bajualan makanan babungkus haja, kada malayani nang makan di tampat, samastinya tatap dibulihakan bajualan siang ari. Perda Ramadhan dasarnya diulah sakira sabarataan urang mahurmati urang nang bapuasa, salah satunya kada makan wan minum di hadapan urang nang bapuasa.[3]
Jujuhutan
[babak | babak asal-mulanya]- 1 2 admindarahjuang (2023-03-31). ""Warung Sakadup" Warung Yang Hanya Ada Di Bulan Ramadhan, Bagi Urang Banjar oleh Syarfani". Darah Juang Online (dalam bahasa Indonesia). Diakses tanggal 2025-02-26.
- ↑ Husein (2022-04-20). "Satpol PP Gerebek Warung Sakadup, 6 Pelajar SMA Ikut Terjaring". Klik Kalimantan (dalam bahasa Indonesia). Diakses tanggal 2025-02-26.
- 1 2 Firdaus, Muhammad Ananta (Maret 2018). "Pelaksanaan Peraturan Daerah Tentang Larangan Kegiatan pada Bulan Ramadhan di Kota Banjarmasin". Badamai Law Journal. 3: 137. Diarsipkan dari versi asli Periksa nilai
|url=(bantuan) tanggal 2013-08-12. Diakses tanggal 2025-02-26.