Tanglong
Tanglong ialah panambaian matan tradisi Tiunghua bahari nang mamakai lampu matan kartas atawa lampiun[1] sawagai tampat cahaya atawa sumbu lampu.[2] Inya marupakan salah sabuting nang tamasuk kagiatan masarakat Kalimantan Salatan nang digawi gasan manyambut bulan Ramadan, labih tapatnya jua pas malam ka-21 nang disambat sagawai malam Nuzulul Qur'an, sampai handak manjalang Hari Raya Pitrah.[3] Salain kabiasaan ngini rancak dikanal di babarapa dairah Kalimantan Salatan, kaya tradisi mambarasihi tampat ibadah, makam kulawarga atawa ulama, sampai basalamatan di rumah urang. Hal nang ngini rancak digawi sacara bagutung-ruyung ulih urang-urang disa.[4]
Bahan tanglong ngini mamakai kartas nang bawarna-warni wan sajumlah kain nang disangga lawan paikat wan bilah paring sawagai karangka. Karancakan nang ngini diulah di atas garubak, bica, biskar, sapida mutur, sampai mubil.[5] Ujarnya budaya ngini hudah ada waktu labih matan 30 tahun lalu, pas Kabupatin Balangan masih sawagai sabuting kacamatan, nang tamasuk Kabupatin induk, Hulu Sungai Utara.[6]
Tanglong atawa nang dikanal bahari Bagarakan Saur digawi tradisiunal haja. Urang-urang kampung kaluar balalah saban kampung yang dilalui sasambilan mambawa alat-alat dapur, kaya panci dicatuk jadi bunyi-bunyian lalu jadi musik lawan bajalan batis sabalum dipakai gasan bamamasak hidangan basahur. Babun wan kanung kawa dipakai gasan alat musik ngitu, wan baju nang dipakai saadanya, jua sarung dililimpangakan haja di bahu pas Tanglong.[4]
Salawas waktu balalu, Bagarakan Saur atawa Tanglong nang dikanal, wahini jadi labih rami wan mudirin. Tanglong sawagai wadah bubuhan anum-anum gasan manyalurakan kriatipitasnya, musti tatap lawan malastarikan nilai-nilai budaya wan tradisi sabalumnya ngitu.[4] Parayaan nang ada rami banar di barbagai kuta di Kalimantan Salatan sampai rangkaian tradisi ngini sawagai aginda wisata budaya di bulan Ramadan. Saban tahun lumba kriasi Tanglong di dairah saurang musti ada nang bantuknya kaligrafi, arsitik, wan figur nang banuansa Islami baandak di atas mubil nang diarakakan dalam kuta.[7] Misalnya pas aginda pariwisata kuta Banjarbaru nang pawai mubil bahias lampu kartas warna-warni wan unik-unik bantuknya: masigit, katupat[8], Kakbah, Al-Qur'an, unta[9], manusia babaju muslim, rumah adat Banjar, badug, rapun kurma, guwa hira, sampai burung buraq ada jua.[6][5]
- Salain gasan Bagarakan Saur bahari ngitu, wahini gasan manyambut atawa Lailatul Qadar nang diyakini sawagai malam barakatnya hibak banar[10] lawan manyalakan lampiun barbagai bantuk jua.[11]
- Tanglong ngini maajak masarakat gasan maitihi pulang wan mamanfaatakan putinsi alam nang matan sungai, gasan kaparluan transpurtasi, pariwisata, wan bantuk lain nang kawa digawi di situ.[4] Di situ manampilakan budaya-budaya satampat, kaya bamainan musik Banjar di atas jukung.[4]
- Sawagai simbul basamaan, kriatipitas, idukasi, wan warisan nang tatap dilastarikan.[12]
- Utamanya ialah maikat silaturahmi lawan urang-urang lain wan masarakat satampat[12], wan iksprisi suka cita umat Muslim nang manuntungakan ibadah puasa Ramadan.[5]
- Mustinya sawagai bantuk tuntunan wan hiburan gasan sabarataan urang nang di situ.[5]
Jujuhutan
[babak | babak asal-mulanya]- ↑ "Arti kata tanglung - Kamus Besar Bahasa Indonesia (KBBI) Online". kbbi.web.id. Diakses tanggal 2026-02-18.
- ↑ "tanglung ~ Kateglo". kateglo.lostfocus.org. Diakses tanggal 2026-02-18.
- ↑ "Festival Tanglong ajang pelestarian budaya Tabalong". ANTARA News Kalimantan Selatan. Diakses tanggal 2026-02-18.
- 1 2 3 4 5 "Tradisi Masyarakat Banjar Jelang Ramadhan, Salah Satunya Tanglong". NU Online (dalam bahasa Indonesia). Diakses tanggal 2026-02-18.
- 1 2 3 4 "Festival Tanglong Balangan. Menyambut Bulan Ramadhan dan Malam Lailatur Qadr dengan Kemeriahan Lampion Warna Warni. » Budaya Indonesia". budaya-indonesia.org. Diakses tanggal 2026-02-18.
- 1 2 "Lestarikan Tradisi Budaya Tanglong, Dewan Kesenian Balangan Gelar Kegiatan Ini". Banjarmasinpost.co.id (dalam bahasa Indonesia). Diakses tanggal 2026-02-19.
- ↑ "Banjarbaru Gelar Festival Tanglong". ANTARA News Kalimantan Selatan. Diakses tanggal 2026-02-18.
- ↑ "Mengenal Festival Tanglong, Tradisi Warga Kalimantan Semarakkan Ramadan". detikKalimantan (dalam bahasa Indonesia). Diarsipkan dari versi asli tanggal 2025-06-09. Diakses tanggal 2026-02-18.
- ↑ "DPRD Balangan pertanyakan hilangnya tradisi arakan tanglong". ANTARA News Kalimantan Selatan. Diakses tanggal 2026-02-18.
- ↑ "Dinas Pendidikan dan Kebudayaan". disdikbud.balangankab.go.id. Diakses tanggal 2026-02-18.
- ↑ "Tanglong, Tradisi Menyambut Lailatulkadar". liputan6.com (dalam bahasa Indonesia). 2007-10-08. Diakses tanggal 2026-02-18.
- 1 2 David (2025-03-26). "Festival Tanglong Bukan Hanya Sekedar Tradisi". Pemerintah Kabupaten Mempawah. Diakses tanggal 2026-02-19.