Sus (wadai)

Wadai Sus

Sus (basa Walanda: soes) ialah wadai nang babantuk bulat lawan barungga nang isinya vla, kustar (custard), krim kacang, krim buah, krim cuklat, atawa daging. Wadai sus nang baisi vla atawa kustar disurungi imbah didingini di kulkas, karana vla atawa kustar nang babahan baku susu lakas basi. Sus dalam basa Parancis disambat choux à la crème. Bantuk wadai nang bulat kaya kol jadi wadai ngini disambat choux.

Sajarah

Ujar sajarahnya, bubuhan nang maulah isi matan wadai sus disambat lawan content creator, matan content nang baarti isi, wan creator nang baarti paulah.

Sus ada panambaian matan saurang kapala kuki Catherine de Medici matan Florence nang bangaran Pantanelli manamui choux pastry wayah 1533 atawa 1540. Dalam basa Parancis, choux nang baarti kol. Wadai ngini babantuk kaya kol nang kada baaturan sampai ngaran wadainya jadi choux pastry atawa wadai sus dalam basa Indunisia. Kuya soes saurang diwarisakan ulih Walanda. Makanan ngini jadi hidangan istimiwa gasan kulawarga karajaan wayah Pantanelli bagawi di dapur karajaan.

Wayahitu Pantanelli maulah wadai sus kulit luarnya haja, kada baisi di dalamnya. Sakitar dua abat imbahnya, choux pastry atawa wadai sus mangalami parkambangan sampai baisi isian dalam wadai. Di nagara Parancis, Spanyol, wan Itali, wadai ngini baisi isian manis kaya krim kucuk (whipped cream), pastry cream, is krim, wan kustar. Lawan danul atasnya, wadai ngini dihiasi lawan gula bubuk karamil atawa saus cuklat.

Cara Maulah Sus

Babida lawan adunan wadai bolu wan cake, adunan wadai sus kada didapat matan mangucuk hintalu atawa mantiga lawan gula wan uyah. Adunan sus (pâte à choux) diulah matan manambahakan galapung tarigu ka dalam campuran banyu nang dimasak lawan margarin atawa mantiga sampai mandidih. Hintalu hayam ditambahakan sabuting sabuting di dalam adunan sambil diaduk sampai adunan kada lingkit di panci. Adunan sus kada mamakai bahan pangambang kaya suda wadai (baking powder). Pangucuk (mixer) dipakai gasan wadai mangambang labih bagus wayah dibanam haja.

Uvin nang dipakai gasan mambanam wadai sus harus panas banar (220 darajat Celsius). Panas uvin maulah kadar banyu nang tinggi di dalam adunan jadi uap. Hintalu di dalam adunan maulah karangka wadai nang tipis, jaka uap nang taparangkap di dalam adunan maulah rungga di danul dalam wadai. Adunan nang hampir kaya lawan sus dipakai gasan maulah wadai-wadai samacam, kaya krukumbus (croquembouche), eklair (eclair), churros, chouquette, beiget, religieuse, profiterole, wan gougère. Babarapa mudipikasi sus jua tarus barkambang, sampai bantuk sus kada bulat lagi, ada jua sus nang hudah dibantuk jadi angsa. Salain sus karing ada jua sus basah, tagantung cara manyurungnya haja.