Sumpah pamuda

Sumpah Pamuda, nang sacara rasmi disambat sabagai Kaputusan Kongres Pamuda Indunisia (hijaan van Ophuijsen: Poetoesan Congres Pemoeda-pemoeda Indonesia) adalah sumpah nang diucapakan ulih pamuda-pamudi Indunisia wayah tanggal 28 Uktubir 1928, nang manantuakan idintitas bangsa Indunisia. Sumpah pamuda adalah salah satu tihang utama dalam sajarah garakan kamardikaan Indunisia. Ikrar ngini adalah bantuk garakan kamardikaan Ripublik Indunisia ulih pamuda wan pamudi di Indunisia lawan parnyataan janji satu tanah air, satu bangsa, wan satu bahasa. ^[1]

Kongrés pamuda pamulaan diadaakan di Batavia (wahini Jakarta), ibu kuta Hindia Belanda tahun 1926. Kongres ngini kada maulah kaputusan rasmi, tagal maartiakan gagasan Indunisia nang basatu. Mimpi kamardikaan Indunisia ma-ilhami barataan pamuda Indunisia gasan manyatuakan usaha buhannya dalam mamubilisasi urganisasi pamuda ka dalam sabuting forum.^[2] Wayah itu, situasinya tagang lantaran pamarintah kulunial Walanda hanyar manumpas pambaruntakan tumatan kalumpuk kumunis wan kalumpuk agama di Cilegon, Banten, wan Sumatra Barat. Wage Rudolf Supratman, wayah itu jua manggubah wan marakam lagu "Indonesia" (nang pacang jadi lagu "Indonesia Raya") wan diganii Yo Kim Tjan, nang ampun tuku musik Populaire di Pasar Baru. Sabalumnya, WR Supratman maminta Firma Odeon (ampun urang Walanda) wan Tio Tek Hong, nang ampun tuku vinil di Pasar Baru, gasan mancatat lagu nitu, tagal kada dihakuninya lantaran buhannya takutan awan pamarintah kulunial Walanda. Lagu "Indonesia" akhirnya dirakam badadiaman di rumah Yo Kim Tjan di parak Gunung Sahari wayah tahun 1927.^[3]

Wayah bulan Uktubir 1928, kongres pamuda Indonesia kadua digawi di tiga tampat. Sidang pamulaan diadaakan tanggal 27 Uktubir 1928 di gadung Katholieke Jongelingenbond, harapannya kongres nitu kawa ma-ilhami rasa parsatuan. Sidang kadua mambahas ihwal pandidikan wan diadaakan di gadung Oost Java Bioscopy. Sidang nang katiga wan pahabisannya diadaakan tanggal 28 Uktubir di Jalan Kramat Raya No 106, di rumah ampun Sie Kong Lian.^[3] Acara ngini ditutup wan mandangarakan lagu kabangsaan Indonesia Raya ulih Wage Rudolf Supratman nang dimainakan pakai biola, wan dinyanyikan ulih puteri Haji Agus Salim, Theodora Atia "Dolly" Salim, tagal dimudipikasi sadikit sakira kada maulah sarik pamarintah kulunial Walanda.^[4] Kungris lalu ditutup lawan pembacaan Sumpah Pemuda.

Rumusan Kongres Sumpah Pemuda ditulis Mohammad Yamin di sacarik kartas, lalu dijulung ka Soegondo pas Sunario masih bapidatu di wayah paampihan kungris (sabagai utusan kapanduan) sambil babisikan awan Soegondo: Aku heb een eleganter formulering voor de resolutie (Aku baisi sabuah rumusan nang labih iligan gasan kaputusan kungris ngini), imbahtu Soegondo manambahi tanda (paraf) satuju, balalu diantarakan ka nang lain gasan manambahi tanda satuju jua. Sumpah nitu awalnya dibacakan ulih Soegondo wan imbah tu dijalasakan nang labih langkap ulih Yamin.

Tumatan tahun 1959, tanggal 28 Uktubir disapakati sabagai Hari Sumpah Pemuda, hari nasiunal tagal lain hari libur nang ditantuakan ulih pamarintah Indunisia malalui Keppres No. 316 Tahun 1959 tanggal 16 Disimbir 1959 gasan mamparingati kajadian Sumpah Pamuda.

Jujuhutan

↑ Santoso, Gunawan; Khairasyani, Intan; Listiani, Shinta; Rachmadani, Nia Octavia; Sakiinah, Almirah Nur; Hanjani, Syahkira Shinta; Kamilah, Dinda Putri; Ainni, Putri Nur (Juni 2023). "Sumpah Pemuda Sebagai Persatuan Bangsa Untuk Membangun Negara Yang Berdikari". Jurnal Pendidikan Tranformatif (Jupetra). 02 (02): 360–370. doi:https://doi.org/10.9000/jpt.v2i2.359 Periksa nilai |doi= (bantuan). ISSN 2963-3176.
↑ Pendidikan Pancasila dan Kewarganegaraan kelas 8 (PDF) (dalam bahasa Indonesia). 2. Kementerian Pendidikan dan Kebudayaan. 2017. hlm. 98. ISBN 978-602-282-960-7.
1 2 Eko, Prasetyo (2020-10-28). "Peran Sie Kong Lian dan Pemuda Papua dalam Sumpah Pemuda". Tutur Visual - Kompas.id (dalam bahasa Indonesia). Diakses tanggal 2022-04-15. Kasalahan pangutipan: Tanda <ref> tidak sah; nama "Eko Kompas 2020" didefinisikan berulang dengan isi berbeda
↑ Raditya, Iswara N (2021-10-26). "Fakta-fakta Menarik Sejarah Hari Sumpah Pemuda 28 Oktober 1928". tirto.id (dalam bahasa Indonesia). Diakses tanggal 2022-04-15.

[1] Santoso, Gunawan; Khairasyani, Intan; Listiani, Shinta; Rachmadani, Nia Octavia; Sakiinah, Almirah Nur; Hanjani, Syahkira Shinta; Kamilah, Dinda Putri; Ainni, Putri Nur (Juni 2023). "Sumpah Pemuda Sebagai Persatuan Bangsa Untuk Membangun Negara Yang Berdikari". Jurnal Pendidikan Tranformatif (Jupetra). 02 (02): 360–370. doi:https://doi.org/10.9000/jpt.v2i2.359 Periksa nilai |doi= (bantuan). ISSN 2963-3176.

[2] Pendidikan Pancasila dan Kewarganegaraan kelas 8 (PDF) (dalam bahasa Indonesia). 2. Kementerian Pendidikan dan Kebudayaan. 2017. hlm. 98. ISBN 978-602-282-960-7.

[Eko_Kompas_2020-3] 1 2 Eko, Prasetyo (2020-10-28). "Peran Sie Kong Lian dan Pemuda Papua dalam Sumpah Pemuda". Tutur Visual - Kompas.id (dalam bahasa Indonesia). Diakses tanggal 2022-04-15. Kasalahan pangutipan: Tanda <ref> tidak sah; nama "Eko Kompas 2020" didefinisikan berulang dengan isi berbeda

[Raditya_2021-4] Raditya, Iswara N (2021-10-26). "Fakta-fakta Menarik Sejarah Hari Sumpah Pemuda 28 Oktober 1928". tirto.id (dalam bahasa Indonesia). Diakses tanggal 2022-04-15.

[1]

[2]

[3]

[4]