Sidratul Muntaha
 | Artikal ini kada baisi kategori/tumbung atawa baisi kategori/tumbung sadikit banar. Ganii lawan cara manambahi kategori/tumbung nang sasuai. Janaki artikal nang sahuaran gasan manantuakan apa kategori/tumbung nang sasuai. Tulung ganii Wikipidia gasan manambahakan kategori/tumbung. |
Sidratul Muntaha adalah sabuah wadah paling pahabisan tumatan parjalanan Nabi Muhammad SAW dalam kajadian Isra Mikraj. Sidratul nitu baasal tumatan kata sidr nang artinya puhun bidara atawa lotus nang kada baduri. Sidr dikuya babarapa kali dalam Al-Qur'an, yakni Surah Saba ayat 16, An-Najm ayat 14 wan 16, ada jua di Al-Waqiah ayat 28. Puhun Sidr nitu digambarakan nangkaya puhun nang baparakan awan surga, wan jadi wadah bakumpulan urang-urang nang baiman.[1]
Samantara gasan kata al-Muntaha atawa Muntaha, di dalam Al-Qur'an disambat sabanyak tiga kali, yaitu dua kali dalam surat An Najm ayat 14 wan 42, wan sakali dalam surat An Naziat ayat 44. Art kata al-Muntaha adalah nang paling pahabisan.[1]
Puhun bidara dianggap sabagai lambang kabijakan atawa wisdom. Bubuhan ahli tafsir maartikan bahuwa Sidratul Muntaha adalah lambang kabijakan paningginya wan pahabisannya nang kawa dicapai ulih saurang manusia pilihan. Lantaran Nabi Muhammad SAW sudah sampai ka Sidratul Muntaha, maka sidin sudah mancapai kabijakan nang paling tinggi nang suah dikaruniakan Allah SWT gasan hamba-Nya.[1]
Kisah Isra Mikraj wan Sidratul Muntaha
[babak | babak asal-mulanya]Allah SWT mautus Malaikat Jibril gasan mambawai Nabi Muhammad SAW mangalilingi ruang awan waktu, manjalajahi satiap buncu wan diminsi nang ada di langit, lantaran Malaikat Jibril nitu marupakan mahluk tumatan langit katujuh nang babantuk cahaya.[2]
Cahaya nitu kawa maulah Malaikat Jibril mambawa Nabi Muhammad SAW malalui barataan nang kada kawa dilihat ulih mata manusia. Buhannya diumpati ulih Al-Buraq nang asalnya tumatan kata Barqun nang baarti kilat, maksudnya mahluk barupa cahaya nang cungul tumatan al-Malakut sahingga dijadikan tunggangan dalam parjalanan nitu. Wayah manaiki Buraq, buhannya malasat nangkaya kacapatan cahaya 300.000 km par datik.[2]
Kajadian ngini baisi dua tahapan. Nabi Muhammad SAW manampuh parjalanan tumatan Masjidil Haram di Makkah, manuju Masjidil Aqsa di Palestina. Imbah nitu, tumatan Masjidil Aqsa dinaik akan manuju wadah nang paampihan, yaitu Sidratul Muntaha.[2]
Parjalanan Nabi Muhammad SAW tumatan Masjidil Haram ka Masjidil Aqsa disambat sabagai Isra, sadangkan parjalanan tumatan Masjidil Aqsa naik ka Sidratul Muntaha disambat Mikraj. Sampai di Sidratul Muntaha, Nabi Muhammad SAW mandapat parintah dari Allah SWT gasan sambahyang, nang pamaraannya lima puluh kali manjadi lima kali haja dalam sahari samalam.[1]
Bantukan, Kaandakan, wan Pungsi Sidratul Muntaha
[babak | babak asal-mulanya]Parihal bantukan Sidratul Muntaha, ujar Teungku Muhammad Hasbi Ash-Shiddieqy sabagaimana nang diriwayatkan dalam hadis bahuwa buahnya ganal nangkaya tajau (kendi) hajar, daunnya nangkaya talinga gajah, wan sakulilingan batangnya kada kawa ditampuh dalam waktu 70 tahun. Sadangkan ujar Ibnu ‘Asyur, Sidratul Muntaha nitu baisi tiga sipat husus, yaitu naungannya nang rindang, rasanya nang nyaman, wan baunya nang harum.
Parihal kaandakannya, ujar Wahbah al-Zuhaili nang maambil tumatan Hadis Shahih rimayat Imam Muslim bahuwa Sidratul Muntaha andaknya di langit kaanam. Ujar Tantawi Jauhari al-Misri andaknya di langit katujuh tumatan sabalah kanan Arasy.
Parihal pungsinya, ujar Teungku Muhammad Hasbi Al-Shiddieqi bahuwa Sidratul Muntaha nitu wadah nang diulah ulih Allah SWT gasan jadi wadah buliknya sabarataan masalah. Ujar Wahbah Al-Zuhaili bahuwa di Sidratul Muntaha nitu ada surga nang jadi wadah kadiaman arwah-arwah urang Mukmin. Wan ujar Said Hawwa, Sidratul Muntaha nitu wadah kadiaman gasan urang-urang nang batakwa wan arwah urang-urang nang mati syahid.[2]
Jujuhutan
[babak | babak asal-mulanya]- ^ a b c d "Apa Itu Sidratul Muntaha, Tempat Akhir Isra Miraj Nabi Muhammad SAW". CNN Indonesia. 5 Februari 2024. Diakses tanggal 14 Maret 2025.
- ^ a b c d Zahro, Sayyidah Fatimatuz; Mubarok, Ghozi (2024). "Konsep Sidrat Al-Muntaha dalam Al-Qur'an". El-Waroqoh. 8: 84. Diarsipkan dari versi asli Periksa nilai
|url=(bantuan) tanggal 2013-08-12. Diakses tanggal 2025-03-14.